محمد عبد الماجد فهرس اقوان الهلال اتعودنا في الزمن دا ، واتعود الناس على كدا لمن تكون عاوز ليك حاجة بتفتح ليك موضوع ما عندو علاقة بالحاجة العاوزها. لمن تكون عاوز تدخل في موضوع مهم ...بتفتح ليك موضوع تاني. نصيحة ليكم مني – المواضيع المهمة ما تدخل فيها طوالي. أي موضوع مهم – شوف ليك موضوع (جانبي) عشان تدخل بيه على الموضوع المهم. القهوة دي عملوها عشان شنو؟ ما في حاجة بوظت المواضيع المهمة غير الدخول فيها (مباشرة). الواحد يدخل ليك توش في الموضوع. كدا غلط. في حاجة اسمها (دبلوماسية) هسع الزول وقت يكون ماشي يطلب ليه يد بنت عشان يتزوجها – موش اول حاجة بتشوف ليك موضوع قبل ما تدخل في موضوع العرس. ان شاءالله تتكلم عن الطقس. طبعا الايامات دي الناس بتتكلم عن الاسعار. والغلاء. لو عاوز تشتري ليك بيت ...ما بتفتح موضوع البيت طوالي. اتكلم في حاجة تانية خالص. خليك حريف. الدنيا ما طارت. لو عاوز تشتري ليك عربية ..اوعك تجيب سيرة للعربية. لو عاوز ليك قروش من زول – ما تفتح سيرة القروش. خليك مفتح. القروش ما بجيبو سيرتها. انا بقول ليكم في حاجات ما بقولها ليكم الناس. بختها ليكم عديل كدا. لمن تكون عاوز تسافر برة البلد ...وعاوز تهاجر ، ح تقعد تتكلم عن معركة كرري. وربما مسلسل (عصفور النار). ان شاءالله بس في ناس يكونوا بتذكروا لي هذا المسلسل. المهم حتى لو ما في ناس بتذكروها – برضو دا موضوع ، عشان ادخل في الموضوع الرئيسي. عندنا زول في الحلة من يقعد يبرّم في شنبو ويعاين في السقف ..بنعرفو طوالي عندو موضوع مهم. الشيخ ود حمدان الكلس من يشوفوا قاعد يبرّم في شنبو وبعد في (جريد) السقف بقول ليه : عليك الله ادخل لينا في الموضوع طوالي ما تقعد تبرم لينا في شنبك متل الشاي البارد. انا لغاية الآن ما عارف علاقة تبريم الشنب بالشاي البارد. ولا عاوز اعرف. عشان ما فاضي للحاجات. هسع عليكم الله البتعمل فيه الحكومة دي ما عدم موضوع. ناس الحكومة ديل – اكتر ناس بطبقوا في النظرية التى حدثتكم عنها في اول العمود. طبعا انتوا ما ح تعتبروا كلامي دا (نظرية) و ح تضيعوا لي مجهودي دا ساكت. لكن لا بد يأتي يوم وتعرفوا الكلام البقول ليك فيه دا (نظرية). ونظرية ما ساهلة كمان. الواحد عشان يقنعكم تقطعو ليه نفسو. الزول نفسو لو ما طويل ما بقدر يعمر معاكم. الحكومة دي ..حكومة حمدوك ذاتها. الحكومة دي لمن تكون عاوزة تزيد (الجاز) بتقول ليك امريكا رفعت اسم السودان من قائمة الدول الراعية للارهاب. لمن يكون عاوزين يقطعوا الكهربة بقفلوا في الكبري. في علاقة بين رفع اسم السودان من قائمة الدول الراعية للارهاب وزيادة سعر الجاز. في علاقة بين قطع الكهرباء واغلاق الكبري. لو ما عدم موضوع ساي. اقول ليكم حاجة (تشريحية) اخرى. عندنا حاجة في البيت لمن تضرب لي ولدها في السعودية بتقعد تشكي ليه من الضهر والعيون والكرعين وتقول ليه جيب لي موبايل. في علاقة بين وجع الضهر والعيون والكرعين والموبايل لو ما حركات من الحاجة دي. الحياة كدا. عدم الموضوع فيها هو الموضوع. دي فلسفة عديل كدا ..زي الزول وقت يكون تعبان شديد ..وما قادر يقوم يقول ليك جيبوا لي ام فتفت. دا شغال استهبال بس. الزول دا عاوز بس (ام فتفت). وعارفها ما بتجي بالساهل. نهايتو يا جماعة ..