سودارس : لجنة تسييركم دي إلا تموها (صينيين)

حادثت محمد محمد خير!! هل محمد خير جدل التعين واحقاد الطامعين!! دقلو أبو بريص أكثر من 80 "مرتزقا" كولومبيا قاتلوا مع مليشيا الدعم السريع خلال هجومها على الفاشر كامل إدريس يلتقي الناظر ترك ويدعو القيادات الأهلية بشرق السودان للمساهمة في الاستشفاء الوطني شاهد بالفيديو.. بلة جابر: (ضحيتي بنفسي في ود مدني وتعرضت للإنذار من أجل المحترف الضجة وارغو والرئيس جمال الوالي) حملة في السودان على تجار العملة اتحاد جدة يحسم قضية التعاقد مع فينيسيوس إيه الدنيا غير لمّة ناس في خير .. أو ساعة حُزُن ..! من اختار صقور الجديان في الشان... رؤية فنية أم موازنات إدارية؟ المنتخب المدرسي السوداني يخسر من نظيره العاجي وينافس علي المركز الثالث الاتحاد السوداني يصدر خريطة الموسم الرياضي 2025م – 2026م إعلان خارطة الموسم الرياضي في السودان غنوا للصحافة… وانصتوا لندائها ترتيبات في السودان بشأن خطوة تّجاه جوبا توضيح من نادي المريخ حرام شرعًا.. حملة ضد جبّادات الكهرباء في كسلا تحديث جديد من أبل لهواتف iPhone يتضمن 29 إصلاحاً أمنياً شاهد بالفيديو.. بأزياء مثيرة وعلى أنغام "ولا يا ولا".. الفنانة عشة الجبل تظهر حافية القدمين في "كليب" جديد من شاطئ البحر وساخرون: (جواهر برو ماكس) امرأة على رأس قيادة بنك الخرطوم..!! ميسي يستعد لحسم مستقبله مع إنتر ميامي تقرير يكشف كواليس انهيار الرباعية وفشل اجتماع "إنقاذ" السودان؟ محمد عبدالقادر يكتب: بالتفصيل.. أسرار طريقة اختيار وزراء "حكومة الأمل".. وحدة الانقاذ البري بالدفاع المدني تنجح في إنتشال طفل حديث الولادة من داخل مرحاض في بالإسكان الثورة 75 بولاية الخرطوم "تشات جي بي تي" يتلاعب بالبشر .. اجتاز اختبار "أنا لست روبوتا" بنجاح ! "الحبيبة الافتراضية".. دراسة تكشف مخاطر اعتماد المراهقين على الذكاء الاصطناعي الخرطوم تحت رحمة السلاح.. فوضى أمنية تهدد حياة المدنيين المصرف المركزي في الإمارات يلغي ترخيص "النهدي للصرافة" أول أزمة بين ريال مدريد ورابطة الدوري الإسباني أنقذ المئات.. تفاصيل "الوفاة البطولية" لضحية حفل محمد رمضان بزشكيان يحذِّر من أزمة مياه وشيكة في إيران لجنة أمن ولاية الخرطوم تقرر حصر وتصنيف المضبوطات تمهيداً لإعادتها لأصحابها انتظام النوم أهم من عدد ساعاته.. دراسة تكشف المخاطر مصانع أدوية تبدأ العمل في الخرطوم خبر صادم في أمدرمان اقتسام السلطة واحتساب الشعب شاهد بالصورة والفيديو.. ماذا قالت السلطانة هدى عربي عن "الدولة"؟ شاهد بالصورة والفيديو.. الفنان والممثل أحمد الجقر "يعوس" القراصة ويجهز "الملوحة" ببورتسودان وساخرون: (موهبة جديدة تضاف لقائمة مواهبك الغير موجودة) شاهد بالفيديو.. منها صور زواجه وأخرى مع رئيس أركان الجيش.. العثور على إلبوم صور تذكارية لقائد الدعم السريع "حميدتي" داخل منزله بالخرطوم إلى بُرمة المهدية ودقلو التيجانية وابراهيم الختمية رحيل "رجل الظلّ" في الدراما المصرية... لطفي لبيب يودّع مسرح الحياة زيادة راس المال الاسمي لبنك امدرمان الوطني الي 50 مليار جنيه سوداني وفاة 18 مهاجرًا وفقدان 50 بعد غرق قارب شرق ليبيا احتجاجات لمرضى الكٌلى ببورتسودان السيسي لترامب: ضع كل جهدك لإنهاء حرب غزة تقرير يسلّط الضوء على تفاصيل جديدة بشأن حظر واتساب في السودان استعانت بصورة حسناء مغربية وأدعت أنها قبطية أمدرمانية.. "منيرة مجدي" قصة فتاة سودانية خدعت نشطاء بارزين وعدد كبير من الشباب ووجدت دعم غير مسبوق ونالت شهرة واسعة مقتل شاب ب 4 رصاصات على يد فرد من الجيش بالدويم دقة ضوابط استخراج أو تجديد رخصة القيادة مفخرة لكل سوداني أفريقيا ومحلها في خارطة الأمن السيبراني العالمي الشمالية ونهر النيل أوضاع إنسانية مقلقة.. جرائم وقطوعات كهرباء وطرد نازحين شرطة البحر الأحمر توضح ملابسات حادثة إطلاق نار أمام مستشفى عثمان دقنة ببورتسودان السودان.. مجمّع الفقه الإسلامي ينعي"العلامة" ترامب: "كوكاكولا" وافقت .. منذ اليوم سيصنعون مشروبهم حسب "وصفتي" ! بتوجيه من وزير الدفاع.. فريق طبي سعودي يجري عملية دقيقة لطفلة سودانية نمط حياة يقلل من خطر الوفاة المبكرة بنسبة 40% عَودة شريف لماذا نستغفر 3 مرات بعد التسليم من الصلاة .. احرص عليه باستمرار

