بدون حجاب خالد عز الدين طرف تالت فجأة تحول الاعلام المريخي بقيادة مزمل ابو القاسم من التاكيد علي (هواية) شيبون للتاكيد علي انه لاعب محترف وان هناك طرف ثالث قد قام باغرائه ليفسخ عقده .. ورغم ان اعلام المريخ لم يقدم اي دليل علي تعاقد اللاعب سوي بعض الجمل المضحكة مثل نيله حوافز او علاجه او الاهتمام به الا اننا سنرد عليهم بمنطقهم او غيره لنؤكد لهم في النهاية ما قالوه في البداية بان شيبون لاعب هاوي .. نؤكد بان الفيفا يدعو لاحترام التعاقد ويمنع الاندية من اغراء لاعبين متعاقدين من اجل فسخ تعاقداتهم ولكن المريخ اول من يفعل ذلك في كل المواسم السابقة واخر ما فعله المريخ هو اغراء بكري المدينة الذي تعاقد مع الهلال ولولا ان الاتحاد السوداني يحمي نفسه بصورة خبيثه سنعود لها بالتفصيل ابتداء من الغد ويرفض ان يضمن في نظامه الاساسي نص واضح يسمح بالاستئنافات لمحكمة التحكيم كان يمكن للهلال ان يكسب قضيته ضد المريخ والاتحاد وبكري المدينة ولكن لابد هنا ان نذكر ايضا بان اللاعب في النهاية يذهب للنادي الذي يود ان يوقع فيه وكل مكسب الهلال سينحصر في التعويض المادي من ناحية مع معاقبة اللاعب بالايقاف لاربعة اشهر ومعاقبة المريخ بعدم التسجيل لفترتي تسجيل .. لان بكري المدينة لاعب متعاقد اما في قضية شيبون فلا اعرف كيف يمكن للمريخ ان يشتكي للفيفا في لاعب هاوي لا يرغب في ممارسة كرة القدم سواء مع المريخ او غيره .. شيبوب او شيبون هاااااوي .. يلعب الكرة بمزاااج فقط .. ما عايز يلعب في المريخ ! علي كيفو .. ما عايز يسافر للمعسكر .. عندو شغل .. اكل عيش رسمي فالكرة ليس اكل عيشه .. ان شاء الله يكون شغال مع الكاردينال هذا امر لا يخص المريخ .. عايز يسافر مع الهلال تونس .. هذا حقه فالهلال يمكن ان يعطيه اموالا ليسافر لتونس .. ده شغل ان شاء الله يساعد في وضع العلامات ! حكاية الطرف الثالث دي مضحكة شوية من اعلام المريخ .. اصلا الطرف الثالث هو النادي الذي يتدخل لاغراء لاعب له عقد .. بمعني ان الطرفين في العقد هما اللاعب وناديه .. ولكن لا يوجد عقد اصلا بين شيبون والمريخ لذلك فانه لا يوجد طرفين حتي يكون هناك طرف ثالث ! ولكن لنفترض ان شيبون موقع عقد مع المريخ ويريد فسخ هذا العقد قبل نهايته والانتقال للهلال .. كل الذي يحدث ان اللاعب سيتوقف لاربعة اشهر ثم يصبح لاعبا للهلال او النادي الذي يريد ان يلعب فيه ويلعب مباشرة كمان وبعد ان يتقدم ناديه القديم بالشكوي ويكسبها يتم ايقافه كما حدث مع الحضري وسيون ! أستغرب في اعلام المريخ الذي يطارد في لاعب هاوي ولديه لاعبين محترفين وبعقودات واضحة وهو غير قادر علي ملاحقتهم او اجبارهم علي التواجد بمعسكر المريخ ومنهم تراروي الغائب منذ فترة عن المريخ واللاعب صغير السن في الاوراق الرسمية طبعا ! شمس الفلاح .. ده متعاقد وتعاقد جديد كمان وبرضو ما سافر ! معقول بس .. ضربة شيبون موجعة لكن عليكم بتحملها ويجب ان لا تفقدكم صوابكم .. يمكن ان يتقدم المريخ بشكوي لاتحاد الكرة ويمكن لاتحاد اسامة ومعتصم ان يفعل اي شئ ولكن الحقيقة غير .. والكرة العالمية مختلفة عن الذي يمارسه اسامة المريخابي والحقيقة ستظهر ولو بعد حين كما ظهرت اخيرا في قضية توتي والنيل !! بالمناسبة ابتداء من الغد سوف اكتب عن (لفة توتي والنيل الحصاحيصا) معليش يا مزمل ضرب مستمر من 2015 الي 2016 تعمل شنو .. استحمل حال الدنيا .! لا اعرف اين شيبون ولا اريد ان اعرف فانا اقر بان هذا اللاعب استغل الموقف بشكل غير جميل ولكنني اعرف انه لاعب هاوي ويريد ان يدخل الي دنيا الاحتراف لاول مرة في تاريخه .. زي العريس الجديد .. فرحان بي عرسو بعد تجارب خفيفة في الخطوبة زي تجربة المريخ دي ! مافي عقد يا مزمل .. الزول ده عايز يفسخ العقوبة .. نديكم حبة قروش كده بس نظير الرعاية او الزيارات الاجتماعية ههههه ! اقترح ان الهلال يسلم المريخ مبلغ (سلف) علي رعاية شيبون تقديرا للظروف الصعبة هذه الايام ! ممكن الهلال يتكفل بالفندق الجديد في اثيوبيا.. هو الفندق القديم مالو .. شايفكم فسختو العقد سريع معاهو ! ولا العلاقة بيناتكم كانت هواية سااااكت .. قال طرف تالت قال .. عليكم الله تاني ما تجيبو سيرة الفيفا .. خلوكم مع ناس سمير فضل ديل احسن ليكم رغم انو شايفهم هم زاتهم مجهجهين ! وما تشغلونا كتير .. نحن شغالين شغل كبير بنفعكم انتو برضو .. قروش الفيفا دي موضوعها بدأ ينجض خلاااص .. احتمال قريب الفيفا تجيكم في الخرطوم ! يلا مع السلامة هاااي هاوي ! وكل سنة وانتم بخير والسودان بخير وعيد استقلال مجيد وسعيد .