دق الدلجة محمد عبد الماجد هسع ناس (بكري المدينة) ديل عاوزين ليهم (بودي قاردات) الزول وقت يكون (خايف) – خوفتو بتظهر ليك في (نغمة) الموبايل. في شارع بتلاوز منو. ما بتجي فايت فيه. خاصة لمن تمغرب. والناس كلامها يكتر في الشارع. يقولوا ليك الشارع دا فيه (كلب) صعب شديد. وفي الحقيقة الزول ما بخاف من (الكلب) – الزول بخاف من (الخُلعة). الخُلعة كعبة. خاصة لو كنت سارح. الجرسة ما حلوة…اصلو ما عندها (منطق) ما تقعدوا تمنطقوها لينا ساكت يا ناس المريخ. بعدين (الحنكشة) دي ذاتها ما خايلة فيكم؟. عاوزين تتحنكشوا في اخر عمركم – وتعملوا ليكم افراد حراسة. بودي قاردات. الكلام البتعملوا فيه دا احسن منو (الجري) عديل كدا. انطلقوا في الهواء الطلق دا. انتوا قالوا ليكم إلّا (زيكو) يشيل الكورة ويتخارج؟. ما شرط. ما ضروري. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الطالب الما قاعد يذاكر …بتلقاهو اول شيء بعملها وقت يدخل غرفة الامتحانات بيطلب يجيبو ليه (موية). بعمل فيها (عطشان). وكل ما الامتحان كان صعب – طلبات الموية الباردة بتكتر. قبل جرس الامتحان ما يبدأ – يرفع ايدو ..ويقول عاوز ليه (موية). في طلبة كانوا بتلتوا (الفراشات) ساكت..وبعذبوهن بي طلبات الموية. كل سؤال بي (جردل). بس دا الفالحين لي فيه. عاوزين (موية). وبعدين في النتيجة تلقاهم جابوا خسمة في المادة التى امتحنوها. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). في الايامات الماضية تابعنا (تصدعات) الاحداث في المريخ …(رجفيبة) مبالغ فيها. زلازل. رياح عاتية. زوابع رعدية. جرسة من الصباح. طق الكواريك. جقليبة. كل انواع (الجرسة) المستحدثة الآن موجودة في المريخ. بي تفاصيلها. الحاصل شنو يا جماعة ؟…مالكم بتفرشوا قبل الزول ما يموت؟. اصبروا – الفراش لاحق. موش مرات في ناس …(جدهم) قبل ما يغادر الحياة …تلقاهم ركبوا ليك الصيوانات ..وفرشوا ليك الارض. ودوروا ليك في (التلج). وطلعوا ليك (كراسة) الكشف. جابوا ليهم زول – لابس ليه نضارة سوداء ..قعدوه ليك في تربيزة في ركن ظاهر من الصيوان. مسك الكشف. وهم فيما بناتهم بقولوا ليك الزول دا ما اظن يعيش. مرضو دا مرض موت. زول الموت ظاهر. من تمشي ليه – وتلقاه (مشلق) غرب في العنبر …اقنع منو. اعرفوه بموت. من الزول ما يشتغل بالموبايل ..اعرفوه زول موت. خلاص بقى يفكر بعيد. ما زول حياة – اصلو. لو عندكم ولاد خفاف كدا .. احسن رسلوهم المقابر. الموت من الحياة ما معروفة. وكلنا ماشيين. كلنا مغادرين. ما في حاجة دائمة. الزمن دا الواحد لو ما مات من المرض – بموت ليك من العلاج. مرات يكتبوا ليك (علاج) يجيب خبرك تاني يوم طوالي. يكون ما عندك اي شيء. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ناس المريخ جرستهم من (مازيمبي) فاتت بي غادي. وصلت اخطر مستوى. الولاية في الخريف ومع السيول ما بتعمل البعملوا فيه ناس المريخ ديل. المريخاب عايشين ليك في حالة من (الهلع) والارهاب ..ما بعلم بيها زول. حالة اخير منها (الجري). الجري العديل دا. لو بتجروا عديل كدا – ما بتعملوا في البتعملوا فيه دا. انتوا قايلين البتعلمو فيه دا ؟ – عندو فرق من (الجري). الكلام البتعملوا فيه دا لو حولتوه (جري) – كان هسع وصلتو (الحبشة). كان مرقتو من (البلد). والله البتعملوا فيه دا ..فريق (هابط) من الممتاز ما بعملو. يمكن الجماعة ديل عشان (جداد) في المرحلة دي. ويمكن الشعور بالغربة هو المسيطر عليهم. اول مرة يلعبوا مع مازيمبي في المرحلة دا. المريخاب قال شنو؟..