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

لجنة تسييركم دي إلا تموها (صينيين)

قوون نشر في قوون يوم 27 - 04 - 2013

قالوا الصحافة طيرت (مدراء البنوك) من المريخ.. مدراء وإلا شيكات البطيروا في (24) ساعة ديل

الصحافة في دول العالم المتقدمة ...جعلت (حكومات) تتدحرج ..وتسقط.

تلاشات حكومات كاملة بسبب (كلمة) اوردتها الصحافة ...جعلت سقوطها حتمي.

كشفت فساد ..وعرت امبراطوريات كانت مبنيّة من (الوهم)..والخداع والغش.

هذا دور الصحافة في العالم كلو ...(لو انتوا ما عاجبكم الكلام دا اعلموا ليكم كافتريات او منتزهات او حتى كوافير).

الصحافة اصلها كدا.

كم من وزير كبير ..استقال بسبب ما كشفته الصحافة عنه ، وما كتب فيه ...وكم من مسؤول (يهز ويرز) اقيل وقعد في بيته بسبب حملات صحفية عرضت فساده.

ديل عاوزين يعوّسوا في الارض فسادا ..وما عاوزين زول يقول ليهم حاجة...(زي كأنو فسادهم هذا بر وتقوى وخير).

يا عم روح ..(دا ما بتلقوه هنا).

الغلط غلط ...والصاح صاح ..وما اظن ان الصحافة قادرة على ان تحول (الصواب) الي (الخطأ)...كما انها تعجز تماما من ان تفعل العكس.

لكن الناس البيوتها من قزاز ..دائما ما تهتز ..وتتساقط ...وتخر على الارض ..اذا شعرت ساكت ان هناك (تلميح) يمكن ان يكونوا مقصودين به.

يرجفوا زي (القصب) في امشير.

النوم يطير من عينهم.

يا ربي بكرة الصحافة كاتبة عننا شنو؟.

يمشوا في الشارع ويتلفتوا ..ويقولوا يا ربي الزول دا قاصد شنو بي كلامو دا؟.

ما بستحملوا (كلمة)..متل (حلاوة) قطن ..سريع الذوبان.

الكلام ليك يا المنطط عينيك.

الصحافة لن تلعب بي اي حال من الاحوال دور (طيور الزينة)..لن تغرد وتزقزق ...كما تفعل (عصافير الخريف) في رائعة وردي التى كتبها اسحاق الحلنقي ...(احساس غلبني اتحملو).

انتوا وقت ما بتتحملوا حاجات زي دي ..البطلعكم من بيوتكم شنو؟.

قال لجنة تسيير قال.

هل مطلوب من الصحافة ان تسبح بحمد وشكر (مدراء بنوك) اعلن جزافا كدا انهم سوف يكونوا ضمن (لجنة تسيير) لقيادة المريخ.

عليك الله.

في رأسكم ريشة ..عشان الصحافة ما تكتب عنكم.

