دق الدلجة محمد عبد الماجد خطة المريخ الجديدة لاستعادة شيبوب من شبيبة القيروان * قالوا ليك في زول ضعيف شديد. * ضعفة مبالغة فيه. * زي الزول المافي. * ما عندو اثر. * قاعد وما قاعد. * ظاهر وما ظاهر. * يا الله كدا بيعمل ليه ربع كيلو لحمة. * لو بالغ ..وجابوا معاه العائلة ما بفوت نص الكيلو. * الزول الضعيف دا قالوا ليك كان بيصلح ليه في مفتاح لمبة – طقتو ليك كهربة. * جاء واقع. * زولكم قعد (يدردخ) ليك ويقول ليه في كلام برة من رأسو. * اسماء في حياتنا يدخلها ليك في نجوم الغد. * نجوم الغد يدخلها في صحة وعافية. * لخبطة شديدة. * يشيل ليك رضا مصطفى الشيخ ويوديه (البحث عن هدف). * ميرفيت حسين يجيبها ليك في (ساعة رياضة). * زولكم بتكلم برة من رأسو. * بيلخبط ساكت. * عبدالعزيز الحلو يجيبو (الاصلاح الآن)…وغازي صلاح الدين يوديه حركة الطلاب المستقلين. * زول ضاربهو كهربة…نعمل ليه شنو نحن؟. * ممكن يعمل اي حاجة. * يكون عاوز يفتح (المروحة) – يفتح التلفون. * عاوز يشغل التلفزيون يقوم يشغل ليه طالب. * يكون عاوز يضرب التلفون – بيضرب ليك (الباسطة) زي الما حصلت حاجة. * شغال (لخبطة) كدا. * الناس ما فهموا اي حاجة. * قالوا الظاهر الكهربة دي ضربت ليه رأسو. * بقى يجيب ليه كلام ما يا هو. * بقى يهضرب..زي ملاح البامية …البجيبوه ليك الساعة واحدة صباحا. * في واحد من ناس الحلة الكبار – الناس العاقلة شديد…قال نحن الزول دا ما صاح نخليه كدا. * الزول دا نحن لازم نشيلو ونوديه المستشفى. * الجماعة قالوا ليه كلامك سمح والله. * اصلو ما غلطان. * اتشالبوه ليك ..ومشوا بيه على المستشفى. * دخلو بيه على الدكتور طوالي. * الزول حالتو كانت صعبة شديد. * الدكتور قال ليهم اتأخرتو شديد ..كان تجيبوه بدري شوية. * الجماعة قالوا ليه عاد نجيبو ليك قبل ما يدخلو لينا الكهربة. * الدكتور قعد يعمل ليهم في نظرياتو. * يخش ويطلع. * ويكتب. * والجماعة بقولوا ليه ..يا دكتور خير ..الحاصل شنو؟. * يا دكتور الزول دا امو زولة كبيرة في السن ..عليك الله ما (تجهولنا) ساكت. * الدكتور قال ليهم والله انا ما بكضب عليكم. * ولا بغشكم. * الزول دا حالتو صعبة شديدة ..ومتأخرة ..انا ما عارف كان ح تحصل عليه شنو لو الكهربة كانت شغالة وقت ضربتو؟. * حالتها دي قاطعة. * واحد فيهم انتبه لكلام الدكتور ..وقال ليه يعني الكهربة وقت ضربتو ..كانت قاطعة يا دكتور. * الدكتور قال ليهم : ايوا …الله ستر بس ..الكهربة وقت ضربتو كانت قاطعة ..لو ما كدا كان بروح فيها. * الجماعة كلهم قاموا – وقالوا والله سلامة كبيرة – اول مرة قطوعات الكهربة تعمل ليها فايدة. * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * موضوع الزول دا ذكرني ليك حكاية شيبوب. * شيبوب دا (هاوي) يعمل في المريخ كدا. * طيب لو كان (محترف) كان حصل شنو؟. * الحكاية دي بتخلينا اعيد ليكم السيناريو تاني. * المريخاب ما تسمعوا كلامهم دا. * المريخاب …ما تصدقوهم. * المريخاب ديل بخططوا تاني يخطفوا شيبوب. * الزول دا واجعهم شديد. * دخلهم في حالة الزول الضبرتو كهربة والكهربة قاطعة. * المريخاب قعدوا يفكروا. * قالوا هسع نحن نعمل شنو. * واحد