بابكر سلك *تتذكروا سباحنا في الاولمبياد لما نطة قبل الصافرة؟ *في الوكت داك كل الناس سخرت من السباح ودفعتو الثمن *في حين ان القصة تعود لعدم الجاهزية الناتج عن اهمال اعداد البطل الاولمبي *ذلك القصور كان قصور اتحاد السباحة وقصور الوزارة وقصور الحكومة ام قصور *ودفع ثمن ذلك القصور السباح *وحتي ثمن قصور الحكومة التي اضافت للحكومة لقب ام قصور *دفعه ذلك السباح المسكين *فما ذهب لتشييد قصور الحكومة التي قصرت في اعداد ذلك السباح *كان يمكن ان يوجه واحد في المية منو لاعداد ذلك البطل الاولمبي *ولو حصل ماكان نطة قبل الصفارة *ولكنه كان اضاف ميدالية تضاف لسودان الحضارة *وقس علي ذلك *المنتخبات والقصور في اعدادها *ونجي ندفع الأجهزة الفنية واللاعبين التمن *خلينا من الرياضة *في الحياة دي *يتحمل الناس اخطاء الناس الفوق ويدفعوا التمن *ويمشوا تحت اكتر *والناس الفوق تمشي فوق اكتر *لاحظوا اليومين دي *قضايا الايجار في المحاكم بقت اكتر من بلاغات النظام العام(وييين الاسم ده) *والسبب في ذلك يعود للوضع الاقتصادي المتردي والذي يتردي كل ثانية اكتر *سيد البيت او الدكان اسمو المؤجر *والطرف التاني اسمو المستأجر *قول زول مستأجر دكان مشغلو جزاره *الشهر باتنين مليون وأربعمائة الف جنيه(بالقديم _في الواقع) *يعني اليوم بي تمنين الف *فاذا علمت ان كيلو العجالي كان بي تمنين وقتها *مع ازدياد معدلات التضخم واندلاع الاسعار *اصبح كيلو العجالي بي ميتين وستين الف جنيه *يقوم المؤجر يجي للمستأجر يطالبو بأجرة المثل *المستأجر ماعندو ادني علاقة بفشل سياسات الدولة الاقتصادية *ولا المؤجر كذلك *لكن المؤجر يستند في منطقه علي ان الاجرة كانت تساوي كيلو عجالي في اليوم *الليلة الاجرة بتجيب نص كيلو عجالي بس في اليوم *ولما ندخل واسطة *بقول لينا رجعوا لي الاجرة كيلو عجالي في اليوم *وعلي ذلك شوف البيوت والشقق *من يتحمل نتاج هذا التردي الاقتصادي *المؤجر ام المستأجر؟ *واذا طالبنا الدولة بالتدخل لحماية المستأجر عن طريق قانون يعطل مطالبة المؤجر باجرة المثل *نكون قد ظلمنا المؤجر الذي عندما اجر عقاره كان اما مستثمرا او مجبورا كي يعيش *ومجبورا ده البقسم بيتو عشان ياجر نصو *او البفتح الغرفه علي الشارع دكان *في الحالة دي سيدفع المؤجر ثمن الفشل الاقتصادي الحكومي وهو لاذنب له فيه *واذا قلنا الحكومة تعمل اضان الحامل طرشة *سيدفع المستأجر ثمن التصرفات الاقتصادية الفاشلة مثل رب رب رب *وهو لادخل له في ذلك ولم يكن يوما شريكا في فساد ادي لتضييق رزق العباد *اذن من يدفع الثمن؟ *اذا تركنا الامر علي عواهنه *صدقوني الناس حاتاكل بعضها البعض *لان الجوع والعدم سيفرضان قانون الغاب علي المرحلة *وسيصبح هو القانون الواجب التطبيق علي البشر *وستندلع نيران الخلافات المجتمعية وتعم الفوضي والتحديات *فهل سنترك الامر رب رب رب *ام لنا حلول منطقية انسانية تنقذ الناس من نيران تضارب المصالح الذي حتما سيزيد من معدلات البلاغات تحت المواد/139 و142 و130 والجبر ممكن يقود لي 146 و154 *الجوع كافر *فالكوارث دائما يعملوها ناس ويقعوا فيها اولاد الناس *ولما اولاد الناس ياخدوا ترحال ويمشوا للناس الاولانيين *يلقوا الناس الاولانيين خدوا دولاراهم ورجعوا *يقموموا اولاد الناس ياخدوا ترحال تاني ويرجعوا *مين الحايدفع لبتاع الترحال؟؟؟ *ايها الناس *ان تنصروا الله ينصركم *اها *نجي لي شمارات والي الخرتوم *والينا *مؤجر ولا مستأجر *ولا مرتاح يا اخينا؟؟؟ سلك كهربا ننساك كيف والكلب قال شقق مصر علي قفا من يشيل….كيل ياميكائيل والي لقاء سلك