عاوزين تخشوا (لجنة التسيير) وتدفعوا من قروش البنوك ..وتعملوا اي حاجة في رأسكم ..وزول يسألكم مافي.

بالله.

انتوا ما تشوفوا شغلتكم..وتعاينوا للبلد ..(الكورة الفيها موسي الزومة وضفر دي ما بتودينا لي قدام).

عاوزين تكبوها لينا كلها لي ناس موسى ..وناس بلة.

وعاوزين شنو؟.

ما عاوزين اي زول يسألكم ..او يكتب عنكم.

شطار والله.

كملتوا (الشطارة) عديل ..وفوتوها بي غادي.

مدراء بنوك ..كنا نظنهم يمكن ان يكون دورهم في تعمير البلد ..واعمار دارفور في صندوق المانحين .. في بناء الشرق - في مساعدة اطفال السرطان ..بدلا من ان يترصوا لنا كدا في (لجنة تسيير)...عشان صورهم تملأ الجرايد ..وتصريحاتهم تغطي على كل الفضائيات.

والجلاليب والشالات ..ومراكب جلد نمر (الاصلية) تتخابط.

تجوا من سبعة تقعدوا في المقصورة ..وتتفرجوا على هدف بلة جابر العكسي.

وعصام الحضري في مصر ..يسوي اي حاجة ...(الغلط والصاح)..يسوط البلد (سواطة) ..وما في زول فيكم قادر يقول ليه حاجة.

وقت الصحافة هنا تكتب بعض كلمات عنكم ( يا من في رؤوسكم بطحات) ..تزعلوا ..وتغضبوا ..وتقولوا ما دارين.

خلاص ما بنشتغل.

ما تشتغلوا ...(انتوا مطلعين حاجة من جيبكم).

مطلوب من الصحافة ان تتعامل مع اولئك (المدراء) الكبار ..بمجرد الاعلان عنهم في (لجنة تسيير) وهمية باحترام وتقدير ..بل بعطف وحنان ..يوازي تماما (حنية) الفنان محمد ميرغني (في عاطفة وحنان يا ناس).

عاملوهم زي (نباتات الزينة)..لا بستحملوا شمس ولا كتاحة ..ولا سخانة.

اقعدوا حولوا فيهم كدا من ضل لي ضل.

يا عم روح.

ديل جبتوهم لينا من وين ؟...لم يصمدوا (24) ساعة والصحافة تكتب عن تلك الاسماء الكبيرة التى ظهرت فجأة في (لجنة تسيير).

24 ساعة بس ..قالوا نحن ما نبقدر على الكلام دا.

معليس احنا بنتبهدل ..(طوالي عملوا شتات).

قالوا ما دارين.

نحن جينا ندفع بس....(كمان عاوزين تدفعونا وتهاجمونا).

انتوا بتدفعوا حاجة من جيبكم.

زعلانين ليه؟.

البزعلك شنو؟.

لجنة تسيير ..ليس من اجل دعم دارفور ..ولا من اجل بناء الشرق ...ولا من اجل مستشفى السرطان للاطفال.

الناس بتموت ...وقروش الدولة بتمشي للحضري ووارغو ومكسيم وسيلمانو.

لجنة تسيير من اجل المريخ والطابق التاني ...وموسي الزومة وبلة جابر ...(وما خفى كان اعظم).

تموها لينا (صور)...وعيد ميلاد الحضري ..وتورتة.

الغريب ..والشيء المحير ..والمدهش ..والبهرد المصارين عديل كدا ...(زعل السيد الوزير).

الوزير قالوا زعلان.

تصوروا ...زولكم زعل.

انت زعلان فوق كم؟....وعلى شنو؟...وليه؟..ومالك؟..والدخلك هنا ذاتو منو؟.

الوزير حسن بدوي في مؤتمر صحفي... اكرر في مؤتمر صحفي (وليس في قهوة او في شارع النيل)..مؤتمر صحفي عديل كدا قال : (أن ما كتب فى الصحافة فى الأيام الماضية والطريقة التى يتعامل بها الإعلام مع الأوضاع الرياضية هو السبب الرئيس فى إعتذار عدد من مدراء البنوك ورجال المال عن دخول لجنة التسيير وأنهم أعلنوا دعم المريخ من الخارج).

في ستين.

الكورة ذاتها البوظها شنو غير رجال المال.

الوزير قال الصحافة هي السبب ..(بدل ما يشكرها ..زعل منها).

طيب (ود الجنيد) يقول شنو؟.

