دق الدلجة محمد عبد الماجد مليار للهلال ومليار للمريخ والمنتخب يطلع ميزانتيه من مصروف المدرسة الحمدلله المرة دي طلعوا للهلال برضو. طلع عندنا نصيب. مليار عديل كدا. زمان كان قايم بيها المريخ براهو. ولا كان في زول بيسمع بيها. لا بنشوفها ..ولا بنسمع بيها. ونحن نقعد نحرس دخل المباريات. لكن طول ما الحكاية فيها اعلان ..وتبرع وصور ..لا بد من (المساواة) بين الهلال والمريخ في الدعم. يمكن كانوا يقولوا مجموعة الهلال ..عشان هى المجموعة الاولى ما في للهلال قروش. يتصرف بي طريقتو. ويمكن كانوا يقولوا المريخ دا عشان ما يتقطع في الجزائر …دعمناه بي (مليار). الجماعة ديل عندهم تلاتة مباريات في الجزائر. العيد ذاتو هناك. بلة جابر برجع من الجزائر حافظ النشيد الوطني بتاع الجزائر. ومصعب عمر بجيب معاه سبع روايات من روايات احلام مستغانمي. ديل ح يعيّدوا هناك. العيد في الجزائر كيف؟. قالوا العيد في الجزائر – ما في زول بقول للتاني العيد مبارك عليك…ابدا ما في كلام زي دا. العيد بي قون. حلاوة العيد هناك عندهم (عكسيات). ما عندهم حلاوة. عشان بس تبقوا عارفين. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). نعود لمليار للهلال ومليار للمريخ …ونتكلم. لا اريد ان ابخس (الدعم) الذي قدمه جهاز الامن والمخابرات للهلال والمريخ والذي تمثل في منح اي نادي (مليار) جنيه. مليار لكن معها صور وخبر واعلان. وما عاوزين نقول اي حاجة. ولا نعلق. ولا نلمح. كلام جميل..وحاجة كويسة…(ما قلنا شيء). نقول شنو عاد؟. ما عاوز اقول اكتر من رمضان سخن. والصيام بقى صعب شديد. دي ما عاوزننا نقولها. كلام عادي ما فيه اي حاجة. ما فيها حاجة والله. الدينا رمضان. هي يعني المليار شن طعمها؟. ح تعمل شنو مع تذاكر الطيران دي. الفندق براهو عاوز كم؟. والمحترفين. والجهاز الفني. المليار دي مع ناس (اكرا) ديل …(رغيف) ساكت ما بتكفي. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). مالكم عاوزين تقولوا شنو؟. انا عاوز اقول كلام كتير. عندي رأي في حكاية (المليار) التى دعم بها فريق المريخ من قبل جهاز الامن والمخابرات. عندو وجهة نظر. المليار دي مفروض يقسموها. نص يمشي للمريخ ..(ما عندنا اعتراض). ونص يشيلو فريق العلمة. النص بالنص. المريخ 500 الف جنيه. والعلمة 500 الف جنيه. الجماعة ديل عندهم نص في الدعم دا ..لو العلمة ما طلعوا (حمام) قرش ما كان ح تشوفو. اقسموا ليهم معاكم. ديل في الاقوان ..عندهم قون جابوه براهم. الحكاية بتاعة (القون العكسي) دي – عارفنها زي شنو؟. اصبروا ..بشوف ليكم ليها (وصفة). دي زي لمن تسأل ليك من بيت زول …يقوم واحد من الجماعة الما سألتهم يوصف ليك البيت. يتبرع ليك بالوصف. ويخلص ليك في الوصف جنس اخلاص. ومرات بيصل معاك للبيت. انا ما عارف – ليه في ناس بتتعب كدا في الوصف؟. وبتخلص كمان. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ناس العلمة ديل اقسموا ليهم معاكم يا ناس المريخ. ما تاكلوهم. انتوا تاكلو (الزلط). والكوبري ذاتو. وتقولوا دي (الجقور). يا كمان كلموا ناس الجهاز يطلعوا ليهم (مليار) لفريق العلمة. ما ظريفة منكم. لو ما العلمة دي ..هسع يا ناس المريخ (سيكافا) حقتكم تكون وصلت (المربع الذهبي). كان مرقتو عديل كدا. عشان كدا عليكم الله (العلمة) دي ما تقصروا معاها. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الدعم الذي قدم للقمة السودانية هل هو دعم من اجل الفريقين ام من اجل الجمهور. اكيد من اجل (الجمهور). حقيقة الجمهور بستاهل. بفتشوا للفرح ..