بالعربى الكسيح محمد الطيب الأمين الكاردينال (نايم) وعماد الطيب (يشخُر) إنابة عنه !!
* في تاريخ (الإنسانيه والبشريه) ليس هناك صفه تعيب الرجال وتخصم من (مقاماتهم ومكانتهم) أكثر من (الكذب) .. * ولعظمة جريمة الكذب وما يترتب عليها من (ويلات ومعاصى) فأن حبيبنا الرسول الكريم صل الله عليه وسلم اثبت ان المسلم يفعل كل شي ولكنه لا يكذب .. * والذى يكذب على الناس إذا (تاب) وأصبح صادقا فمن حق الناس ان لا تصدقه حتى وهو في قمة صدقه .. * وأنا أخشى ان اتهم مجلس الهلال ب(الكذب) ، ولكن لا أخشى ان أقول : هذا مجلس غير صادق .. * والذى لا يصدق في عمله ولا في قوله قطعا ستكشفه الأيام مهما كانت درجة جودة (القناع) الذى يرتديه فيخدعنا به .. * أولا : نثبت للكاردينال قدرته الماليه الكبيره ، وقطعا هو واحدا من (اغنى) الذين جلسوا على (الكرسي الرئاسي) .. * والثراء الذى يتمتع به الكاردينال لم يبخل به على الهلال وما تم من عمل في (الجوهره الزرقاء) يؤكد ان الكاردينال (كريما) دفع من جيبه حتى (بانت نواجز الجوهره) .. * وربما العمل في الجوهره الزرقاء (يغفر) للكاردينال جملة من الخطايا حتى إذا تمت الجوهره كتب التاريخ اسم الكاردينال بحروف من ذهب .. * ولكن .. * عطاء الكاردينال هذا يقابله فشل في جوانب اخرى من شأنها ان تجعل الهلال صغيرا في نظر المحيط العربى والافريقي قبل المحيط السوداني .. * ومن أهم الجوانب التى فشل فيها الكاردينال هى (شرف الكلمه) وهذا حسب تقديري هو (مخ الفشل) .. * (جوهر الفشل) هو ان لا تصدق مع الناس حتى وإن كانت هنالك اسباب حالت دونك والصدق فهذا لا يعفى انك قد سقطت في (شرف الكلمه) .. * وقبل ان اسرد بعض الجوانب غير الجيده في مسيرة الكاردينال ومجلسه (غير الشجاع) ابدأ من حيث إنتهى (الكوكى) .. * والكوكى للامانه فشل في ان يصحح صورة المدرب العربى والمدرب التونسي المهزوزه امامنا منذ سنوات .. * والفشل المقصود هنا ليس فشلا فنيا وإنما فشل يتعلق بالجانب الاخلاقى عند المدرب العربى والمدرب التونسى على وجه التحديد .. * ولعل للهلال تجربه اخلاقيه مع سفيان الحيدوسي في مباراتنا امام الترجى ، وهى تجربه تشبه تجربه المريخ مع غارزيتو فيما يتعلق ب(الريحه) التى صاحبت مباراة الاحمر مع مازيمبي بالكنغو وتحدث عنها الاعلام متهما غارزيتو ب(البيع) .. * الكوكى فشل في تصحيح الصوره التى طبعها الحيدوسى وذهب في ذات الدرب ولكن بسناريو وطريقه مختلفه .. * بعيدا عن مرض (والدته) أنا أقول ان الكوكى هو (شخص غير محترم وكاذب) والذين يجملون وجه الكوكى الآن هم ايضا يكذبون علينا .. * الذى ورد في الاخبار ان الكوكى غادر إلى تونس من اجل (الاطمئنان على صحة والدته المريضه) .. * وقد حدد الكوكى ان زيارته لمعاودة والدته تستهلك (72) ساعه يعود بعدها ليجهز الفريق لخواتيم الدورى .. * هذا حديث مفهوم ولا غبار عليه .. * الكوكى الذى وصل تونس صباح الخميس ظهر في القنوات نهار الجمعه وهو (يمضى عقدا) لصالح النادى الافريقي مدربا لفريقهم .. * وهنا السؤال : هل كان من شروط (العافيه للوالدة) ان يقبل الكوكى تدريب الافريقي ؟؟ أم ان الكوكى ذهب ووجد والدته قد بلغت الصحه فأنخرط في (مصالحه الشخصيه) ونسى الهلال ؟؟ * مرض والدة الكوكى ليس جديدا فهى مريضه قبل شهر وزياده وقد عاودها الكوكى عقب مباراة سموحه .. * كما ان الكوكى لم يكتشف اليوم انه (الولد الوحيد عند أمو) عشان يقول لينا (ظروف الحاجه ما بتسمح وانا الولد الوحيد في البيت) .. * ده كلام فارغ .. * الكوكى ذهب لتونس بعد ان اكمل التفاوض مع الافريقي من الخرطوم وناس (عماد الطيب نايمين نوم) .. * نايمين يا عماد .. * لجنه الاستئنافات تفعل بنا ما تفعل وناس عماد نايمين ، والكوكى يعمل العايزو وناس عماد نايمين ، وبكره مكسيم يعمل العايزو وناس عماد نايمين .. * لا احد يشك في ان والدة الكوكى مريضه ، ولكن هل مرض والدة الكوكى وسفر الكوكى الى تونس بالخميس وإقالة مدرب الافريقي بالخميس وتوقيع العقد بالجمعه هل كل هذا تم مصادفه ؟؟ * هل الصدفه هى وحدها التى جعلت والدة الكوكى تمرض ، والكوكى يسافر ، والنادى الافريقي (يقيل) المدرب ويتعاقد مع الكوكى ، هل ده كلو تم بالصدفه يا عماد الطيب ؟؟ * الاسوأ من هذا كله هو بيان مجلس الهلال الذى قال فيه ان المجلس على علم بالعقد الذى وقعه الكوكى ، وقال البيان : الكوكى ارسل رساله (مؤثره) للكاردينال وارسل رساله (ما مؤثره) في إيميل النادى .. * رساله الكوكى (ده لو صحى رسل رساله) رسالتو دى كان ممكن تكون مؤثره ومقبوله لو إنحصرت فيما يتعلق بمرض والدته .. * لو الكوكى رسل رساله وقال إنو هو ماشى مع والدتو الاردن او لندن وما ح يقدر يواصل مع الهلال تبقى دى رساله محترمه جدا .. * لكن كونو الكوكى يقول : انا أمى عيانه ووقعت عقد مع الافريقي وما بقدر اجيكم دى اسمها (قلة الأدب) .. * قلة أدب عديل يا الكاردينال ولو ما عارف اعرف .. * الكوكى لو محترم صحى كان يأخر التوقيع على العقد لحدى ما يجى راجع السودان ويجتمع مع المجلس ويعمل مخالصه وبعد داك يقول انا امى عيانه وداير استقر في تونس ومن ثم يفكر في (العروض) التونسيه .. * لكن زول يوم الاربعاء كان معانا ويوم الجمعة وقع عقد يبقى كيف الزول ده سافر لمرض والدته وهو بعد 24 ساعه من سفره وقع العقد ؟؟ * ده مدرب ما احترم الهلال لانو هو في الاصل مدرب ما عندو اخلاق .. * والكاردينال وعماد برضو ما احترمو الهلال .. * ودى زي قصه ذهاب بكرى للمريخ .. * بكرى لما مشى المريخ مجلسنا الضعيف ده طلع بيان قال فيه : (الهلال يعلن عدم التجديد لعمر بخيت ومهند ومعز) .. * قالو كده خوفا من ذهابهم للمريخ على طريقه بكرى .. * ولما مهند رفض يمشى المريخ قامو ناس عماد تانى إتصلو بيهو .. * كلو كضب في كضب .. * والله العظيم بسبب الكضب ده الهلال لا يسجل ولاء الدين ولا يحافظ على مكسيم ولا يسجل ابو عقاله ولا ح يقدر يطلع قرار بخصوص سخف لجنة الاسئنافات .. * ح يكونو قاعدين كده .. الكوكى يغشهم ، والاشاعات تطارد مكسيم والضبابيه والغموض تكتنف كل شي في الهلال .. * وبالطريقه دى الامور ما بتمشى .. * وكونو الهلال يتنازل عن (حقوقه) في كل شي هذا سيجعل (الكل) يطمع في الهلال .. * قبل اليوم ما كان الهلال (هينا) لدرجة تجعله يفرح بالتعادل امام انديه الممتاز .. * كانت لنا قوة (جوه الميدان وبره) .. * كنا بندخل الاستاد وإحنا (ضامنين الفوز بالخمسه والسته) .. * والسنة دى يا الكاردينال فرحنا بالتعادل في