الوزير دا الدولة بتصرف ليه مرتب وحوافز..وبتدي (3) عربات ..وبيت وتلفون ..و..و..

وبزعل عشان الصحافة كتبت عن مدراء البنوك.

طيب (ود الجنيد) يعمل شنو؟.

عاوز اعرف بس ..(اذا كان هناك وزير رسمي بزعل في انتقادات الصحافة وفي كتاباتها).

بزعل في شغل الصحافة وفي القيام بواجبها.

اي والله ...(على طريقة العمدة سيلمان غانم في مسلسل ليالي الحلمية)...الوزير زعلان.

ود الجنيد يعمل شنو؟.

يا عم روح بلا مدراء معاكم ...بلا كلام فارغ.

انتوا فاكرين البلد دي كلها ...(هلال مريخ).

فاكرنها (كورة) بس.

في حاجات اهم من هذه الاشياء ...(الكورة) دي في حد ذاتها (وسيلة) وليس (غاية).

لكن ديل عملوها (غاية).

عملوها (شغلة).

عاوزين يخلوا (بنوكهم)..ويصاقروا لينا ناس بلة جابر وضفر وموسى الزومة.

يخلوا شغلكم ..ويقعدوا يصرحوا في الجرايد.

خلوا هموم البلد الاصلية ..ومشاكله الاساسية ..وقبلوا على الهلال والمريخ.

جابوا وارغو قبل كدا بما يقرب من ال (3) مليون دولار ..ونفس هذا المبلغ صرفوه في (عصام الحضري) الذي يذل في المريخ الان ..ويمسح بكرامته الارض.

وعاوزين الصحافة ما تقول اي شيء ...تصفق لي جمال الوالي ..وتهتف ليه زي ما بهتفوا.

ما عاوزين فيه اي كلمة ..(ما بستحمل اي حرف).

يغنوا ليه ..يزعل - يرضوه ..يمشي البيت مبتعد ..ينتظروه لمن يرجع ..(بعد (6) شهور ..بعد سنة ..بعد الف سنة)...المهم متى ما يرجع بيلقى مكانتو فاضية.

زول في المريخ قادر يدق صدرو ويسد خانتو ما في.

جنسيات تمنح للاعبين عندهم وباء في الكبد ..وعندهم رأي في السودان ..وتجاوزوا الاربعين عاما.

تمنح لهم (الجنسية) قبل السودانيين بالميلاد.

من سلم المطار ..ينتظروهم بالجنسية والجواز والكاش.

وعاوزين الصحافة ما تقول اي حاجة.

ولا كلمة.

ما تقول اي شيء ..(تسكت ساي)..كأنها عضو في فرقة ندي القلعة او انصاف مدنى.

ولا حرف.

عاوزنها تهلل معهم وتكبر وترقص كمان!! ..واسماء (مدراء بنوك) كبيرة في البلد ..يرصوها لينا هكذا في (لجنة تسيير).

رصوها لينا زي (مسابقة رمضان).

عشان يعملوا شنو؟.

عشان يعملوا (الطابق الثالث).

هذا كل همهم.

هي البلد ناقصة ليها (طابق ثالث).

تفتكروا مشاكلنا كلها في الطابق والانارة والنجيلة وقروش عصام الحضري.

البلد بتغرق في (شبر موية)...وانتوا فرحانين .

وبتزعلوا كمان لمن الصحافة تكتب وتنتقد لجنة تسيير كلها (مدراء بنوك).

لجنة زي (المقاصة).

اي مدير بنك ساكت ..لو حصل مرة شاف مباراة لي برشلونة او اليوفي بالغلط كدا ..يجبوا ليك في (لجنة التسيير) دي.

ويقولوا ليه انت (خطير) في الكورة.

لو جاء فايت صدفة باستاد المريخ ..يقبضوه ويدخلوا لجنة التسيير.

وعاوزين شنو؟.

عاوزين الصحافة ما تتكلم ...وما تقول اي حاجة.

انتوا ما كنتوا تطلعوا (قرار) من مجلس الصحافة تقولوا فيه ما في زول يتكلم عن مدراء البنوك.

ولا مدير ..ما تجيبوا سيرتو.

افتكر الحكاية دي ما كان بتغلبكم.

الشيء المضحك ان الوزير ذاتو زعلان.

عليك الله انت المزعلك شنو؟.

لو سألنك سؤال ..البزعلك شنو؟..بتقول شنو؟.

بتفسرها لينا كيف؟.

