محمد الطيب الأمين * رغم الخير المستتر الذي حملته أمطار الأمس إلا أن اليوم حفل بكثير من الأحزان .. * شرارة الحزن الأولى بدأت بخبر غرق (22) تلميذاً في طريقهم إلى المدرسة .. * وهو حدث فاجع ومؤلم .. * ثم كان رحيل السني الضوي (فردة ثنائي العاصمة) خبراً حزيناً .. * السني الضوي مبدع له في الأغنية السودانية كثير من الخير والجمال .. * وقد عانى من المرض حتى انقطع عن الساحة فرحل بهدوء ولكنه خلف ضجيجاً رهيباً من الحزن .. * أيضاً من الأحزان الكبيرة أمس تلك الصورة التي تداولها نشطاء الميديا وقالوا إنها جثة مهملة ومنسية بمستشفى كوستي .. * قالوا إن الجثة لشاب مات بمرض نقص المناعة (الايدز) ورفض أهل المستشفى دفنه .. * الرواية غير مؤكدة وأنا لا أجزم بصحتها ولكن ما يهمنا هنا رغم الحزن هو (نقص المناعة) .. * الإنسان الذي يعاني من نقص في المناعة يكون عرضة لإستقبال الأمراض بكل سهولة .. * مريض نقص المناعة لو هب النسيم ممكن يعمل ليهو (نزلة) ولو قام غبار نتيجة مشاجرة بين (خروفين) ممكن يعمل ليهو (قحة) ولو بعوضة عبرت فوق رأسه مثل عبور (كورة شيبوب) ممكن تعمل ليهو ملاريا .. * الجسم الناقص مناعة لا يستحمل ولا تتوفر عنده المقاومة .. * وبما أن ذلك كذلك فان الخرطوم تعاني من نقص حاد في المناعة يجعلها غير جاهزة لكل شئ .. * مطرة واحدة ممكن تعمل للخرطوم اختناق .. * الخريف بيظهر في الخرطوم من أول مطرة .. * حال الانفاق والشوارع والمواقف والأسواق والأحياء والمدارس يؤكد أننا غير جاهزين لاستقبال حتى (الرزاز) .. * نحن يا كافي البلا لا جاهزين للخريف ولا جاهزين للصيف ولا جاهزين للشتاء .. * أقل حاجة بتظهر في الخرطوم في شكل مرض وأزمة .. * لو أتعطل لوري في كبري الفتيحاب بيعمل زحمة في شارع الجريف .. * ولو اتكسرت ماسورة في حلة كوكو ممكن أثرها يظهر في الثورة الحارة العاشرة .. * ولو في سنار انكسر مسمار ممكن يعطل كل العمال .. * وهكذا بنفكر في الحلول بعد الخراب مع إنو ممكن نضع الحل لحظة التأسيس .. * إنه نقص المناعة الذي يجعلنا نخشى ونخاف حتى من المطر الذي هو خير لنا وللأرض والأنعام .. * ولذلك الحال من بعضو.. النفق غرقان والجوهرة غرقانة والموظف يغيب بسبب مطرة والمباراة تتأجل والعريس يضطر لتأجيل الدخلة عشان المطرة وهكذا .. * المدهش في الموضوع ان أهل المريخ يضحكون على جوهرة الهلال .. * تداول عدد من أهل المريخ صور لملعب الجوهرة وهو مغطى بالمياه وسخروا من الجوهرة .. * سبحان الله .. * أهل المريخ يضحكون على الجوهرة بينما لهم إستاد لا يختلف كثيراً عن نفق عفراء وخور أبو حبل .. * إذا كانت الموية في الجوهرة حدها الركبة فان الموية في ملعب (مدفور البلد) حدها طابق شاخور .. * ملعب المريخ هو الآخر يعاني من نقص في المناعة .. * والله صحي .. * ملعب المريخ في الصيف النجيلة بتحرق وفي الشتاء النجيلة تأكلها الديدان وفي الخريف الموية حدها طابق شاخور .. * لو في روضة عملت تخريج في ملعب المريخ ممكن النجيلة سنة تكون كحيانة .. * مرات نجيلة استاد المريخ الحكومي بتشبه لي (الجرجير البايت) .. * ومع ذلك تجدهم يتحدثون عن ملعب جوهرة الهلال .. * قوة عين عجيبة .. * ديل شدة ما عينهم قوية اتأهلوا على حساب الجيش السوري (الما قاعد يتمرن) وحلموا بكأس البطولة العربية .. * عندهم خيال عجيب .. * المريخ في البطولة العربية ح يجيبها ضقلها يكركب .. * المريخ في البطولة العربية (بيلعب مع ناس ما قدرو) .. * اللعب مع الكبار مشكلة .. * ما كل الفرق جيش سوري .. * إذا دعتك قدرتك على هزيمة الجيش السوري فتذكر قدرة الوحدات الأردني عليك .. * الغريق قدام .. * ونحن السنة دي بالذات يا متنا من الضحك ويا كمان الضحك كتلنا .. * المهم .. * بلدنا محتاجة ضمير عشان يكون عندها مناعة ضد الظروف والاقدار .. * ضمير وفهم ودراسات وخيال وخوف من الله .. * المهندس البيطلبوا منو يعمل نفق يفترض يضع في بالو إنو الدنيا دي فيها خريف .. * والبيشيد المدرسة يفترض يعرف إنو البيدخلوا الفصول دي آدميين .. * والبيعمل شارع ظلط يحكم ضميرو عشان شارع الظلط بعد شهرين ما يبقي زي (طبق البيض) .. * في حاجات ما بينفع فيها اللعب والهظار .. * حياة الناس خط أحمر .. * المجاري ، المصارف ، الحلول هذه أشياء معالجتها بعد الكارثة يعتبر كارثة .. * بلدنا محتاجة لضمير .. * لشنو نحن البلد الوحيدة في العالم الماضيها أفضل وأجمل من حاضرها ومستقبلها ؟ * لشنو نحن راجعين وراء في كل حاجة (النظافة ، السلوك ، الاخلاق ، الاقتصاد ، الأمانة ، الضمير ، الحب ، الصداقة ، الفرح ، الحزن ، الجنيه ، الكورة ، الرغيف) .. * ليه بنرجع وراء والناس ماشين ؟ * لشنو لو جات مطرة المدارس بتدخل في اجازة والموظف ما بمشي الشغل والمواصلات بتقيف ؟ * لشنو بلدنا ما بتستحمل ؟ * ليه عاصمتنا شغالة بي رئة قرية ؟ * نسأل الله أن يخفف عننا ويرقي سلوكنا ويكبر مفاهيمنا ويفتح بصر وبصيرة أولياء أمور البلد .. * ونركب صافنات ونجيبة (سودانية) واصلو الزول بيموت والذكرى تفضل حية .. * و..و.. * والقلوب الحايمة حولك بتتمنى ليك …..(15 رغيفة بدون صف) ..
