دق الدلجة محمد عبد الماجد لجنتكم دي صباع (امير) ما بتقدر تعيدوا ليكم الذين يحدثوننا عن المؤسسية والقانون واهلية الحركة الرياضية ، عليهم ان يصمتوا قليلا. يسكتوا شوية. قرفنا. عليهم ان يتدبروا الواقع قليلا. نفسنا مرقت. اذ اختص الله بعض الناس بالحديث عن (اهلية الحركة الرياضية) في مثل هذه الايام والمواقف. وليس لهم من (اهلية الحركة الرياضية) إلّا الحديث عنها. الذين يحدثونا عن ذلك ..ويسخرون من (الجودية) ولجنة المساعي الحميدة التى تضم اعلى المريخاب قامة ومعرفة محمد الشيخ مدني وعبدالباسط سبدرات – عليهم ان يحدثوننا قليلا عن (لجنة تسيير) المريخ. ماشيين بعيد مالهم؟. هذه (افتراضية) – وطلب عادي جدا. لكي تستوعبوه اعتبروه (طلب فحص). افتوا لنا في الامر. لجنة يتم الاعلان عنها قبل ايام ويستقيل بعد اقل من (48) ساعة من تكوينها نائب رئيسها. في اللجان الشعبية ما بحصل كدا. ناس المريخ ذاتهم بقوا ما بيستحملوا المريخ لمدة (48) ساعة. اهلو رفضوه. ونائب رئيسها ذلك – (اي لجنة التسيير) ..ليس رجل عادي ولا مشجع من منازلهم ..نائب رئيس لجنة تسيير المريخ هو مدير الجمارك (السابق) اللواء سيف الدين عمر. ما علاقة منصب في لجنة تسيير المريخ..بمنصب سيادي وحكومي ..اذ استقال اللواء سيف الدين عمر بعد ان تم اعفائه من منصبه كمدير للجمارك. العلاقة الاعفاء والاستقالة شنو؟. في زعل؟. هل هناك ارتباط بين المنصب العام ..ولجنة تسيير المريخ. النفط – النفط – النفط. كمان عاوزين تتموها (جمارك). خلاص البترول خلص ..قبلتوا على (الجمارك). عاوزين يجمروكها. لا احد في المريخ يتحدث عن ما يحدث في لجنة التسيير ..كلهم يتحدثون عن لجنة المساعي الحميدة بما في ذلك محمد سيد احمد الذي تخصص في الشأن المريخي واصبح يدافع عنه اكثر من عبدالقادر همد. كنت سوف اقول الفريق طارق محمد عثمان ..لكن الفريق طارق تم الاطاحة به من مجلس المريخ ..ليلحق ب (تراوري). وايهاب زغبير. وقبل ذلك هيثم مصطفى الذي فضل الجلوس في بيته موسم كامل بدلا من المواصلة مع المريخ. والفريق طارق يحدثنا عن المدرب الهارب. الفريق طارق اخر تصريح له وهو وفي مجلس المريخ قال نحن ما عندنا مدرب هارب. والمجلس كله هرب. اخر ظهور متين لي جمال الوالي؟. اخر ظهور متين لي عادل ابوجريشة؟. كان وقفت على المدرب هينة. ولجنة تسيير المريخ التى لم يمض عليها اكثر من (72) ساعة من تعيينها لحق بنائب رئيس اللجنة اللواء ياسر حسن عثمان امين المال ومدير شركة الهدف . لتبقى اللجنة بدون نائب رئيس وبدون امين خزينة – عزيزي الفريق طارق. هل يجوز بعد ذلك سيادة الفريق طارق (الامين العام) السابق لمجلس المريخ السابق ان نقول ان اللواء سيف الدين واللواء ياسر حسن عثمان هربوا من المنصب والمسؤولية. الكوكي اعذروه ..اذا الاستقالة بتأتي من اسماء سودانية بهذا الحجم وبعد اقل من 72 ساعة. بعد هذا ألا يحق لنا ان نسأل ما الفرق بين لجنة التسيير تلك ومجلس المريخ السابق ..فقط استتقال نصف ضباط اللجنة في خلال (72) ساعة. لجنة التسيير التى استقال نص ضباطها ..نعرفها كيف من مجلس المريخ السابق. كلهم تجمع بينهم (الاستقالة). اي تخبط هذا ..واي استهتار بالقاعدة المريخية والرياضية عامة؟. تخيلوا بعد كل هذا يستنكرون ان تحل الامور ب (الجودية). اي قانون تريدون ان يعملوا به في الوسط الرياضي. من حقنا ان نسأل ألم يتم مشاورة اعضاء اللجنة لتتم استقالة نائب الرئيس وامين المال خلال (72) ساعة. ليتكم بعد هذه الوقائع ان تعرفوا كيف يدار النشاط الرياضي …والى اي منقلبا وصلنا في تراجعنا الاداري. وبرفضوا (الجودية). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). المريخ اصلا كراعه حارة. اليوم التاني من اعلان لجنة تسيير المريخ تم اعفاء اللواء سيف الدين عمر من منصبه كمدير للجمارك. حرة زي دي ما لاقتنا. ان شاءالله ناس لجنة الاستئنافات يتعلموا من الدرس. كراع المريخ الحارة معروفة. ديل كانوا معسكرين في مصر ..