كدا ورينا ..يمكن نلقى ليك سبب ..ومنطق.

يمكن نعذرك في (زعلك) هذا.

ما يزعلوا ان زعلوا ..ان شاءالله يطرشقوا ...الباب يفوت جمل.

البلد كلها (زعلانة)...ما اشتغلت بيها.

جيت هسع تزعل عشان (3) مدراء بنوك زعلوا.

البلد قاطعة (غاز)..ما زعلت.

تزعل هسع عشان (3) مدراء زعلانين.

الشعب دا ..اصلو ما بهمك.

نموت نحن يعني.

تصوروا بعد دا كلو - عاوزننا كمان نقعد نحنس معاهم ..ونغني ليهم اغنية ايهاب توفيق (تترجي فيّ)..كما يفعلون هم.

ديل جبتوهم من وين؟....البزعلوا من اول يوم ديل.

جنسهم شنو؟.

ناس زينا كدا ..وإلا من استراليا.

الشغل دا شغل (روس)..يتخيل لي كدا.

عايشين وين الجماعة (الزعلتية) ديل ؟...الما قدروا يستحملوا انتقادات وكتابات في الصحافة.

ديل عاوزين بيهم شنو؟..وهم (24) ساعة لم يصمدوا امام اقلام وكتابات صحفية.

والله مفروض تحمدوا الصحافة ..التى انقذتكم من الناس (الهشين) ديل.

سريعين الذوبان...زي (الجلي).

كانوا سيضيعون المريخ ...اكتر من ضياعه هذا ..لأنهم لا قدرة لهم ولا رغبة ..ولم يستحملوا حتى مجرد (كلمات) كتبت عنهم.

الجماعة ديل وقت بلة جابر يجيب ليه هدف عكسي في شبكتو بمشوا وين؟.

بتصرفوا كيف؟.

وكلمات ساكت ما قادرين يستحملوها.

معقولة في ناس (حساسين) كدا في السودان ..اكيد ديل ما عاشوا معانا في البلد دي.

اكيد عايشين في عالم تاني ..وان كانوا يسكنون في ام درمان او الخرطوم او بحري.

ديل ما جايبين خبر..وما عارفين شيء ..زعلوا واعتذروا عشان الكتابات التى كتبت عنهم.

لا بالله.

خلاص معليش.

بنعمل ليكم (يوم مفتوح).

او بنعمل ليكم (يوم ترفيهي) ..البدعة التى اخترعتها دائرة الكرة في الهلال بان يكون هناك يوم ترفيهي كل ما يفقد الهلال (نقطيتن).

نفقد نقطيتن ..يطلعوا (يوم ترفيهي).

كأن الخروج ب (نقطة) والعودة بها (انجاز)...يستحق (يوم ترفيهي).

الطريف في الامر ان دائرة الكورة كل ما الهلال يخسر (نقطيتن) ..يقولوا عاوزين نطلعهم من حالة (الاحباط) تلك ...عشان كدا بنعمل ليهم (يوم ترفيهي).

يطلعوا من (الاحباط) باليوم الترفيهي ...اول مباراة بعد (اليوم الترفيهي)..يرجعوا تاني للاحباط.

طيب انتوا مطلعنهم ليه؟..وقت برجعوا اليوم التاني طوالي.

خسارة (يوم ترفيهي) ساكت.

لمّوا (ايامكم الترفهية) عليكم...وما تبحطونا اكتر من كدا.

ختاما للنقطة دي نقول ان كلام (الوزير)..والذي اعترف فيه (مشكوار) بان الصحافة هى السبب في (طفيش) مدراء البنوك ..اثبت لنا واكد ان الصحافة في السودان بي خير.

وانها الي وقتنا هذا (قوية)..وقادرة ان تتطيح بي (لجنة تسيير) حتى قبل الاعلان عنها رسميا.

على الوزير ان يبحث عن (لجنة تسيير) جديدة ...ان شاءالله يتمها (صينيين) من شارع عبيد ختم ..او من اقرب شركة بترول.

دي ما بتخصنا.

الشيء البخصنا ...ما عاوزين لينا (مدير) بنك في لجنة تسيير.

ولا مدير قسم.

الكلام دا ..واضح وما عاوزين نعيدوا تاني.

ملحوظة : كمان قال زعلان.

هوامش

الهلال سوف يلعب منتصف هذا الاسبوع امام الاهلي مدني في الخرطوم.

واظن المباراة ساهلة وما فيها مشكلة.