بعض المباريات .. * تعادلنا في (8) مباريات كانت كفيله بأن تحيلنا للوصافه مبكرا ولكن لان المريخ (سجمان ورمدان) حافظنا على الصداره .. * قدم الهلال موسما للنسيان هذا العام وكان يلعب باسمه وقوه حناجر جماهيره .. * كان الهلال بدون شكل وبدون ملامح ، يجتهد لاعبوه في بعض المباريات ولكنهم يعودو للهوان في مباريات اخرى .. * رغم تواضع الهلال لم نتحدث عنه بسوء لان قناعتنا كانت (الفريق في مرحله بناء وتشييد) .. * قلنا ما مشكله ، ظروف تغيير الجلد والعناصر الجديده .. * إستحملنا ضعف الهلال في الملعب ولكن لن نستحمل ان يكون الضعف والهوان (داخل وخارج المعلب) .. * لجنة الاستنئافات الان ذبحت القانون من الوريد للوريد وناس عماد الطيب (بتلفتو) وما عارفين يعملو شنو .. * الكوكى (داس ورقة عقده مع الهلال بالجزمه) ووقع عقد مع الافريقي تحت ستار (مرض أمو) وناس عماد الطيب بتلفتو .. * وعماد هو الذى بشرنا بشكوى (فيتا كلوب) والكاردينال هو الذى قال : (أنا لو أخلى الهلال ما بخلى بكرى) .. * وين شرف الكلمه ووين حقوق الهلال يا اولاد الحلال ؟؟ * حاليا الهلال عندو (30) ألف دولار بطرف الكوكى عباره عن شرط جزائي يجب ان يدفعها ولا كتر خيرو .. * التعاطف والمجامله والطيبة الزائدة تجعل الاخرين (يتبولُون على رؤسنا) .. * إحنا في (الإنسانيه) وتقدير ظروف الناس العالم ده كلو بيشهد لينا لكن كمان حركة الكوكى بايخه .. * يجب ان يدفع الكوكى الشرط الجزائي وعلى الهلال من بعد ذلك ان يسلم والدة الكوكى مبلغ عشره ألف دولار مساهمه في العلاج .. * بس هو يدفع الشرط الجزائي عشان ما يفتكر إحنا طير .. * معقولة زول يسافر الليله لوالدته في (العنايه المكثفه) يقوم يطلع من المستشفى يمشى يعمل مؤتمر صحفى ويوقع عقد ؟. * الكلام ده يا الكاردينال لو إنت صدقتو إحنا ما بنصدقو .. * الزول ده (ظبط أمورو) من السودان ومشى (زول توقيع) .. * وما دايرين معاهو اى تعاطف .. * والكلام ده ما عشان الكوكى هو (مورينهو) ولا عشان هو (منقطها) ولكن عشان يعرف من هو الهلال .. * رأينا في الكوكى انه مدرب جيد ولكن ما قام به (قلة ادب) .. * يبقى امام الكاردينال الآن تلاته حاجات .. * لجنة الاستئنافات والكوكى والتسجيلات .. * ولو الكاردينال ما قادر على الموضوع يبقى من الأفضل يتحول ل(قطب) ويترك المجال لرئيس (قوى الشخصيه وصادق الكلمه وشجاع وما بجامل في حقوق الهلال) .. * وانا والله المزعلني إنو الكاردينال زول انجز إنجاز في طريقه إلا ان يصبح غير مسبوق ومع ذلك ما قادر يفرض شخصية الهلال .. * لما تجى تقيس الكاردينال بعدد من الرؤوساء من حيث العمل وتحديدا المنشأت فهو افضل من كل المجالس التى تعاقبت في السنوات الاخيره بما فيهم القطب المريخى صلاح ادريس .. * ومع هذا كله الكاردينال يفرط في حقوق الهلال .. * وهذا التفريط سيشجع آخرين على سلب حقوق الهلال (نهارا جهارا) ، والآخرين ممكن يكونو لاعبين او مدربين او اتحاد عام . * مطلب من الكاردينال ان يكون صادقا اكثر وان يعلم انه يقود شعب وليس ناديا ، وإذا انصلح الكاردينال سينصلح (عماد الطيب الشهير بى فيتا كلوب) وذلك لان عماد في الاصل لا يقول ولا يعمل إلا ما يأمر به الرئيس .. * و..و.. * ونواصل غدا ..
