*اشكاليات المريخ كتيرة *ومباراة القمة على الأبواب *فقه ده ما وقتو بتخلي الناس تتجاوز وتسكت *ويبقى المسكوت عنه واقعا يودينا لي نهواه في كل الظروف *كشفنا فيهو كم؟؟؟ *مافي زول عارف *يعني لو جانا زول شايل كدارتو ودخل الملعب وقال لينا أنا مسجل معاكم *ما بنقدر ننكر *نسكت بس *جواب منجد فيهو جواب واضح لحال الانضباط *سمعنا إنو معلق في السيستم *وبعد الجواب اكتشفنا إنو السيستم هو المعلق *كان الحبيب بدر البدور المقبولة استقالته رئيسا لبعثتنا *وكان عضو المجلس المعين بديلا لبدر البدور رئيسا لبعثتنا الأخرى *وبقينا ما عارفين *إذا استقالة بدر البدور نافذة يبقى رئاستو للبعثة بدعة *وإذا استقالتو مرجوعة في مسماها *تبقى رئاسة البديل لبعثتنا الأخرى بدعة من بدع الزمان *ونحن ما عارفين الصاح شنو *لأنو النظام الأساسي ذاتو بقول شنو، يعمينا *زول شافو مافي *وتعال شوف البصات *البصات الركبها المريخ في الموسم ده أكتر من الباصات اللعبها المريخ يوم كورة العلمة الأولى *لما البوكلين حفر للحجز بتاع البعثة للجزائر *مما أجبر الوالي على خيار الطائرة الخاصة *وظل البوكلين في موقعه في ذلك الوقت كأنو ماعمل شي *ماعارف فتح المواضيع دي ده وقتو ولا ما وقتو *نفتحها ولا نهواه في كل الظروف ونوئد الحروف؟؟؟ *ما يحدث إداريا بالمريخ الآن لا يحدث في فريق شفع بتاع حلة *تراشق إداريين واتهامات تنزل بهامات مقامات الكيان *قرارات فردية على شاكلة أدوني كورتي *سيد الكورة سيد الشي *أما إجماع الأغلبية السكوتي *يخيل لي سببو أن الصامتين بهوهوا في كل الظروف *تحت شعار ده ما وكتو *آمال وكتو متين؟؟؟ *ما تذكروني قصة الزول الماشي في الخلا سكينو في ضراعو *قابلوه ناس تسعة طويلة بتاعين الخلا *شالوا كل متاعو وملصوه هدومو وفكوه مولاي كما خلقتني وسكينو معلقة في ضراعو شاهدا على العصر *العصر الحصل ليهو *لما جا داخل الحلة كما ولدته امه وسكينو مدلدلة *حكى لي ناس الحلة الحصل *واحد من ناس الحلة قال ليهو وسكينك دي شايلها لي شنو؟؟؟ *قال ليهو شايلها لليوم الأسود *فهل الإجماع السكوتي لأعضاء المجلس المهمشين الصامتين *هو سكين شايلنها لليوم الأسود ؟؟؟؟ *اليوم الأسود ده متين؟؟ *أيتها السكاكين *أقصد أيها الناس *إن تنصروا الله ينصركم *أها *نجي لي شمارات والي الخرتوم *والينا المكلف بينا *دم الشهداء قانونا حق خاص ولا حق عام كلنا يلينا؟؟؟؟؟ سلك كهربا ننساك كيف والكلب قال الحنة دي بدت تبهت داير طبيق وإلى لقاء