بس عشان ما تضيعوا لينا (نقطتين) ساكت ...اوعكم تعملوا لينا (يوم ترفيهي).

نحن بقينا نخاف من (الايام الترفيهية) دي.

كلو ولا الايام الترفيهية.

ما في ترفيه اكتر من الانتصار.

وما في احلى من الاقوان.

اي حاجة غير كدا ..بتبقى شيء (محبط).

وشيء مبحط جدا كمان.

بعد رحيل عوض الجيد كباشي من اذاعة (104)...اصبحت هذه الاذاعة لا حس ولا خبر لها.

انا ما عارف الاذاعة دي شغالة وإلا وقفت.

بعد عوض الجيد كباشي تكون نقصت (100)...يعني بقت اذاعة اف ام 4.

زمان كانت حوارات هذه الاذاعة في الصحف ..واخبارها تصنع الاحداث.

ألحق اذاعتك دي يا يوسف السماني.

هو السماني قاعد وإلا مشى.

كان في او ما في ..ما معروف.

عطبرة التى استطاعت عبر املها ان تشيل (نقطتين) من الهلال قادرة عبر (اهليها) ان تشيل تلات نقاط من المريخ.

برشلونة اتغلب اربعة.

ريال مدريد اتغلب اربعة.

ديل شنو البقلدوا فينا ديل.

واحد قال لو عاوز تفرتك (برشلونة) مسكها الامين البرير.

والتاني قال لي لو عاوز تفرتك (ريال مدريد) مسكو (غارزيتو).

الخرطوم الوطني متصدرة الدوري الممتاز ..(وقت القروش) تكون مافي في الهلال والمريخ ...ناس الهلال والمريخ ببقى ما عندهم فرق من النسور والخرطوم والاهلي.

ببقوا كلهم واحد.

عشان كدا الدولة مفروض تاني ما تدعم الهلال والمريخ ..عشان الاندية دي تبقى واحد.

ما عاوزين اي (مدير بنك) هنا.

ولا واحد.

اتخارجوا لينا يا جماعة من بدري.

هى الكورة رجال الاعمال بوظوها ...عاوزين كمان تدخلوا فيها (مدراء البنوك).

عاجبكم يعني حال (الاقتصاد)...عشان تجيبوا لينا مدراء البنوك في الكورة.

الظاهرة ناس المريخ عاوزين يستفيدوا من (تغيير العملة)..عشان كدا جابوا مدراء البنوك.

عاوزين العملة الحرة ..تدخل النادي.

لقوا (الجنيه السوداني) ما بغطي.

قاموا عملوا شنو؟.

قاموا جابوا ناس (الدولار) ذاتهم.

شفتوا التخطيط دا كيف؟.

والله مدراء البنوك ديل يدخلوا لجنة التسيير حقت المريخ ...تاني (دولار) للدواء ما يطلعوا البنك المركزي.

الدولار الفي البلد كلو بمشي للمريخ.

قالوا ناس المريخ الي الان ببحثوا عن (رئيس).

الي الان ما لقوا ليهم (رئيس).

اي واحد مشوا ليه اعتذر.

عارفين هسع قبلوا على منو؟.

على الهادي بشري.

كل يوم يحنسوا ليهم في زول.

رئيس ساكت كدا ما لقوه.

الدولة قالت ما بتدفع.

عشان كدا اي واحد (اعتذر).

جمال الوالي رفع سقف الصرف ..وبقت ليه في النهاية هو ذاتو حارة عليه.

جمال الوالي نفسو ما قدر على الصرف.

تفتكروا عاوز يقدر الهادي بشري وإلا مصطفى عثمان اسماعيل.

تاني ما في زول بمسك المريخ.

اقنعوا عصام الحاج دا.

ممكن يدور ليكم الشغل بي (50) مليون.

اي محترف يصرف ليه (100) دولار.

عليكم الله دي (محترف) وإلا طبلية؟.

100 دولار بس.

ويقولوا ليك (مكسيم) ما بعرف يلعب كورة.

عاوزنو يكون بعرف يلعب كورة ..وانتوا بتصرفوا ليه في الشهر (100) دولار.

انتوا جبتوا ليكم (مواطن) اجنبي...وقلتوا لينا دا لاعب كورة محترف.

ديل مواطنين اجانب بس.

كمان نحن ما بنعرف المواطنين.

عاجل : عندنا مدير بنك ..قال بخش اللجنة ..لكن بالنص.

انقر هنا لقراءة الخبر من مصدره.