محمد عبد الماجد تركوا هدف فيني كومبي واتجهوا للحديث عن فرصة نزار حامد الضائعة في الحياة دي في ناس بقيفوا للمواصلات ، ما عشان يركبوا ، ولكن عشان يقولوا ليك : (مواصلات مافي). في الحياة دي في ناس بجيبوا ليهم في الفطور او الغداء عشرين صنف – يجربوا (19) صنفا ما يلقوا فيها فرصة. اخر صنف وقت يمشوا عليه قبل ما يضوقوه ، يقولوا ليك : (ملحو كتير). في الحياة في ناس كدا. بحبوا ينكدوا بس. يخلوا أي حاجة حلوة ويقبلوا على الحاجة الما حلوة. في ناس كدا. الله بيسألني منهم. يمشوا العرس. اذا لقوا العريس ما كبير وما عندو صلعة بقولوا ليك : العروس ما سمحة. اذا كانت العروس سمحة وما فيها كلمة بقولوا ليك : امها قالوا صعبة شديد. اذا كانت امها ما صعبة وزولة حبوبة ...بقولوا ليك : عليك الله دا فنان يجيبوه لينا. اذا كان الفنان تمام ...وما في مشكلة ...بقولوا ليك : العشاء بتاعهم دا مالو اتأخر كدا؟ اذا العشاء ما اتأخر بقولوا ليك : الصحن صغيّر...وما فيه قطعة (باسطة). اذا الصحن ما كان صغيّر بقولوا ليك : البارد سخن. اذا كان البارد ما سخن ...بقولوا ليك : هسع نلقي مواصلات وين بعد الحفلة دي؟ في ناس كدا. الواحد يظل يلهث عمرو كلو عشان يسافر برة البلد. لو سك الدخول لكلية الطب جامعة الخرطوم زي ما سك (اللوتري) كان بقى طبيب. لو سك انو يبقى رئيس وزراء زي ما سك اللوتري كان بقى (حمدوك). المهم الزول دا وقت يجيه اللوتري قبل ما يسافر بمسح تلفونات الدفعة كلها من تلفونه. وقت يسافر يمشي امريكا عشر سنوات ما يسأل ليه في زول. مسكول ما بعمل. وما برد على تلفون من السودان إلّا رقم غريب. زولكم دا اول ما يرجع من امريكا بعد عشر سنوات الناس وقت تسألوا عن امريكا كيف؟ بخلي امريكا كلها بكل حاجاتها الغريبة ومدهشة وبقعد يقول ليك والله عندهم جنس (مطرة). تقول هنا ما بعرف (المطر). في ناس كدا. يظل عمرو كله جاري عشان يشيل تلفون زميلته في الجامعة. اول ما يشيل رقمها – البنت تضرب ليه ما يرد عليها. عشان يعمل فيها بس (تقيل). في ناس كدا. اتعجب بعد أي مباراة في جماعة كدا بطلعوا في مواقع التواصل الاجتماعي عشان يهاجموا فارس عبدالله. هكذا بدون أي سبب. نحن اتعودنا على ذلك. حتى لو كان فارس عبدالله نجم المباراة. الناس ديل اتبرمجوا على اتجاه واحد. عندهم (قرص) ما بعرفوا يغيروه. شريطهم صفحة واحدة. الناس ديل على استعداد على مهاجمة فارس عبدالله حتى لو لم يكن مشارك في المباراة. علما ان فارس عبدالله في اعتقادي الخاص هو افضل لاعب في الهلال في الفترة الاخيرة. يؤدي كما يريد منه المدرب. الدليل على ذلك ان كل المدربين الذين تعاقبوا على الهلال فارس عبدالله عندهم اساسي في الطرف الشمال. واساسي كمان في المنتخب. يعني كل لاعبي الطرف الشمال في السودان وضعهم فارس عبدالله خلفه. ما في لاعب ملتزم تكتيكي اكتر من فارس عبدالله. نحن ما شفنا طرف شمال (تقني) زي فارس عبدالله. من فارس جاء الهلال ارتحنا من وجع الطرف الشمال. الاغرب من ذلك في ناس بتهاجم السمؤال ميرغني. والسمؤال ميرغني في اعتقادي هو افضل مدافع في الموسم الماضي. يلعب يمين. ويلعب شمال. ويلعب عمق دفاع. لاعب تلقاه في كل خانة تحتاجه فيها. لاعب (تكتيكي) اخر من طراز فريد. السمؤال بكل هذا الابداع والألق تتخيلوا في ناس اتعودوا على مهاجمته . في ناس ما بعرفوا كورة. وعندهم حول في (التقديرات). اتبرمجوا على انتقاد لاعب معين والاشادة بي لاعب معين. البرمجة دي ما بغيروها لمن يعتزل اللاعب. يا جماعة الزول البكون شغال بهذه (الانطباعات) وما قادر يغيرها احسن يسكت. ما يسمم الاجواء ساكت. وما يقول ليه كلام من باب المشاركة وخلاص. اجزم ان الذين ينتقدون فارس والسمؤال الكورة ذاتها ما بكون شافوها. بكتبوا ساي. الامر العجيب. قبل مباراة الهلال والاشانتي كانت هناك حملة قوية على مدرب الهلال الصربي زوران. الجماعة خلوا شغلتهم وقعدوا يهاجموا في الصربي. ليه فلان ما لعب؟ وليه ابعد فلان؟ وين روفا؟ ومفروض الشعلة ما يلعب. كلام من باب (المشاترة) وخلاص. ما في مدرب عارف شغلو وشغال عليه جاء الهلال مثل هذا الصربي. والاكيد ان زوران سوف يحدث نقلة كبيرة في الهلال حتى لو جاب ليه (11) مشجع ولعب بيهم باسم الهلال. يلعب بوجبا. يبعدو. يشرك روفا. ويبعد جيسي. دي ما قضيتنا. قضيتنا ان هذا المدرب شغال صاح ...وعارف هو بعمل في شنو؟ وسوف يشرك أي لاعب في الوقت المناسب. ما معقول يشرك ليك 30 لاعب في مباراة واحدة. خلوه يشتغل. وما تملونا (فقر). واي لاعب عنده دور. واي لاعب سوف تأتي له الفرصة. بما في ذلك الحارس الرابع في الهلال كديابا. الناس تصبر بس. الاغرب من ذلك ان اللاعب نزار حامد وهو افضل لاعب سوداني في الجيل الاخير ...الكثير من الناس بدون فهم هاجموه وقطعوه بعد مباراة الاشانتي. خلوا أي حاجة في المباراة ودوروا تقطيع في نزار حامد. عشان شنو ؟ عشان اضاع فرصة مضمونة في بداية المباراة. في لاعبين كبار اضاعوا ضربة جزاء (مفصلية). وفي لاعبين اضاعوا بطولة كاملة. في لاعبين ضيعوا ليهم (وطن) ومنتخب من كاس العالم. وفي لاعبين سجلوا في مرماهم. عادي بتحصل. ما في زول بطلع ويقول حاجة. الكلام دا عادي في كرة القدم. الغريب ان نزار اضاع في بداية المباراة – يعني ما اضاع فرصة اخيرة للهلال. واضاع نزار حامد في مباراة الهلال انتصر فيها. البكاء والعويل دا في شنو؟ التنظير على ايه؟ حقيقة في ناس خصم على الهلال. وهم بكونوا محسوبين على الهلال. ومفروض يراجعوا هلاليتهم. او يراجعوا عقليتهم الكروية عموما – لأن كورة القدم كدا. الناس ديل تركوا فيني كومبي الذي سجل هدف الانتصار ومشوا يتكلموا عن فرصة نزار حامد التى ضاعت في اول دقائق المباراة. تركوا الهدف ...واتكلموا عن الفرصة التى ضاعت. في قصد اكتر من كدا. المضحك انهم قبل ذلك كانوا بهاجموا في فيني كومبي. خلوا فيني كومبي الذي سجل ...واتجهوا الى لاعب اخر عشان يقطعوه. في الهلال جهاز فني خبير. عارف. ومدرك. ونزار حامد عنده من اهم العناصر الموجودة في وسط الهلال. ما معقول الناس ديل ما عارفين شغلهم وانت القاعد تتابع من المباراة 5 دقائق عاوز توريهم يعلموا شنو؟ واحتمال كبير يكون في الاساس ما شاف المباراة واكتفي ببعض الانطباعات المنقولة له من مواقع التواصل الاجتماعي. معظم هذه الانطباعات تنقل من الغير. وهي لا اساس لها. يا هلالاب عندكم فريق عالمي. وجهاز فني على درجة عالية من الكفاءة. و30 لاعبا أي واحد احسن من التاني. ما تعطوا فرصة للناس التى لا يبدو منها غير (المساويء). في الكورة ممكن تخسر. وممكن تخرج. وممكن تفقد بطولة. عادي. ما في زول بنزل تقطيع في اللاعبين والجهاز الفني. هذه العقلية هي التى ادارت الهلال في فترة الكاردينال – لا نريد ان نكررها الآن. احموا هلالكم من هذه الاصوات المحبطة والتى تحاول دائما ان تدمر بعض اللاعبين من خلال انطباعات شخصية لا اساس لها من الصحة. ............ متاريس الهلال سوف يلعب يوم الاثنين 28 ديسمبر في ملعبه امام حي العرب في الدوري الممتاز. ودي ح تكون سهرة كروية رائعة. الايامات دي مباريات الهلال ما بتتفوت. ما تفوت لحظة في مباراة للهلال. والهلال بعد هذه المباراة سوف يلعب في ملعبه ايضا مساء في 1 / 1 / 2021...امام الاهلي مروي. وبرضو ح تكون سهرة كروية رائعة. ثم يستقبل الهلال فريق الاشانتي يوم 6 يناير. يعني خلال 9 ايام سوف يلعب الهلال 3 مباريات. وكلها سوف تكون رائعة. وممكن يجد من خلال هذه المباريات كل عناصر الهلال المقيدة في الكشف الفرصة للمشاركة. ضغط المباريات سوف يجعل الجميع يشارك. ما تضيقوا. أي حاجة بي نظام. ........ ترس اخير : الملاعب هي الرابح الاكبر هذه الايام من مباريات الهلال.