انا هسع من قبيل بلف وادور عشان عاوز اتكلم ليكم عن مباراة الهلال والاشانتي اليوم. عليكم الله. وامانة فيكم. في علاقة بين الكلام البقول ليكم فيه دا ومباراة الهلال والاشانتي اليوم. ما تقولوا الزول دا خايف من المباراة. او ما عاوز يقول لينا عديل كدا اعملوا حسابكم. ابدا. بس عاوز اعمل ليكم (تمهيد). عشان ما تقعدوا تغالطوا فينا. بعدين في حالات فيكم الآن بتكون في حالة (رجفيبة) شديدة. ربنا يرحم استاذنا عبدالمولي الصديق ...كان ولا بدس (رجفتو) وقت الهلال يكون عندو مباراة. عبدالمولي وصل حالة من العشق التى تجعله يرجف متل القصبة حتى لو كان الهلال بيلعب مع فريق من الدرجة التانية. ولا بدسها. نحن مرات بنموت بيها. وما بنتكلم. ولا بنقول شيء. والهلال دا والله نحن ما بنرضي فيه حاجة. ولا بنقبل. ما بنستحمل لينا فيه (كورنر). ولا جدعة تماس. إلّا الهلال – زي ما بقول استاذنا صلاح مليشيا. المهم وعشان ما تقولوا خايف ...والله الهلال الشايفو دا يخليني اقيف في الشارع زي الاسد. ما تقولوا لي التعادلات الاخيرة. اصلو ما بنخاف. الليلة تعالوا شوفوا الهلال. ان شاءالله المتعة حاضرة. عاوزين لينا (فهرس) للاقوان. غايتو لو الغربال شارك في المباراة ..ناس الاشانتي ديل (الكونفدرالية) ما بتقبلهم. الليلة عاوزين لينا خريطة بتاعة اقوان. فهرس. زي الكتاب. انت يا بوجبا عاوز تجيب لينا قون متين؟ بصر في البعيدة. وانت يا عيد مقدم ورينا حاجة. الليلة أي زول يلعب عاوزين نشوف منه شيء. يا نزار حامد عندك قون طلع في اكرا – جيبوا في ام درمان. ما في مشكلة. نحن عارفين نزار حامد ما بخلي حقو. يا جيسي . اعمل لينا حفلة جانبية. عاوزين لينا (عصرية). ما تقعدوا تيجبوا ليكم قون ...وتقعدوا تحرسوه. عاوزين لينا اقوان كدا (كمية). نحن لا بنعرف الاشانتي. ولا بنعرف غير الاشانتي. العالم كله بتابع فيكم. الناس بتتفرج فيكم. ورونا شيء. اقنعونا. وخلوا الحفلة الليلة تبدأ من بدري. ما تحرقوا لينا اعصابنا. عشان نقعد ننتظر لينا هدف في الشوط الثاني ..والله ما عندنا حيل للكلام دا. عشان نجيب لينا هدف ونقفل عليه ..ما بنستحمل الكلام دا. جيبوا اقوانكم من بدري. وما ترجعوا الكورة للخلف. عندنا اعمدة ..خلونا نكتبها من بدري. خلونا نتلم على اهلنا من عصرا بدري. ما تجهجونا ساكت. ناس المريخ بي طريقتهم. منجد النيل الليلة ما اظنو ينستر. بي طريقتكم. ما عاوز اقول حاجة. لكن عاوز اقول بس الليلة المتعة لازم تكون حاضرة. الليلة عاوزين لينا (كمنين) هدف كدا زي ما بقول حميد. جيبوا لينا كمية. خلونا نمشي نشوف شغلتنا. ما تدونا الليل. ما تدونا السهر. ............. متاريس الزول يقول ليكم شنو عاد؟ بكرة بنتم ليكم الكلام. وندخل ليكم في الموضوع طوالي. ناس المريخ قالوا شغالين في انيمبا (شكاوي). انتوا يا ناس المريخ فاكرين ناس انيمبا ديل ناس هلال كادوقلي عشان تدوروا فيهم (شكاوي) كدا. الشكاوي دي هناك ما بتجيب حاجة. العبوا كورتكم بس. اركزوا. الجرسة البتعملوا فيها دي ما كويسة. نوع الجرسة دي بتوديكم الكونفدرالية. كمان نحن جرسة الكونفدرالية ما بنعرفها. والله جرسة الكونفدرالية ظاهرة. اصلو ما بتغبانا. والبتعملوا فيه دا جرسة (كونفدرالية). غايتو الهلال الايامات دي لمن يكون عندو مباراة بتشعر بالراحة. والمتعة. تقوم من الصباح زي (النبلة). فرحان. ومنتظر شيء. الله يديم الافراح. بكرة بنوزع ليكم (الفرح) في الفول. ما عندكم مشكلة. عشان نقعد نفكر في المجموعات. والقرعة. والخطة القادمة. قولوا يا رب. الله ينصركم. ........... ترس اخير : الساعة كم هسع دي؟
