معسكر ناجح *تصريحات الجهاز الفني للمنتخب تدور حول الجاهزية ونجاح المعسكر *وهو للمعلومية إعداد بتاع تلاتة أسابيع *يعني النزلة العادية دي *النزلة الشعبية *إذا عالجتها بتاخد التلاتة أسابيع دي *وإذا ماعالجتها بتمشي برضو بعد التلاتة أسابيع *يعني إعداد منتخبنا كان على طريقة القحة *والقحة ولا صمت الخشم *ويقولون إن الزعيم معسكره ناجح وهو ينازل التعاون وسلعتي ومنتخب بقالات حلوان وبطل المقطم *وكذلك أبو الهل معسكره ناجح *وهو يمتحن نتاج معسكر القاهرة أمام كوبر *كل المعسكرات ما شاء الله ناجحات *ومن الله خلقنا *لم نسمع بمعسكر بالذات للمريخ أو الهلال قالوا ما ناجح *كلهن ناجحات *ويأتي الرسوب الإجمالي مع بداية المجموعات *لم ينجح أحد *وهكذا سنويا يكون شأننا *المريخ ياخد أربعة في النهائي الكونفدرالي على أرضو *والهلال يبتلي بمازيمبية علي أرضو بدور الأربعة *لاقاكم زول أخد خمسة بدور الأربعة ؟ *وأخدها وين؟ *،على أرضو وبين جمهورو *فهل كان الغريب وصول الهلال لدور الأربعة *أم الغريب الهزيمة بمازيمبية على الأرض وبين العرض؟؟؟ *أم أن الصدفة لعبت دورا في الوصول لتلك المراحل؟ *ده غير الحاجات التانية الحامياني *وقصص كتييرة سمعناها *ولكن يبقى السبب *عشوائية إدارة الكرة وعشوائية لعب الكرة وغوغائية اللمة وببغائية التردد *فإن لم نتخل عن العشوائية والغوغائية والببغائية *ستظل معسكراتنا ناجحة *وفرقنا بما فيها المنتخب فاشلة *معقولة؟! *كورة مع الري المصري *ونقول بصمات مدرب؟؟؟ *العبوا غيرها ياخ *أيها الناس *رحم الله امرءا عرف قدر نفسو *وقدر نفسنا عارفنو *لذا يجب علينا بنهائيات أفريقيا أن نستصحب ذلك القدر معنا *ونركز على الطرق الدفاعية التي تحفظ ماء الوجه *وتكفينا شر السخرية *وإذا دخل فينا قون *يجب أن نقرع الواقفات *لأنو لو سكينا درون الجفلن *بكترن الجافلات *صدقوني ده المفروض يحصل *وبرهان كان قام على القفيل *تسعين دقيقة لا نحن بنلعب ولا خصمنا بلعب *لأنو طريقة برهان في التقفيل ما موجودة بكتاب الكرة *أيها الناس *نحن لو ختينا في قلوبنا الرحمن *والله *والله *والله *ما محتاجين لبرهان *برهان شنو كمان لو ختينا في قلوبنا الرحمن؟؟… *أيها الناس *إن تنصروا الله ينصركم *أها *نجي لي شمارات والي الخرتوم *والينا المكلف علينا *ألا يوجد رجل رشيد فينا؟؟؟ سلك كهربا ننساك كيف والكلب قال سخلي وسخلك دخلو السلخانه..سخلي سلخ سخلك يقدر سخلك يسلخ سخلي زي ما سخلي سلخ سخلك…..الكلام ده تسعين في المية منهم ما بقدر يردد فيهو جملة وإلى لقاء
