محمد عبد الماجد توك توك دائمة ولا طيارة مجهجة!! عندنا جارنا اسمو (الكريف ود علي) لو عاوزو يعمل ليه (ركشة) قول ليه (حسن ود الطاحونة) عمل ليه (ركشة). اليوم التاني ولا بكضب بعمل ليه (ركشة). بيبيع أي شيء عشان يعمل ليه (ركشة). بيبيع القدامو والوراه عشان يعمل (الركشة). لو دخل على (صيغة) زوجتو ما عندو مشكلة. اهم شيء بس يعمل ليه (ركشة). لو عاوز (الكريف ود علي) يعمل ليه (حصان)...قول ليه (حسن ود الطاحونة) عمل ليه (حصان). اليوم والتاني بتلقاه راكب ليه في حصان. تقول امير الكوفة. لو قلت ليه (حسن ود الطاحونة) مشى الدهب. بمشي الدهب. بخلي أي حاجة ويمشي الدهب. لو قلت ليه حسن ود الطاحونة باع بيتو. ببيع بيتو. ولا بتلفت. مرة قلنا ليه حسن ود الطاحونة طقتو ملاريا. قبل ما نتم كلامنا وقع لينا – قلنا ليه مالك يا الكريف ود علي؟ قال لينا شاعر لي بي (ملاريا). وشوية (دوشة) كدا. قلنا ليه عاد (الدوشة) كيف ما تجيك وانت رأسك يلتقط في الحاجات زي (الطبق). الكريف ود علي يركب (الدرب) قبل حسن ود الطاحونة. حسن ود الطاحونة مرة غرق...لحقنا ليك (الكريف ود علي) في (السبلوقة) بين الحياة والموت شايلو الموج. حسن ود الطاحونة عندو ولد دخل كلية الطب. الكريف ود علي عمل السبعة وذمتها عشان ولدو يدخل الطب. ما خلى ليه شيء. عمل ليه أي حاجة. وقت الموضوع غلبو ..فتح لي ولده عيادة للعلاج بالإعشاب. زولكم شغال (تقليد) بس. من كترة التقليد .. زوجتو مشت لي ناس حسن ود الطاحونة في البيت وقالت ليه عليك الله يا حسن ود الطاحونة اعمل حسابك من (الكورونا)...عشان لو جاتك كورونا ...بتنتقل لينا منك بالتقليد. هسع ناس المريخ بعملوا في البعمل فيه (الكريف ود حسن). ناس المريخ ما عندهم (خيال). وما عندهم عقلية بتاعة (ابتكار). ما بجهدوا نفسهم بالتفكير. عاوزين الحاجات تجيهم جاهزة. ما عندهم وقت للتفكير. البطولات بشيلوها من (المكاتب). حاجة فيها تعب وعرق هم ما ناسها. اتعودوا على (التقليد). بيقلدوا الهلال في الصاح والغلط. الصحافة اليوغندية مرة اطلقت عليهم لقب (الضل)...وقالوا المريخ بمشي في (ظل) الهلال. كتلوهم كتل. ما خلوا ليهم شيء. الهلال هو اول نادي ، ادخل الاحتراف في السودان وهم اول من تعاقدوا مع لاعب اجنبي. فتحنا ليهم الدرب. والله بعد كدا ما عرفنا البتمرقهم من الموضوع شنو؟ في فترة صلاح ادريس وجمال الوالي ، عندما ضيّق الاتحاد العام بقيادة الدكتور كمال شداد الخناق على الاحتراف وحددوا مشاركة ثلاثة لاعبين فقط من (الاجانب) في السودان اتجه صلاح ادريس الى التفكير في (التجنيس). صلاح ادريس جاء للاتحاد من فوق. فتحنا ليهم الدرب. سوا الدرب ساساق. خلوا الاتحاد العام بقوا يمشوا يسجلوا في القصر الجمهوري. مسكوا في (التجنيس) اكتر من اصحاب الفكرة. أي حاجة ينتظروا الهلال يعملها ليهم ويفتح ليهم الطريق ثم يأتوا بعد ذلك...يبقوا اسياد الفكرة. ويا ريت لو بفلحوا فيها. الفضائية ...الهلال اول ما عمل ليه قناة ...الشهر والتاني عملوا ليهم قناة (قاعدة ساي). الناس الشغالين فيها ما قاعدين يتابعوها. قناة حدها (التمهيدي). ما بتمشي اكتر من كدا. الهلال قدم الدعوة للمستشار تركي ال الشيخ عشان يكون الرئيس الفخري للهلال. ناس المريخ اعترضوا على الموضوع دا. وسخروا من هذا الكلام. وقالوا لجنة التطبيع ذاتها دا ما اختصاصها. واعتبروا الموضوع فيه تقليل من كرامة الهلال. عليكم امان الله – اليوم والتاني – الجماعة ديل عملوا ليهم رئيس فخري. جابوه من وين ما عارف؟ المهم شافوا ليهم (رئيس فخري) تجميع. جابوا التازي الذي نال التابعية السعودية. وعشان الناس ديل رائحة ليهم (طيارة). وعندهم مشكلة في السفر. قالوا الرئيس الفخري اتبرع بطائرة خاصة للمريخ. من قول تيت كدا. عملتوها كبيرة. كدا انتوا يا جماعوا اصبروا. روقوا المنقة. ما طوالي كدا. اليوم والتاني دخلوا ليهم في (طيارة خاصة). يعني سيف تيري من (التوك توك) الى الطيارة الخاصة. المريخاب نسوا اعتراضهم على تركي ال الشيخ. نسوا سخريتهم من (الكفالة). وعملوا ليهم رئيس فخري (تجميع). الشيء الغريب ...مزمل ابوالقاسم عمره كله بشكك في شرعية ادم سوداكال. وما مقتنع بي سوداكال. وعندو رأي. واي حاجة تصدر من ادم سوداكال ما بقبلها..وبنتقدها. إلّا موضوع الرئاسة الفخرية دي. مزمل ابوالقاسم طلع ليك الخبر في صفحتو ونسى ان الدعوة قدمها ادم سوداكال للتازي. عارفين مزمل قبل بالموضوع دا ليه؟ واعترف بي ادم سوداكال اخيرا عشان شنو؟ عشان الهلال عمل ليه رئيس فخري. قالوا احسن نلحق الموضوع ونعمل لينا رئيس فخري برضو. عاوزين يلحقوا السوق. وعندهم قروش طيارة ناقصة. ما كضبوا – طوالي علقوا في التازي. والله بيني وبنكم كدا ..كان احسن ليكم تعملوا جمال الوالي رئيس فخري من السعودية. احسن ليكم من التازي. البعملوا ليكم جمال الوالي ما بعملوا ليكم التازي. غايتو بقول ليكم من الآن..وعشان تبقوا عارفين. وعشان الموضوع يقع ليكم. الطيارة الخاصة دي ..بتوديكم الكونفدالية. احسن ليكم اتخارجوا منها. شوفوا (التوك توك). احسن ليكم. لسه انتوا ما بقيتوا على الطيارة الخاصة. الموضوع دا كبير عليكم. ما تخربوا طبعكم ساكت. التازي ما عندو قدرة على الكلام دا. توك توك دائمة ولا طيارة مجهجة. غايتو يا ناس الهلال انتوا لو عاوزين تنقلبوا ناس المريخ اعملوا ليكم (طاحونة). واقلبوها محل تصوير. اليوم التاني لو ما لقيتوا ناس المريخ عملوا ليهم طاحونة وقلبوها محل تصوير مستندات ..ما تدوني ايدكم. الناس ديل شغالين (تقليد). وصولهم لهذه المرحلة (تقليد). بطولاتهم (تقليد). انتصاراتهم (تقليد). لو ما بقلدوا في الهلال كان نزلوا التانية. من قلد الهلال ما خسر. ............. متاريس نتمنى وصول الاندية الاربعة للمرحلة المقبلة في البطولات الافريقية. هلال الابيض يحتاج الانتصار باكثر من هدفين. والامل عطبرة خارج الديار يحتاج على الاقل الفوز بهدف. الهلال والمريخ فرصهما افضل. لكن لا الهلال ولا المريخ ضمن التأهل. الكورة ما معروفة. اعلموا حسابكم. الدروس التى تلقاها الهلال في الدوري الممتاز ...اظنها سوف تجعل الهلال يفتح عينه. الهلال كان محتاج لهذه التجارب. ومحتاج لهذه الدروس. في كرة القدم مهما كان الفريق كبير ومهما كان قويا يمكن ان يتعرض لمثل هذه التجارب القاسية. الاندية الجماهيرية كلها تأثرت نتائجها بسبب ابتعاد الجمهور من الملاعب. برشلونة الاسبوع والتاني تعادل او هزيمة. ريال مدريد كذلك ..نتائجه غير جيدة لا في دوري الابطال ولا في الدوري الاسباني. حتى بايرن ميونخ تعرض لخسائر في الدوري. في السعودية الهلال والنصر تعرضوا للخسائر والتعادلات اكثر من مرة. فريق النصر في مؤخرة الدوري السعودي. الاهلي المصري ربما لأنه يلعب منذ 2011 لم يتأثر كثير بابتعاد الجماهير. هذا الامر سوف نعود له تفصيلا ان شاء الله. الهلال عليه ان يتغلب على اللعب بدون جمهور. الهلال في حاجة الى ان يكيف نفسه مع الكثير من الاوضاع. لا ادري لماذا لعب الهلال والمريخ وهلال الابيض والامل عطبرة مبارياتهم في الدوري مساء ..وهم سوف يلعبوا في البطولات الافريقية عصرا. والله الاتحاد العام دا شغال بس عكس الاندية. تجربة اللاعبين تحت السن وفرضهم من قبل الاتحاد في كل مباراة بتعمل لينا كارثة. ولسه. يبدو ان الاتحاد عاوز يغني من (الشكاوي). ما في جمهور. وما في دخل. قالوا احسن نستفيد من (الشكاوي). هذا الامر ايضا سوف نعود له تفصيلا. ونمشي خطوة ...خطوة. وما في حاجة فاتت. كله في محله. ....... ترس اخير : ما تفتح خشمك اكتر من اللازم – الموضوع ما بيستاهل.
