موضوعان يسيطران على الساحة الرياضية والإعلامية في السودان هذه الأيام.. ونسة المجلس عليهما ونظر العيون.. اليورو وشيبون! في بيوت العرس الونسة كلها في اليورو.. مدير تاكس ما شاء الله سحااااب خلاص.. وأسامة عطا المنان بوقع أحسن من شيبون! وفي بيوت البكيات الونسة كلها شيبون.. بكاء شديد.. كان لعاااب خلاص.. مشى الجنوب.. البكاء لزومو شنو.. أصلوا مشى يحارب!! لا.. مشى يلعب.. طيب المشكلة في شنو؟ المشكلة أنو ما بجي إلا بعد سنة ونص ! وتعال بص .. يورو مشتتت سااااكت .. شيء كورة نسوان وشيء إستراتيجية وشيء شباب .. ما شاء الله تبارك الله .. منتخب الشباب السوداني بسافر أكتر من برشلونة في دوري الأبطال.. تتلفت كده تلقاهو في الجزائر .. تعاين كده تلقى في تونس.. بقوا زي «زكي اليماني» زي ما بقول محمود صالح على نفسو .. ومحمود صالح كابتن الأهلي الخرطومي السابق رجل خفيف الدم .. قال هو مرة كان في معسكر المنتخب في ساحل العاج وجاء عمل «ترانزيت» في مطار الخرطوم وسافر مع المنتخب معسكر المانيا طوالي .. زكي اليماني ما عملها !! أها اليومين دي ناس زكي اليماني كتاااار .. زكي عباس .. يجي من سفر يستعد لي سفر ومعاهو كمان بحر .. ياخي بحر ما شاء الله اسم على مسمى .. في اريتريا شهر .. في الجزائر في تونس .. وناصر كمان .. ما بتعرفوا ناصر .. ما مشكلة نفيدكم لاحقاً .. المهم ده واحد بسافر مع منتخب الشباب .. ما مهم ناصر .. جحا .. الشاعر، المهم تطلع تذاكر ! والتذكرة بتجيب تذكرة والتذكرة بتجيب دين والدين برجع يورو بعدين! نشيل تذكرة ونمشي الجنوب.. ناس الملكية قالوا عايزين يدوا المريخ درس في انتقال اللاعب الهاوي .. يعني شيبون ده هاوي مافيهو شق ولا طق يا مزمل.. لكن ألوك ده ما عندو أي علاقة بهواية شيبون .. ألوك ده حالة شاذه جداً في كرة القدم في كل العالم.. ممكن يكون اللاعب الوحيد الهاوي ومحترف في نفس الوقت !! لاعب مسجل من مريخ كوستي في صفقة انتقال كبيرة وتسويق لنجم معروف في كوستي ولديه عقد احتراف إلى نادي المريخ بعقد احتراف ! الاتحاد السوداني سجل لاعباً محترفاً.. عقدو موجود بالاتحاد.. يلعب في مريخ كوستي محترف.. مريخ كوستي تنازل نظير مبلغ معروف لمريخ الخرطوم.. اللاعب السوداني القادم من أبيي المحترف بمريخ كوستي انتقل بعقد احتراف للمريخ السوداني.. فجأة كده قام الاتحاد طلب كرتو من اتحاد الجنوب باعتباره لاعب الملكية وهاوي كمان!! حوله! برضو تقول الفيفا عارفة أي حاجة .. ياخي دي دولارتها ما عارفه الحاصل فيها شنو! شيء تذاكر تنجح وشيء تذاكر ترجع! الراجع كيف يا التجاني .. أول مرة أشوف لي تذاكر ما فيها راجع كلو كلو !! حجوزات مضمونة .. مسافرين محترفين !! ههه واحد ثقيل من القراء قال ناس لجنة التسيير بعد ضربة «شيبون» عايزين يقدموا استفسار للوزير يسألو هم «هواة ولا محترفين» ما تخافوا زول عايزكم مافي يا عبد التام! في مشكلة شفافية «كشوفات» في اتحاد الكرة .. كشف المريخ مافي زول بشوفو.. كشف السفر مافي زول بشوفو.. كشف التذاكر مافي زول بشوفو.. كشف الحوافز مافي زول بشوفو .. كشف الديون ممنوع من العيون! كشف النثريات ممنوع من النظر.. ومحصور النظر عند أربعة أشخاص فقط.. لأن الموضوع مسجل خطر! تعليق المراجع مافي زول بشوفو .. ياخي ميزانية 2012 راجعها عمنا «عدار» وهو بالمناسبة والد أيمن عدار أحد المشرفين على المنتخب الوطني! ميزانية فيها ملاحظات سمعنا بيها سمع زي ما بقول أحد أعضاء مجلس الإدارة.. الحاصل شنو لي هسة ما عرفناه.. قلنا ليهو لو لقيت الميزانية يا عضو ركز على الملاحظات! ملحوظة «العفش داخل البص على مسؤولية صاحبه» خلو بالكم من ابراهومة.. السنة ونص دي ما تبقى عليهو!! شيبون مشى وما عارفين برجع متين .. واليورو وصل وما عارفين اتصرف وين.. والونسة في البكيات بي شيبون وفي الأعراس باليورو.. والقصة لسه.. نجيكم بكره وبعدو ولحدي سنة وزيادة..