محمد عثمان بلل ب(الحتة) الفيها الحديدة يا شداد ..!! لا اظن ما حدث في منطقة العملية .. آسف بعتذر في ملعب الوصيف بالامس سوف يمر مرور الكرام. لولا اعداد رجال الأمن القليلة لحدثت كارثة لا تقل عن كوارث الحروب العالمية الاولى والثانية. (يااخ الحكام ديل اخدوا ليهم دقه ما ح يقدروا ينسوها طول عمرهم). اي زول شاف الفيديوهات الخاصة بحالات الاعتداء قال الكلام دا في حلبات المصارعة الشهير ب(WWe) ما بحصل. (يا وصيفاب شداد عنده كلام تاني). الدكتور ما عنده هظار ولا بعرف المجاملات. بعرف حاجة واحدة بس. تنفيذ القانون وعلى الجميع. الرجل معروف عبر التاريخ بالحسم. يعني ما بعيد يصدر قرار بشطب الوصيف من كشوفات الاتحاد. او اعلان هبوطه للدرجة الاولى او الثانية برضو ما بعيد .. طبعا دا اخف الاضرار يا وصيفاب. الاعتداء على طاقم التحكيم خرج من المعقول .. ويعتبر اعتداء وحشي. النتيجة كانت نقل احد الحكام بالاسعاف على وجه السرعة لتلقي العلاج. (دا كلام دا). نحن قاعدين وين. دا حالتو الوصيف كان متقدم في النتيجة بهدف النعسان .. يعني الهدف كان سجلو نمر كان الحصل شنو. طيب لو كنتو متأخرين في النتيجة زي سيدالبلد في كادوقلي حتي قبل 10 دقائق من النهاية كنتو عملتو شنو. فرق يا شداد. انا غايتو شايل هم لي ولدنا السابق. مع شداد دا ما اظن ح يدقها تاني. (عادل امام في مسرحية شاهد ما شاف حاجة). (عنده جملة ظريفة). (قال للعسكري انت مهمش رغم انك شغال اكتر من الضابط عمر الحريري). (قال ليهو من الليلة خالف تعليماتو وليه هو بكورك فيك كدا). (هو ما احسن منك). (في النهاية قال للعسكري لمن يحصل قريب منك ولو تاني صرخ فيك طلع الحزام واديهو بالحتة الفيها الحديدة). انا قلت حاجة. دا كلام الزعيم.