وعاوزين ينتصروا ويمشوا لي قدام ويحسوا بي قيمة الاندية التى يشجعوها. الدعم هو يصب في مصلحة الكورة السودانية ليس في ذلك شك. وكما قلت ..وبعيد ليكم تاني ..جهاز الامن يشكر على ذلك. لكن خلونا في نفس الوقت نسأل ونقول ليه مليار للهلال ومليار للمريخ؟. المنتخب (الوطني) ما عندو حاجة. الفريق القومي ليه ما في زول بيشتغل بيه. رغم ان المنتخب بلعب في تصفيات قيمتها اكبر حتى من قيمة المنافسات التى يلعب فيها الهلال والمريخ. الاهم من ذلك ان الهلال والمريخ رغم (الصرف) الخرافي – إلّا ان حاجتهما اقل من حاجة المنتخب. على الاقل الهلال عندو اشرف الكاردينال ..بدفع للهلال من القرش للاربعين مليار. يعني مليار الجهاز دي الكاردينال ممكن يصرفو في (تمرين). وجمال الوالي ايضا عنده القدرة على الصرف على المريخ الى جانب جماهيرية الهلال والمريخ القادرة على تسيير امور القمة. يعني حتى لو الكاردينال والوالي غادروا ..الهلال والمريخ ما بتجيهم عوجة. العوجة بتجي للمنتخب. المنتخب الما عندو وجيع. ولا عندو ضهر. ولا في زول بيشتغل بيه. المنتخب اليتيم. الاتحاد العام ذاتو ما فاضي ليه ..ولا عندو ليه وقت. منتخب بلقط (حق المواصلات) ..وما بلقى حتى (ميادين) يتمرن فيها. لا بعسكروا ولا بدخلوا معسكرات مقفولة. لاعبو المنتخب للاسف الشديد بلموهم من تمارين الهلال والمريخ. لماذا يذهب الدعم كله للهلال والمريخ؟. وتهتم اجهزة الدولة وبي اعلى مستوياته بالهلال والمريخ ..والمنتخب (اليتيم) ما عندو وجيع. وما في زول بيسأل منو؟. ولا في زول بدفع ليه قرش. في كل الدول الاهتمام الاول بالمنتخب ..والدولة على كل مستوياتها بتدفع للمنتخب وبتدعمه. يعني الدولة ملزمة بان تدفع راتب مدير فني مرتبه يصل لمائة الف دولار. وهي ملزمة بان تجهز المنتخب وتعده بالصورة المثلي. نحن في السودان عندنا المنتخب (غريب) علينا. غريب اعلاميا. وغريب في الاتحاد العام. وغريب حتى من قبل الدولة. من بعد نطالب من الجمهور الاهتمام بالمنتخب وتشجيعه..ومساندته. اذا كانت الدولة لا تهتم بالمنتخب ..هل سوف يهتم المجشع العادي بالمنتخب؟. الانكأ من ذلك ان الدولة تهتم بالهلال والمريخ – وما بتقصر معاهم وبتعمل لهما الف حساب ..في ظل غياب الدور الوطني والحس العام مع المنتخب السوداني. نتمنى ان يقدم جهاز الامن والمخابرات (مليار) اخرى للمنتخب ..حتى وان لم يحقق المنتخب انجازا ..المنتخب يحتاج للدعم حتى يحقق الانجازات. لذلك اكرموا هذا المنتخب ..وادعموه. واجب علينا ذلك. نحن كاعلام نعترف بالتقصير نحو المنتخب ..لكن ما بال الدولة نفسها تقصر في حق ممثلها. لو وجد المنتخب السوداني الرعاية والدعم ..لحقق الكثير من الانجازات والبطولات. هسع بعد مليار الهلال. ومليار المريخ. المنتخب يعمل شنو؟. يشيلها (موزة). المنتخب دا بذكرني بي الزول البكون عندو تلاتة ولاد ..ومعاهو في نفس الوقت ولد اختو في البيت. الزول دا في العيد بيشتري لاولاده التلاتة هدوم العيد ..وبقول لي ولد اختو انت اشتري ملابس العيد من مصروف المدرسة. هسع المنتخب عاوزنو يطلع ميزانيتو من مصروف المدرسة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………… و غدا يلعب الهلال في عطبرة. من الكنغو الى عطبرة. من الحديد والنار الى الحديد والنار. جمهور الهلال في عطبرة في الانتظار. ح تشوفوا سهرة في منتهى الروعة. بختكم. ………. السيدة (ل)..شاي اللبن بدون لبن ما ببقي شاي بي لبن. وقرّض على كدا.