دق الدلجة محمد عبد الماجد (رزاق) اجبرهم على اجتماع (مكاشفة) المريخاب ديل ما بيستحملوا…اول ما الموضوع يسخن معاهم بعملوا ليهم (اجتماع مكاشفة). من يجيبوا ليك سيرة (اجتماع مكاشفة) اعرف طوالي ان الموضوع خطير. قاعدين بقوا على الهبشة. على النقطة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). شفتوا الجماعة اول ما تضيق عليهم بعملوا (اجتماع مكاشفة). ناس المريخ نحن بنعرفهم. نحن حافظنهم – وعارفنهم بتصرفوا كيف؟. وبعملوا شنو؟. اجتماع المكاشفة دا يعني (الزومة مضايقة). قربت. كتمت. الحالة صعبة. والموضوع خطير. ولعت. واتشعلت عديل كدا. (عقد السيد جمال الوالي رئيس مجلس الإدارة اجتماع مكاشفة مع الجهاز الفني واللاعبين بقاعة الاجتماعات بفندق روينا مقر معسكر المريخ وذلك عصر امس بحضور نائب الأمين العام متوكل احمد علي والمهندس عبدالقادر همد وحمد السيد مضوي والكابتن حاتم محمد احمد . تم التطرق الي مختلف الأمور التي تهم فريق الكرة والتحديات القادمة وتحدث الوالي عن ضرورة استشعار المسؤلية بشكل أكبر فى المرحلة القادمة وطالبهم بعدم التراخي فى المباريات المحلية علي حساب المباريات الأفريقية فقط ، معتبرا أن الدوري الممتاز هو أحد أهم أهداف فريق الكرة فى الموسم الحالي الجهاز الفني واللاعبين تعهدوا بعدم التفريط فى نقاط ما تبقي من مباريات وتقديم المستوي المنتظر واسعاد الجماهير ، وقدموا شكرهم لرئيس النادي وأعضاء المجلس لتوفيرهم كل المتطلبات التي يحتاجها الفريق). عاد نبقى على دا. الموضوع ذاتو من يقولوا ليك ظهر فيه (همد) اعرف الموضوع ما طبيعي. اعرف طوالي في (مشكلة). ناس مضوي وحاتم وهمد ديل اصلو ما بتلموا ساكت. ديل زي عربية الاسعاف ..في كارثة – في كارثة . ما بجتمعوا في الساهلة. كل من (رزاق). الشيء دا ظهر من رأس رزاق. قبل (رزاق) ما كان في حكاية زي دي. ما كان في مشكلة. رزاق خلاهم ليك يعملوا اجتماع (مكاشفة). واجبرهم ليك يقعدوا مع (الجهاز الفني). ما قلتوا نوبة. ويقعدوا مع اللاعبين. بعدين (همد) دا لو عندو اجتماع (مكاشفة) احسن يعملو للخريف. المكاشفة محتاج ليها الخريف. المطر يا همد. الشوارع اتقفلت. البلد غرقت. بالمناسبة اسلوب اجتماع المكاشفة دا اسلوب ما كويس ..وهو اعلان بشكل رسمي عن وجود ازمة او مشكلة. من يقولوا ليك المجلس يجدد الثقة في الجهاز الفني ..طوالي اعرف (ثقة) ما في. ثقة نهي. ومن يقولوا ليك في اجتماع مكاشفة ..اعرف طوالي في (غضغضة) وفي حاجات ما كويس بتحصل. وما في مكاشفة. في مكاشفة بعملوا ليها اجتماع. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). واضح ان غارزيتو يعيش في حالة انعدام وزن. حوار غارزيتو مع الشروق اثبت ذلك ..اثبت ان الاوضاع في المريخ غير مستقرة. غارزيتو قال امر استمراره مع المريخ في يد جمال الوالي. دي يعني شنو؟. فسروها براكم. وحاول غارزيتو ان يتلاعب على عواطف المريخاب عندما وعدهم بالبطولات الثلاثة…الافريقية والدوري والكاس. انت بتلعب في ميدان عقرب يا كوتش عشان تجيبهم التلاتة. غارزيتو في الاوضاع الطبيعية ما بوعد بهذه الوعود. لا بد ان غارزيتو شعر ان هناك تحركات ضده ..لذلك حسب ان يستعين بالجمهور فوعدهم بالكاسات الثلاثة. السنة دي كاس ما ح تشوفو ان شاءالله. ولا كاس السودان. شوف ليك حنك تاني..لقد نفد رصيدك. إلّا الخاتم. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). في الجانب الاخر يحسب لمجلس الهلال ..ونحن نبحث عن اشراقاته ونكتب عنها كما نكتب عن اخفاقاته..