دق الدلجة محمد عبد الماجد الكلام البقوله الآن في (النقالة) هو ذاتو الكان بقولوه عن (بكري المدينة) اعلام المريخ عبر الصحف ومواقع التواصل المختلفة كان قد سخر كثيرا من الهلال بعد الهزيمة من (التطواني) والتعادل مع هلال كادوقلي في مباراة غاب فيها (اللعب النظيف) شعارا وتطبيقا. الآن بعد مباراة الامل الموضوع بقى ليهم حار – وانتوا وقت ما بتقدروا على الحاجات دي بتتفاصحوا مالكم. ما بتستحملوا. كان هلال كادوقلي قد ظن ان الوصول لشباك الهلال اسلم له وانفع من الروح الرياضية..فكان هدفه في شباك الهلال هدف (كارثي) بحق وحقيقة. وكما قال رئيس نادي الامل عطبرة في برنامج (زمن اضافي) باذاعة هلا مع الزميل حسن فاروق ان منافسة الدوري الممتاز فقدت (عدالتها) يمكن ان نقول بعد هدف هلال كادوقلي في الهلال بعين قوية وثقة اعرض ان المنافسة فقدت (اخلاقها) ايضا. ليصبح الدوري الممتاز دوري بدون عدالة وبدون اخلاق ايضا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). نعود ونقول ان اعلام المريخ وجماهيره سخروا بما فيه الكفاية في الايام الماضية عن الهلال ..واعتمدوا خسارة الهلال امام التطواني في ملعبه فرصة للنيل من الهلال وهم الذين خسروا امام مريخ الفاشر في ملعبهم ومريخ الفاشر يلعب ناقص لاعب وبدون (شرطة) ومحتسبة ضده كمان ضربة جزاء. مع كل هذه المغريات والمحفزات خرج المريخ خاسرا في ملعبه ..وعندما لعب المريخ العاصمي في الفاشر امام مريخ الفاشر عاد بنقطة واحدة ..وقالوا ان السبب في ذلك هو ملعب المباراة. علما ان المريخ في ملعبه بام درمان فشل حتى في الخروج بتلك النقطة التى عاد بها من (النقعة). يعني (النقعة) كانت ارحم لهم من (الرد كاسل) الذي خسروا فيه بينما تعادلوا في الفاشر. وبتكلموا بعد دا كلو عن سوء الملعب. غارزيتو ارجع امس في قناة الشروق خسارة فريقه لسوء ارضية ملعب عطبرة…وهذا امر اعتدنا عليه وحفظناه وشربناه شراب ..كلما يخسر المريخ يرجعوا السبب لسوء ارضية الملعب. خلاص يا سواريز. عليكم الله ناس كوفي ديل عاوزين ليهم ارضية ملعب ..ديل مفروض يلعبوهم في (شوك) عديل كدا ..عشان الحلاقات البعملوا لينا فيها دي. ارضية شنو؟. اكرا عاوز ليه ارضية كمان. بكري المدينة دا لو جابوا ليه نجيلة طبيعية ممكن تشيلو نومه. الموضوع دا احسن ليكم تخلوه مقفول ..عشان ما نفتحو ليكم ساكت. الهلال لعب في كادوقلي في اسوأ ملعب ..(حدايق حبيبي مفلس كما اشار الكوكي) وفي غياب (الروح الرياضية) كما شاهدنا جميعا ..لكن مع ذلك لا نعتبر ان تعادل الهلال سببه هذه العوامل – اذ نفترض انتصار الهلال في كل الظروف ..وفي كل الامكنة والازمنة. حكاية الملعب كعب ..وعندنا ضربة جزاء لم يحتسبها لنا الحكم هذه امور يجب ان نتجاوزها. اذا بقينا في هذه الاعذار فلن نحقق بطولة خارجية ..لأن المنافسات كلها تلعب في مثل هذه الملاعب وفي ظروف اسوأ من ظروف عطبرة وكادوقلي التى غاب عنها شعار اللعب النظيف. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). فيصل سيحة امس في عالم الرياضة وعبر برنامج رضا مصطفى الشيخ الذي يوشك ان يكون فيه رضا (صديق علي صالح) وهو يبحث عن (التصليح) او (كسير التلج) للمريخ في الحق والباطل …جاءنا سيحة ببدعة جديدة هذه المرة وهو يحلل اداء حكام مباريات الهلال والمريخ الافريقية. الموضوع دا يا سيحة ما بتقدر عليه. بعدين انت بتقول (نضارتك) كعبة ..