* زمان الكهرباء كانت (بتكتل) لو هبشتها ، وحالياً الكهرباء بقت (بتكتل) لو اشتريتها. * زاد سعر الكهرباء بشكل مبالغ فيه . * مع إرتفاع سعر الكهرباء تاني الضيف البيجيك شغل ليهو (اللمبة) . * قول ليهو تشرب شاي ولا قهوة ولا أفتح ليك النور . * تشغيل (المروحة) في البيت سيكون من خيارات (الضيافة) . * وبما أن ذلك كذلك فنحن ننصح السوباط بأن (ينسى) حكاية إضاءة إستاد الهلال. * بعد الزيادات الأخيرة دي المباراة الواحدة دايرة ليها كهرباء بخمسين مليون . * عشان كده بنقول لناس المريخ مباراتكم الجاية في الممتاز ستكون بملعب إستاد الهلال ويُستحسن تجوا ومعاكم كهربتكم . * ما تجوا ساي . * تعالوا بكهربتكم نزلوها بعد داك امشوا ألعبوا. * وكان ما جيتوا من اساسو يكون أحسن والله . * المباريات الإفريقية ما مشكلة الشمس فوق . * لكن أي مباراة بالليل في إستاد الهلال لازم المريخ يجي بكهربتو. * معليش يعني . * ما بنحاسبكم على النجيلة لكن كمان ما تعصروا علينا في الكهرباء . * الواضح ما فاضح . * إلزام الفرق على إشراك لاعب تحت السن ولاعب من الأولمبي قرار معيب . * والعيب الأكبر إنو في حالة إستبدال لاعب الأولمبي لابد أن يدخل بدلاً عنه لاعب أولمبي ايضاً . * عندما تعرض وضاح للإصابة في مباراة مروي خرج ودخل بدلاً عنه اوتارا. * خرج وضاح (أولمبي) ودخل أوتارا (أولمبي) . * طيب لو أوتارا كان مصاب أو موقوف وما عندنا لاعب أولمبي تاني نعمل شنو يعني ؟ * نلعب ناقصين ولا كيف ؟ * الإتحاد العام بهذه الطريقة سيلزم الأندية ليكون اللاعب البديل (شبه) اللاعب المستبدل . * لو داير تطلع (ابوعاقلة تشوف زول من الكنبة يكون بشبه أبو عاقلة عشان يخش بدلو) . * بعد شوية ح يقول لو طلع لاعب متزوج لابد أن يدخل بدلاً عنه لاعب متزوج . * بدل البطاقات تاني أي لاعب يجي بقسيمتو . * حاجة تكسف . * غادرت أمس بعثة المريخ الي نيجيريا وقد ظهر اللاعبون وهم يرتدون (بُجامات) . * البجامات لونها (بيجي) . * واللون (البيجي) هو ود خال اللون (الأبيض) . * والأبيض حق الهلال. * المريخ بعد أن (قلد) الهلال في كل حاجة سيرتدي ألوان الهلال اخيراً . * ادوها سنة لقدام لو ما شفتوا المريخ لابس (أبيض بأزرق) ما تدوني يدكم . * عملنا قناة مشوا عملوا قناة . * سافرنا ب(البدلة والكرفتة) قاموا سافروا بالبدلة والكرفتة . * جانا رئيس فخري من السعودية ، جروا جابوا رئيس فخري من السعودية . * وقعنا عقد مع بخيت خميس مشوا وقعوا عقد مع بخيت خميس . * أنا خايف بكرة امشي جمب إستاد المريخ ألقاهم كاتبين : (الله . الوطن . المريخ) . * وطبعا الصحيح هو (الله . المؤتمر الوطني . المريخ) . * وتبكوا بس .. عين قطرة وعين مس . * لا نجزم بأن الحارس جمال سالم قد تعمد الخطأ ولكن مؤكد أن أخطاء سالم فيها كثير من السذاجة والعبط . * جمال سالم رفض أن يستغل فرصة جاتو من السماء . * لو استغل جمال فرصة مشاركته الأخيرة لكان قد حجز لنفسه مقعداً في تشكيلة الأربعاء. * ولكنه واصل الاستهتار فخرج من قلوب الكثيرين. * أبو عشرين بالقناع أفضل من جمال سالم . * وإذا فشلت محاولات إلحاق أبو عشرين فإن ثقتنا في أبوجا لا حدود لها . * المهم . * مما عرفت إنو الكوتش محمد عبد الله مازدا سافر مع بعثة المريخ إلي نيجيريا طوالي عرفت إنو (الإصيفر) بفكر في الكونفدرالية. * عملوها واضحة . * ساقوا مازدا عشان يخسروا بذات النتيجة التي فازوا بها هنا (3) . * مازدا صاحب ماركة مسجلة وذهابه مع المريخ يعني انهم يفكرون بالصوت العالي في الكونفدرالية. * (ود الليدو) بعد أن تجاوز التمهيدي بأعجوبة ينوي الهبوط للكونفدرالية خوفاً من كبار القارة . * هو الكونفدرالية أنتو قايلنها ساهلة ؟ * أنا أفتكر أن هذه المرحلة التي وصلها المريخ تعتبر إنجاز. * كنتو وين وبقيتو فين . * تلاتة سنين لوراء بتركبوا الطيارة مرة في السنة . * السنة دي ولحدي الآن ركبتوها مرتين (ماشاء الله) . * يعني ده إنجاز برضو . * ولذلك افتكر المريخ لو طار ما كعبة معاهو . * أفتكر كده . * وأي زول طبعاً حر في (افتكاراتو) . * ونركب صافنات ونجيبة (كباشية) واصلو الزول بيموت والذكرى تفضل حية . * و..و.. * والقلوب الحايمة حولك يا حلو بتتمنى ليك …… (برد في نيجيريا يذكرنا البرد بتاع الأردن) .