قالوا ح يرسلوا ليهم (اختصاصي) تخدير ..عشان يفحص ليهم (الهوا) بتاع المكيفات. يا جماعة في (هلع) قدر دا. مكيفات شنو كمان؟. انتوا ماشيين سياحة؟. تنس؟. هسع ناس (امير كمال) عاوزين يلعبوا ليكم في الاوضاع دي. اللاعب يكون في غرفتو ما واثق من (المكيّف) بتاعو. بنومو كيف ديل …والمكيفات بتشككوا فيها للدرجة دي. قالوا ليك (العجورة) في معسكر المريخ بفحصوا ليها (120) مرة. خايفين يكون فيها (مخدر). البصلة (150) مرة. موية الصحة (170) مرة. اتخيلوا في ظل هذه الحرب النفسية ..ناس بكري المدينة يقدروا يقدموا ليكم حاجة. الجماعة انتهوا. انتوا في (المكيّف) ما واثقين. المريخ اتهزم (نفسيّا). وسيدخل للمباراة وهو في حالة (فقدان) تام. ناس مازيمبي ديل قالوا ليك في (التسخينة) عندهم (بخة) بعملوها للفريق المنافس ..بتنتهي ليك منو. الخمسة بتقع طوالي. اقل شيء خمسة. دا لو ما وصلت (سبعة). هسع انتوا عليكم الله في الكنغو ح تحرسوا لي ناس (سماتا) وإلّا ح تحرسوا لي (المكيفات). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). اغرب من هذه الاشياء ..وفي تصرف اغرب من (الغرابة) ذاتها…قالوا ليك امس حسب الصور والاخبار : (أوفد مجلس المريخ عدد من الافراد المتخصصين في الحراسات الامنية (بودي قاردات) الى بعثة المريخ المتواجدة الآن بالكنغو..وبحسب ما ذكر عدد من محبي المريخ على مواقع التواصل الاجتماعي فقد بعث المريخ بهؤلاء الافراد من احدى الشركات الأمنية ..وسيقوم (البودي قاردات) بحراسة بعثة المريخ ومرافقتها في حلها وترحالها طوال فترة تواجدهم بالعاصمة كنشاسا ومدينة لويمباشي الى حين عودة البعثة الى السودات..يذكر ان الشركة الأمنية في مجال حراسة الشخصيات الهامة والدستورية في السودان والوفود الزائرة وتأمين المؤتمرات الدولية والاقليمية ولها خبرات واسعة في هذا المجال). الكلام دا في هوليوود؟. في رأفت الهجان؟. في مهمة في تل ابيب؟. دا شنو البتعملوا فيه دا؟. انتوا جنيتوا. بودي قاردات …انتوا قايلين ناس بكري المدينة ديل ناس سلمان خان. شورخان. امير خان. الوهم دا شنو؟. بكري المدينة. امير كمال. علاءالدين يوسف. ديديه. ديل عاوزين ليهم (بودي قاردات). ديل تاني ما بلعبوا ليكم كورة. قول حرستوهم برة الملعب. البحرسهم من ناس كيديابا منو؟. الظريف في المواقع جايبين ليك صور (البودي قاردات)..يستعرضوا في عضلاتهم – تقول ح يلعبوا هم. ديل كان تودوهم فلسطين. طيب انتوا ناس معصب عمر عاوزين بيهم شنو؟. طه سليمان – خلى البودي قارد …انتوا جايبين ليكم بودي قاردات لي بكري المدينة. بكري المدينة بقى زي (مدير البنك). حليل الكورة. وحليل المريخ. السبعة بدأت من هنا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……. و في الايام الماضية ..في يوم العيد ..رحل ابراهيم الزومة – افضل من قدم (الصورة) قبل التلفزيونات. افضل من قدم النكتة والطرفة قبل (الواتس اب). زحمة الاحداث ..وربما لخبطتها منعتنا من ان نكتب عن كاميرا ابراهيم الزومة. اخطر زول بنقل ليك الحالة بدون ما يحركها. بنقلها ليك بالشبه. ابراهيم الزومة كان حكاية براهو. نسأل له الرحمة والمغفرة ..وان يجعل الجنة مثواه. فقد كان الراحل مهموم بالفرحة ..وتوزيع الضحك …كان اول وكيل للضحكة في السودان. وسائل الاعلام – وكلنا قصرنا في حق الراحل ابراهيم الزومة. سوف نعود لنكتب عن الراحل – بعد ان نتملك الى ذلك سبيلا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………. السيدة (ل) – ما دفقي (ضل المقيل) من ما تشرق الشمس. وقرّض على كدا.