بتحلل لينا كيف بالشم. البدعة مضحكة ..والحيلة ظاهرة – رغم ان سيحة اكد ان حكم مباراة الهلال والتطواني كان سببا مباشرا في خسارة الهلال ..غير اننا لا يهمنا في هذا الامر شيء. شكرا ليك يا كابتن. حكام مباريات الهلال وظلمهم للهلال لا يحتاج الي شهادة سيحة ولا الى جهاز رضا مصطفى الشيخ الذي يعمل بالمزاج. اعجب من برنامج يفشل طاقمه بما في ذلك (المهندسين) من فرز مسابقة هاتفية يحدوثنا اهله عن ضربة جزاء صحتها او عدم صحتها. انتوا فائزة في مسابقة هاتفية او فائز ما قادرين تتطلعوه ..عاوزين تطلعوا لينا ضربات الجزاء. يا جماعة اتكلموا قدر جهازكم. البرنامج كلو رضا مصطفى الشيخ (مصنقع) فوق..وبيتشاكل مع مخرج البرنامج. وفيصل سيحة (زعلان) وبيشاكل في الزمن. فيصل سيحة ورضا مصطفى الشيخ حللوا اداء حكام مباريات الهلال والمريخ في البطولة الافريقية فقط من اجل (تبرئة) الحكم الغاني لامبيتي بعد الهجمة التى تعرض لها الحكم بسبب الاداء (المفضوح). الحكم الغاني لامبيتي هاجمه الاعلام السوداني وهاجمه الاعلام الجزائري وهاجمه حتى الاعلام المصري (المحايد) وجاء فيصل سيحة من اجل تبرئة الحكم والاشادة به والتحدث عن (شجاعته). فعلا الحكم (شجاع) ..لو لم يكن شجاعا..ما كان ارتكب هذه الاخطاء بهذه الجرأة. ومثلما قال سيحة ان حكم مباراة الهلال والتطواني كان ضعيفا وسببا في خسارة الهلال نقول ان حكم مباراة المريخ والوفاق كان (ارهابيا) وهو السبب في خسارة وفاق سطيف بالارهاب الذي احدثه لهم في الملعب. انا اول مرة اشوف لي حكم فرحان اكتر من بكري المدينة. لامبيتي دا لمن علاءالدين يوسف جاب القون قعد ينطط وروحو بردت. ولمن الحكم طرد لاعب وفاق سطيف ..الفرحة عاوزة تقسمو على اربعة واللاعب يخرج من الملعب. ولمن احتسب ضربة الجزاء الثانية التى قال عنها سيحة انها غير صحيحة قرب يضبح ليه (عجل). اما عندما سجل (اكرا) هدف المريخ التاني فقد اقترب لامبيتي من التحليق فوق مقصورة استاد المريخ. ويقول ليك حكم شجاع. الشجاعة شن طعمها لو بقت كدا. فيصل سيحة من عدم الموضوع العندو ..قعد يتكلم عن (النقالة) في مباراة الهلال والتطواني. زولكم بفتش بقى في (النقالات). يا زول انت مالك امالها ..كمان (النقالة) بقت (ضربة جزاء). الغريبة ان المريخاب الذين حللوا لانفسهم (الوطنية) وهم يحتلفون ويسخرون كل هذه السخرية رفضوا ان يتحدث اعلام الهلال عن (لامبيتي) وجابوا سيحة عشان يقول لينا الحكم (شجاع). اجازوا لانفسهم الحديث عن (النقالة) ورفضوا لنا الحديث عن (الحكم). النقالة وإلّا الحكم يا ناس؟. المضحك ان الكلام البقولو فيه المريخاب الان في (النقالة) هو نفس الكلام الكانو بقوله في بكري المدينة زمان. هسع (النقالة) دي كان لقيتوها ..ح تطلعوها لينا السماء. وح تبقى احسن (نقالة) في العالم. نسيتوا كلامكم عن بكري المدينة زمان. بكري المدينة الآن بقى بطل. والنقالة لو جات التسجيلات بتطلعوها (همر) عديل كدا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). …………. و غارزيتو (الخرف) ظهر في تصريحاته. قال بجيب الكاس والدوري والبطولة الافريقية. انت يا غارزيتو لقيت ليك (خاتم) وإلّا (عفريت). زولكم من لقى الخاتم تاني ما حقق ليهم انتصار في الممتاز. محمد عبدالرحمن لو قعد في المقصورة بجهجه ناس ضفر وامير كمال. ……….. السيدة (ل)…(غيابك) بقى زي (حضورك) ..الاتنين بتقعدي فيهن قدام. وقرّض على كدا.
