دق الدلجة محمد عبد الماجد قون بشه (ستة إلّا ربع) بيجي مع (سيد اللبن) محمد النصري عندو (اندلقي حن). الاندلاق فعل (تعسفي). فعل (فيضاني). عشان كدا لمن محمد النصري يغني (اندلقي حن)..بيشير علينا بي حالة من (الكترة). حالة من حالات الفيضان الحناني. الحن ذاتو حاجة مأصلة اكتر من (الحنان). حاجة اعمق. الاصل في الحنان …الحن. يتخيل لي (الاندلاقة) دي حصلت امس في القون الذي سجله بشه في شباك الاهلي شندي. شفت (الاندلاقة). اقوان بشه كلها اقوان (اندلاقة). الحارس بيندلق. والمدافع بيندلق. ولاعب الوسط بيندلق. انتوا ما شفتو قون بشه التاني في مريخ نيالا. امس برضو كانت في (اندلاقة). الشاف قون بشه كلو عاش في الاحساس دا. وقعد يحسبها بينو وبين نفسو. عن نفسي طلعت كراس الحساب ..وقعدت اسمع في جداول الضرب. اول مرة اشوف لي زول بيندلق بشيل ليه جلاكسي 6. مرة قابلني زول (مهجوم). مخلوع يعني. عيونو في ركبو. وركبو في اجازة. قلت ليه يا زول مالك (مخلوع) كدا …الهجمك شنو؟…مهجوم متل القميص البتكتشف فجأة (مفتوق). ما تعرف تمشي وين؟. قال لي في زول فلقني بي (طوبة). قلت بالله شوف (فلقة طوبة) عملت في الزول كدا ..طيب الزول دا لو ضربوه بي (صاروخ) بيعمل شنو؟. حليل زمن الشكلة بالطوب. في الزمن الحديث دا ..حكاية زول يفلقوه بي طوبة لسه شغالة. الفليق دي مرحلة يفترض ان نتجاوزها. مرحلة انقرضت – زي ابوالسعن. زمان كان في طاير اسمو (ابوالسعن) – ما عارف الطاير دا اختفى وين في الزمن دا. السعن ذاتو اختفى. في زول بيعرف ليه (سعن) في زمنا دا. تلاتين عشرة ..الجيل الجديد دا ما بعرفها. فليق شنو كمان؟..العالم تطور. هسع معقولة في العصر دا في زول بيمشي لدكتور ويقول ليه (فلقوني). يا جماعة نحن لازم نتجاوز مرحلة (الفليق) دي. لكن لو جينا للجد ..هدف بشه امس زي (الفلقة). في ناس كتيرة فلقها ليك هدف بشه دا. قالوا ليك في واحد مشي ليه لي دكتور. الدكتور قال ليه مالك في شنو؟. زولكم قال للدكتور ..بالع لي (عضم). الدكتور عاين ليه سمح – وقال ليه ..في ناس بلعوا ليهم (كبري) ما جاتهم حاجة ..انت جايني بي (عضم). قوم عليك الله شوف ليك شغالة. بعدين اكل الزمن دا كلو ما حصل قابلني فيه (عضم). انت (العضم) جبتو من وين؟. طبائخ الزمن دا تفتش للعضم فتيش ما بتلقاهو. هسع في عصركم دا في زول حصل لاقى ليه كلب شايل ليه (عضم). العضام عند الكلاب اختفت. ما عارف المشكلة وين؟. في الكلاب – وإلّا في العضام. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ملامحك فترانة زي (الدمورية) الشاربة.. متل حلة اللبن المكدبة. السكن فيها زادها وقار واصالة ..موش في ناس بقولوا ليك (الشيب) زادوا وقار. فترانة… زي عصير الليمون الما بارد… متل (الصينية) البيرجعوها فاضية… مالك بقيتي واقفة بينك وبين الظن.. الظن يمرق منك لي خشم الباب ..ويجيك راجع. جارية في الدنيا دي …لاحقة شنو؟..ما في حاجة فايتة. التايا بنت حمد المغارب طلع عندها (سكري). التايا قالت للدكتور (الكلام الكتير) بيجب (السكري)… الدكتور قال ليها الكلام الكتير ما بيجيب السكري ..لكن السكري بيجيب الكلام الكتير. التايا قعدت ليك تربرب للدكتور ..لمن الدكتور فكر يعتزل المهنة ويفتح ليه دكان في الحلة. الدكتور قال ليها اوعك من السكر. والباسطة. والطحنية. التايا قالت للدكتور كلو ولا (الطحنية)..انا الطحنية لو كتلتني ما بخليها. كمان عاوزني اخلي (الطحنية). هي عليكم الله الدنيا دي فيها شنو غير (الطحنية). يوم داك وقفنا نتغالط قبل قوز الرملة الفوق ناس سعد..الطيب ود عمر قال اخطر اكتشاف في الدنيا دي (تحويل الرصيد). نحن قلنا ليه اخطر من تحويل الرصيد…(الباسطة). الباسطة دي اصلو ما في اخطر منها.. كل زول في همو. امس بشه جاب ليه قون الساعة ستة إلّا ربع.. في الوقت القاعدين نشوف فيه الساعة. وقت سيد اللبن يدق الباب. تطلع ليه بي (البستلة). او قول (الجك) – او (الجردل) – البستلة دي كانت زمان. هسع في العصر الحديث دا …قابلكم زول شايل ليه (بستلة). قون بشه جاء مع سيد اللبن. في واحد قال لي ناس الاهلي شندي كانوا يقفلوا عمار الدمازين عشان ما يتوغل. قلت ليه قبل عمار الدمازين – كانوا يقفلوا (سيد اللبن). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الغريبة ..والحاجة الما لقيت ليها (فرنسي) في رأسي ..ناس الاهلي شندي جاب ليهم قون واتلموا في الحكم. انتوا يا ناس الاهلي بتعملوا كدا. الهلال دا كم مرة جاب فيكم قون والحكم نقضو. هسع بقت ليكم حارة. عجبتني ليكم..عشان تعرفوا الموضوع حار كيف؟. مرة نقضوا لينا في مباراة واحدة امام الاهلي في استاد الخرطوم (هدفين). هسع عرفتوا الاهداف المنقوضة. وقعت ليكم يا دوب. عشان تعرفوا بس. الهلال بقى فريق كبير. بجيب القون بجيب القون. وبحافظ على شباكو بحافظ على شباكو. دي كلها علامات الفريق الكبيرة. السنة الفاتت كنا بنتكلم بشيء من الدهشة عن مكسيم. ومازلنا نتكلم عن مسكيم بالدهشة نفسها. لكن اضفنا السنة ابيكو. واضفنا عمار الدمازين. انت يا الكاردينال الناس ديل بتيجبهم من وين؟. الكاردينال يحسب له مكسيم ويحسب له المدافع ابيكو. اتخيلوا مهاجم يأتي بنفس الدرجة والاجادة في مايو القادم. الهلال ح يكون قوة ضاربة. اتخيلوا (شيبوب) مع الجماعة ديل. اصربوا للهلال حتى مايو القادم. اصبروا ليه حتى التسجيلات القادمة ..ح يكون فريق الاحلام. ح يعمل اي شيء في الكورة. محمد احمد بشه ..مفروض يشكروه شكر خاص. بشه سجل في الزمن الصعب. مع سيد لبن. بشه ..حسم ليك الاهلي شندي. وكاريكا قدم مباراة كبيرة. ونزار حامد عمل اي حاجة في الكورة. ينزل ويطلع. ما في اروع من كدا. بس المهم عندنا مباريات كوستي. المهم الانتصار على الرابطة ومريخ كوستي في كوستي. الفات انسوه. خلونا نركز في القادم. عقبة صعبة تجاوزها الهلال. وتلاتة نقاط غالية. وعندها (طعم). ألعبوا كدا. واضغطوا. واطلعوا بالنتيجة التى نبحث عنها. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……. و لاعب الهلال السابق حمد الجريف غادر للقاهرة بعد ازمة قلب جعلته طريح الفراش. حمد الجريف يحتاج الى ان يقف معه الهلالاب. روابط الهلال في السعودية وفي قطر والامارات ..ياريت يدعموا حمد الجريف. الاخ علي همشري نخصه بنداء خاص ..من اجل حمد الجريف. ثم الدعاء من كافة الناس لحمد الجريف بالشفاء والعودة سالما ان شاءالله. قون بشه دا عاوز ليه اسبوع ثقافي. عاوز ليه يوم مفتوح. بنعملوا ليكم. اصبروا بس. ………… السيدة (ل) – البعوض في الزمن دا (الملاريا) بنقلها بي (رسوم). وقرّط على كدا.