محمد حسني مبارك كان قاعد في امان الله. 30 سنة ما في زول قادر يقول ليه حاجة. الشعب المصري يمشي في العجين ما يلخبطوش. عندما عسكر المريخ في مصر – تمت الاطاحة بالرئيس المصري محمد حسني مبارك – وعاوزهم ما يطيحوا بيك سيادة اللواء سيف الدين. الشعب كلو طلع ميدان التحرير. ديل اطاحوا بي محمد حسني مبارك بعد (30) سنة من التمكين في مصر. كراع المريخ الحارة وصلت ليبيا. المريخ عسكر في ليبيا ..الثورة الليبية ولعت. اسبوع – شهر ..القذافي لقوه مختفي في (خور). هي حصلت. القذافي بعد اكثر من اربعين عام ..كراع المريخ الحارة ..شالتو برة. اخطر من ذلك ..المريخ مرة كان بيلعب في دورة في الامارات ..اتخيلوا حصل شنو؟. الملك مات. تاني يوم رجعّوا ليك المريخ طوالي. ولو ما المريخ رجع سريع ..الحوثيين كانوا عملوا اكتر من كدا. الحمدلله وقفت هنا. اللواء سيف الدين عمر …من 6 اغسطس 2008 كان مديرا للجمارك …تتخيلوا ما شالوه من المنصب إلّا بعد ان تم تعيينه في لجنة تسيير المريخ. قلنا ليك ابعد من لجنة التسيير…ما سمعتوا كلامنا. مدير شركة الهدف عرفها ..غادر من بدري. التانين مفروض يعملوا حسابهم. المريخ دا (كراعو) حارة. بكري المدينة دي بلعب زي الطلقة في الهلال ..مرات بشيل جائزة (الطالب المثالي) – لو طلع ليه (سكين) الموضوع بتعالج في البيت الهلالي. بكري المدينة هسع عاوز ينسف الموسم الرياضي …في اول مبارياته في المريخ ضارب ليه حكم بونية. كراعهم حارة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بالمناسبة في واحد من ناس المريخ ذاتهم ..(لكن زول حقاني). زول شاف اسماء اعضاء لجنة التسيير…الموضوع ما عجبو ..قال بالله نحن (اللوردات) ما صمدوا عندنا ..يصمدوا ديل. بعد شوية كلام المريخابي طلع صاح – الاستقالات دورت. مرة نائب الرئيس. ومرة امين المال. المريخابي (الاستقالات) كترت عليه ..قال والله يا جماعة اللجنة دي (صباع امير) ما تقدر تعيدوا لينا …انتوا منتظرنها تعيد ليكم (امير كمال). يا جماعة انتوا بتتكلموا كيف؟. لجنة 72 ساعة ما قادرة تصمد ..عاوزة تصمد ليكم مع الكاردينال الذي حسم موضوع ولاءالدين قبل شهرين ونص من التسجيلات. ودفع في الجوهرة الزرقاء 60 مليار جنيه. يا كاردينال …السوق كشف ..نحن كنا بنقول ليك امير كمال دا لغاية سبعة مليار ما كعب – لكن بعد لجنة التسيير دي (400) مليون جنيه كتيرة فيها. ما تدفعوا اكتر من كدا. لجنة (امين مال) ما فيها – يعني ح تشتغلوا لي (تحويل رصيد). الموضوع واضح. وظاهر. وما عاوز ليه اي لجنة استئنافات. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الزول وقت كراعو تكون حارة من (الجمارك) يشيلوه. ………….. و يحسب لقناة الشروق ..المعد العشاي والمقدم معتصم محمد الحسن انهم بتكلموا عن موضوع سكتت عنه الفضائيات الاخرى. قناة الشروق قدمت تقرير لمباراة الهلال والامل في كاس العدالة. وتحدثت عن ذكري ثورة اكتوبر في التقرير. قضية الهلال يجب ان تخرج للفضاء الطلق ..عشان يشوفوا الغلطان منو؟. الاتحاد العام يجب ان تفضح (فضائحه) التى ارتكبها باسم القانون. موقف الاتحاد ولجنة الاستئنافات إلّا يتموا ليكم محمد سيد أحمد (جوطة) ساكت. لكن ما عندهم قانون. قبل ذلك ظهر سمير فضل مع خالد عزالدين في قناة الملاعب في شكل يجعلنا نقول ان لجنة الاستئنافات قانون المرور من قانون السموم ما بتعرفو. ديل نسفوا الموسم. وقعدوا يتفرجوا. خربوها وقعدوا على تلها. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………… السيدة (ل) – (المطرة) ما عندها علاقة بي الشيء البتعمل فيه لجنة الاستئنافات دي. وقرّط على كدا. � � � حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore
