بابكر سلك *هذا المجلس أو جله وحتى مكتبه التنفيذي كانوا يرفعون شعار المنهجية والعلمية والشفافية *باركوا لهم الخطوة وقلنا معاهم بسم الله *بالذات ونحن نحتاج لاكتشاف وتأهيل كوادر إدارية تعين الزعيم في مقبل الأيام *وورونا ليك منهجية بالشفافية بالعلمية بطريقة علمية *خطابات الاستغناء عن العمل أو الإيقاف لموظفي وعمال الاستاد مثل كمال دحية ومبارك كانت خير مثال للعشوائيةوعدم الجماعية والفردية في التصرف بطريقة بوكلينكية بحتة *الخطاب يسلم للشخص المعني عضو مجلس *ويكون موقع من شخص تاني *وينكر ذلك الشخص التوقيع *ويعلن أهم أعضاء المجلس عدم معرفته بالخطاب *انه البوكلين المن امه *أما شفافيتهم فظهرت في موضوع المدرب والتمثيلية التي كلفت الكيان زمنا مخصوم على الإعداد وقتلت لدى الجماهير طموحا اتولد فيهم حينما بدأت قصة المدرب *بجي *اتأخر في الكريسماس *مسكوهو لرأس السنة *قال بحضر سماية جارتهم ويضرب المرارة وبجي *جاي بالمصرية *جاي بالتركية *جاي في العصرية *وهي شن الجية *ضرب الجبنة وكسح *السؤال وين الشفافية في القصة دي? *ومن ستحمل تكاليف مسرحية المدرب ووكيله من تذاكر سفر وإقامة وفنادق *هل يتحملها الزعيم من ميزانته أم يتحملها منتج ومخرج المسرحية *الممثلين قبضوا ورجعوا * التكاليف دي على منو? *الشفافية يا ناس كانت توجب على المجلس إعلان عدم قدرتهم أو قناعتهم بالمدرب الأجنبي *كان ممكن ببساطة يقولوا ما بنقدر على مدرب اجنبى في هذه المرحلة *بالذات والمريخ بالمدرب الأجنبي أو الوطني أو بدون مدرب ما بطلع التالت مثلا *وبمثل أفريقيا *وبالمدرب الوطني أو الأجنبي ما بشيل بطولة من بطولات الكاف *عشان كده نوفر حق المدرب لاستثمارات أخرى *عائدها ممكن يمكننا بعد تلاتة سنين من التعاقد مع مدرب اجنبى كبير في قامة النادي *بالذات والدولار اليومين دي سعرو *تعالا وبص على كمكمية ونص *أما العملية فوريتونا ليها في التعاقد مع فوفانا *قالوا طلع فيهو قائم??? * بركة الما طلع فيهو قبين *أيها الناس *بعد مسرحيةالمدرب اتضح لنا إنو مافي بوكلين ضرب للمحترف البرازيلي في المطار ومنعه الجية *بوكلين المجلس ده جواهو *بوكلينكم يا ناس المجلس كضبكم ده *لكن بعد مسرحية المدرب الكوميدية دي *ما بعيد تسجلوا المريخ في اتحاد المهن التمثيلية وتريحونا من الأتحاد العام *أيها الناس * ماذا يريد سوداكال??? * ومتى سيتجه لاحواض الجرجير التي حدثنا عنها أسد?? * متين يقلع الجرجير ده ويجيبوا سوق التنافس *يجيب بيهو مدرب اجنبى مثلا *يضع بيهو لبنات الإستثمار الأولى *يخلينا نتشبرق *حدثونا عن الجرجير وكنوز سليمان *وورونا فيديو الزول القال مافي اغنى من آدم إلا رب العباد *الزول ده كان جاد ولا غنى لينا ساااي! *كلمونا *قالوا لينا آدم قارون سوداكال بجيب الجرجير بالكونتينر *وما شفنا جرجير ولا قرنبع *جرجيركم يا أسد طلع عشر ساي ومسرحيات بايخة جدا أبطالها مدرب ووكيلوا وما بعرفوا يمثلوا كويس *وعلميتكم ومنهجيتكم واوراقكم المرتبة يا صديقي زيكو وضح أنها أمية إدارية ومنهجكم لا يعترف بترتيب الأوراق وحفظ الدفاتر *ولكن ماذا يريد أبونا آدم من المريخ وهو يتمسك و يستأنف ومربع ايدينو ?? * آدم *يا جرجير يا ما بتلزمنا بعد كده كتير *أيها الناس *كيف يدار المريخ?? *سؤال طرحه قريش *ولابد لقريش أن يجاوب على نفس السؤال *يا قريش *كيف يدار المريخ *أيها الناس *أعتقد أنه بعد مسرحية المدرب فقد المجلس حتى الدعم المعنوي الذي كان يجده من المتفائلين به وأنا أولهم *ولكن وللأمانة *فائدة هذا المجلس الوحيدة انه أفرز كادر إداري إسمه طارق المعتصم *أما البقية فمع احترامي لهم بي جرجيرهم كتر خيرهم *بس قبل ما تمشوا *ورونا حقيقة الديون في عهدكم بمنتهى الشفافية *أيها الناس *أيها الناس * احترامي للكوتش ماذدا *بس للتذكير سبعة الوحدات في عهدو *ستة اليمن في عهدو *متواليات الهلال في عهدو *هذا للتذكير يا أهل الجرجير *إن تنصروا الله ينصركم *اها * نجي لي شمارات والي الخرتوم *كان شفت يا والينا *البحر لما يزيد علينا *برجعوهوا ناس ترسوا البحر خريسان *ناس عجبوني الليلة جوا يا والينا * الدولار ده الطايح فينا *مافي ناس يترسوهوا لينا??? سلك كهرباء * ننساك كيف والكلب عاين للكلبة وقال ليها أي شئ زاد إلا سواقينك المتل القنا ديل لي أسي بالقديم والي اللقاء سلك