فيهم قال ليهم نخطفو تاني. * كلهم قعدوا يصفقوا. * قالوا اصلو ما في حل عشان نعيد كرامتنا غير نخطف شيبوب. * قالوا خلاص نضع لينا خطة عشان نخطف بيها شيبوب. * قالوا يمشوا وين؟. * قالوا احسن زول يضع لينا خطة (درامية) مزمل ابوالقاسم. * الزول دا بعمل اللفة كبيرة. * مشوا لي مزمل في البيت – قالوا ليه عاوزنك تضع لينا خطة نخطف بيها شيبوب. * نجيبو من شبيبة القيروان. * مزمل قال ليهم ما عندكم مشكلة. * بس ادوني 24 ساعة ..بضع ليكم خطة عجيبة. * بعد 24 ساعة ..جماعتكم شالوا علبهم ..ومشوا على مزمل ابوالقاسم. * مزمل ابوالقاسم ..قال ليهم الزول دا المرة الفاتت نحن قلنا قفز من الطابق الكم؟. * قالوا ليه قلنا الرابع. * مزمل قال ليهم المرة دي يقفز من الطابق العاشر. * الجماعة قالوا ليه العاشر كتير يا مزمل ما في زول بيصدقنا. * مزمل قال ليهم ..حكاية التصديق دي خلوها علي. * واحد فيهم قال ليه لكن يا مزمل الزول دا لو قفز من الطابق العاشر بعيش. * مزمل قال ليهم ما لو ما بعيش ..والله لو جاتو حاجة في اعمدتنا دي نطلعه زي الحصان. * مزمل قال ليهم ..اسمعوا نحن المرة الفاتت قلنا اتسلق شنو؟. * الجماعة قالوا ليه قلنا اتسلق المواسير. * مزمل قال ليهم المرة دي نقول ليهم اتسلق سلوك الكهربة. * الجماعة قالوا ليه لكن دي بصدقوها لينا. * مزمل قال ليهم ..ما عندكم مشكلة عندنا صور. * مزمل قال ليهم انتوا المرة الفاتت شيبوب دا حمتوا بيه كم مطار قبل ما يرجع من جوبا. * قالوا ليه حمنا بيه 4 مطارات. * مزمل قال ليهم المرة دي اعملوها (24) مطار. * في واحد فيهم قال ليه يا مزمل دا شيبوب وإلا محمد علي كلاي ..البنحوم بيه (24) مطار. * مزمل قال ليهم اسمعوا المرة الفاتت شيبوب اتصور معاهو منو؟. * قالوا ليه اتصور معاه محي الدين عبدالتام وعادل ابوجريشة. * مزمل قال ليهم ..المرة دي خلونا بتصور معاهو براي ..عشان ما يرجع للهلال تاني. * الجماعة قالوا ليه اتفقنا. * مزمل قال ليهم على البركة. * شوية كدا مزمل رجع ليهم – قال ليهم اسمعوا لو حكاية شيبوب دا فشلت ..ممكن نخطف بلة جابر. * واحد فيهم قال ليه لكن بلة جابر بقنع لينا الهلالاب ديل. * مزمل قال ليهم ..نحن بنتم الباقي. * ما عندكم مشكلة. * انتوا بس اخطفوا بلة جابر ..ونحن بنطلعوا في جرايدنا دي شيبوب. * وقاموا ليك على كدا. * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * غايتو موضوع شيبوب دا داخل ليك في الجماعة وعامل ليهم نفسيات. * انا كل ما اقول اكتب لي في موضوع تاني. * بلقى نفسي بكتب عن شيبوب. * شيبوب ساهل لكن. * شيبوب عملوا ليه مهرجان. * مع ذلك ..فلت منهم. * استعجلتوا ساكت على المهرجان. * مهرجانكم بقى زي الموية الحارة الما لاقين ليها (تلج). * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * ………….. و * انتوا البرد وين؟. * الواطة سخنت عديل كدا. * بقى ولا في برد. * خسارة (سيوترات) ساكت. * بعد كدا المكيفات ح تولع. * احسن راجعوا مكيفاتكم. * رمضان قرب. * جاء عديل كدا. * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * …. * السيدة (ل) – غداء الجمعة من غيرك ..زي فطور الاحد. * وقرّط على كدا. *