يحسب ليه ان الفريق خسر امام (التطواني) خسارة كانت موجعة لكن مع ذلك لم نسمع عن اجتماع مكاشفة. ولم نسمع عن تجديد الثقة في الجهاز الفني. هذه امور تحسب لمجلس الهلال بعد ان عان الهلال كثيرا في الموسم الماضي وفي بدايات هذا الموسم من عدم الاستقرار الفني. جاء الهلال وتعادل مع هلال كادوقلي تعادل صادم ايضا ولم نسمع كذلك عن اجتماع مكاشفة او تجديد ثقة. مكاشفة شنو دي حركات (زعزعة) ساكت ولعب على الاعلام. في الهلال امور ايجابية حصلت في هذا الجانب وتقدم ملحوظ من مجلس الهلال يحدث الآن ..استمرار الجهاز الفني ومنحه الثقة (الطبيعة) لا الثقة التى تمنح في (الاجتماعات) هي ما يمكن ان نحصد بها البطولات. يمكن عبرها ان نحقق الانتصارات. لا تشكلوا ضغط على (الكوكي) بهذه الصورة. اجتماع مكاشفة. وتجديد ثقة. بعد تعادل الهلال امام هلال كادوقلي اشاعوا في مواقع التواصل الاجتماعي من اجل نسف ااستقرار الهلال انباء عن الاطاحة بالمدرب التونسي نبيل الكوكي. الحفاظ على نبيل الكوكي …اهم من الفوز بالبطولات ..لن يحقق الهلال بطولة هذا الموسم اذا تم الاطاحة بالمدرب التونسي. طريقنا نحو البطولات لن يكن ممكنا إلّا عبر (نبيل الكوكي). مجلس المريخ اصلا مجلس (هش) ويمكن اي نتيجة سلبية تطيح بيه. رزاق ممكن يشيلو. ظل اعضاء مجلس المريخ يتنقلوا بين الاستقالات تقديم وسحب. على ما يبدو ان المجلس شعر ان الوضع خطير بعد خسارة المريخ في عطبرة. وقبل ذلك كان المريخ قد تعادل في كادوقلي. لذلك حاول مجلس المريخ ان يلحق الموضوع ويلمه بهذه (المسرحية) والعرض. قاموا عملوا شنو؟. قاموا عملوا اجتماع مكاشفة مع الجهاز الفني للمريخ ولاعبي المريخ وهذا اخطر ما يمكن ان يكون في هذا التوقيت. في هذا الوقت يجب ان يكون التعامل والتحرك بين اللاعبين فقط لدائرة الكورة والجهاز الفني. اي تدخل او تداخل من مجلس الادارة ومن رئيس نادي كمان يمكن ان يسبب (تصدعات) وضغوط على اللاعبين. عشاء الكاردينال الذي يقيمه للاعبي الهلال في بيته قبل المباراة ايضا امر غير محبب وغير مقبول. العشاء نفسه يمكن ان يشكل (ضغط) على اللاعبين. في مثل هذه الايام ..وقبل المباريات الصعبة يحتاج اللاعبين وجاهزهم الفني للتركيز. اي ضغوط من المجلس على اللاعبين او على الجهاز الفني يمكن ان يشكل عنصر سلبي على الفريق. ابعدوا الاداريين من فريق الكورة. تحركوا في مساحاتكم. مجلس الهلال يجب ان يستفيد من هذه الاخطاء التي يقع فيه مجلس المريخ. واضح ان مجلس المريخ فقد اعصابه. انعكس ذلك بوضوح على تصرفات المجلس واجتماع المكاشفة الذي كان بالامس مع الجهاز الفني واللاعبين. رزاق لو عارف المواضيع يمكن ان تصل لهذا الحد ما كان جاب ليه قون. هو قون واحد. ديل اتنين يا ود الناس. يعني الموضوع يستحق اجتماع مكاشفة. الحكم لو عارف (اجتماع المكاشفة) دا ..كان حسب ليكم اربع ضربات جزاء. …………. و اشراك محمد عبدالرحمن في مباراة مازيمبي مخاطرة. نحن محمد عبدالرحمن عاوزنو في دور الاربعة. في المجموعات ما محتاجين لي محمد عبدالرحمن. الوقت مازال مبكرا لاشراك محمد عبدالرحمن. يفترض اولا اشراك محمد عبدالرحمن في مباريات الممتاز ثم من بعد اشراكه في البطولة الافريقية. لا نريد ان نفقد محمد عبدالرحمن مرة ثانية. انظروا لي قدام. نيلسون اذا اكتملت جاهزيته يمكن ان يكون قوة حقيقية للهلال في مباراة مازيمبي. بس ما يلعب ويقوم يسافر تاني يوم. …………. السيدة (ل)..مطرة امس بتشبه (اخر ظهور) ليك. وققرّض على كدا.