محمد الطيب الأمين * من كلمات التهديد والوعيد عندنا في السودان كلمة (الوش التاني) .. * يقول ليك : (ما تخليني أوريك الوش التاني) .. * والوش التاني في الغالب هو (الوش الأول) .. * إبان فترة الخطوبة يظهر الخطيب (وش جميل) وحافل بالرقي والذوق وكذلك الخطيبة .. * وبعد الزواج يظهر كلامهما (الوش التاني) .. * ليبقي السؤال : هل ما ظهر به الخطيب في فترة الخطوبة هو الوش الأول أم الوش التاني ؟ * نحن بنهدد بالوش التاني مع إنو وشنا الأول هو وشنا التاني .. * الذوق والظرافة هو وشنا التاني بينما الوش التاني البنهدد بيهو الناس هو وشنا الأول .. * وبما أن ذلك كذلك فان الأخ محمد عبد الرحمن الشهير بالغربال وراهم الآن (الوش الأول) ولا أقول الوش التاني .. * محمد عبد الرحمن توقف عن التدريبات راهنا عودته باستلام مبلغ نص مليار .. * توقف محمد بعد أن أصبح الأول في تشكيلة المريخ .. * يعني (بيلوي في يدهم) .. * الغريب في الأمر أن (لي اليد) في المريخ شغال طول أيام السنة بغض النظر عن (منو رئيس النادي) .. * لما كان سوداكال رئيس (من مساجنهم) كان في تمرد، ولما بقي محمد جعفر قريش (رئيس إلا ربع) كان في تمرد ، ولما الحكومة جابت محمد الشيخ مدني (رجاااااله كده) تواصل التمرد .. * يختلف الرؤساء والتمرد واحد .. * اتمرد قصاري ومحمد آدم وبكري والعجب والغربال وفوفانا بتاع (الاندومي) .. * ولسه .. * الباب فاتح .. * محمد الشيخ مدني الذي اجتهد من أجل الجلوس على الكرسي فشل في ايجاد حل لهذا التمرد رغم أنه (حكومي) .. * ومحمد عبد الرحمن يرفض الآن كل المفاوضات .. * إلا تودوهو نيفاشا .. * نص مليار الراجل عايز يشتري خروف .. * بمناسبة الخروف .. * زمان الضحية (الخروف) وهسه الضحية (نحن) .. * إذا استمر الحال على هذا المنوال أتوقع إنو الخروف (يشترينا) .. * الخروف يجي البيت يشتريك من ناس بيتكم ويطلع علي الزريبة .. * العكس بقى هو الصحيح .. * الناس بقت تسأل عن سعر (أقل خروف) .. * ما في زول بيسأل من (الخروف الأقران اللون أبيض والقرنو سليم) .. * بس .. أقل خروف بي كم ؟ * الله المستعان غايتو .. * لليوم الثاني تأجلت مباراة الهلال وأهلي شندي .. * البعض انتقد الجوهرة الزرقاء وغياب المصارف والمجاري ولكن بعد أن شاهد الجميع (حال الخرطوم) عذروا الهلال .. * الخرطوم بحالها ما فيها مصارف فكيف للجوهرة أن تكون بمصارف ؟ * عموماً.. المباراة كانت ستكون خير إعداد للهلال قبل مواجهة نهضة بركان .. * أنا لاحظت إنو دائما مباريات الهلال المعلنة في الدوري قبل المباريات الافريقية (عوارضها كبيرة) .. * مباراة القمة كانت معلنة قبل مباراتنا أمام بطل موزمبيق .. * وقد تأجلت المباراة بسبب (دواعي الخوف) .. * دواعي الخوف واسم الدلع (دواعي أمنية).. * والآن مباراتنا أمام أهلي شندي تأجلت قبل أيام من مباراتنا أمام المغربي .. * إن شاء الله يكون لخير بس .. * أهلي شندي انكتب ليهو عمر جديد .. * المطر ينقذ الشنداوي .. * اللجنة المنظمة تعاملت بواقعية مع ملعب المريخ الشهير ب(مدفور البلد) .. * اللجنة عاينت لملعب المريخ طوالي قررت نقل مباراتهم أمام الخرطوم الوطني لملعب استاد الخرطوم .. * اللجنة عاقلة شديد .. * اللجنة عارفة إنو ملعب المريخ عشان ينشف عايز ليهو شهرين وحاجة .. * الله أعلم غايتو المريخ يلعب في ملعبو السنة دي .. * أنا شايف استادكم ده تزرعو (فول سوداني) .. * شايف كده .. * وأي زول طبعا حر في (شوفو) .. * استاد المريخ حق الحكومة والحكومة من حقها تزرع أرضها فول أو سمسم او صمغ عربي .. * استفيدوا من هذه الأرض الزراعية .. * استفيدوا منها بدل ما هي قاعدة ساي .. * المريخ ممكن يستغل استاد الخرطوم كملعب بديل .. * وبعد الحصاد تقوم الحكومة تدي المريخ نسبة من المحصول المزروع .. * وإن شاء الله بالتوفيق .. * الموضوع ده فكروا فيهو .. * واستخيروا .. * علي الاقل بالطريقة دي ح تحلوا مشاكلكم .. * ونقول لاخونا محمد عبد الرحمن ما تخلي حقك .. * لو ما ادوك حقك علي داير مليم ما ترجع .. * انت شايل المريخ في كتفك .. * لازم تاخد حقك كاملا .. * ونركب صافنات ونجيبة (شلكاوية) واصلو الزول بيموت والذكرى تفضل حية .. * و..و.. * والقال حقي غلب ..