*الإخوة الأهلة الشرفاء ماسكين في حبل ميت *قالوا إيه؟! *قالوا هدف الشعلة المنقوض صحيح *راجعت اللقطة كذا مرة *برغم إنو الموضوع ما كان بحتاج قدر ده *وبصراحة لقيت الهدف المزعوم نموذج للأوف الما محتاج عفار ولا فار *ولكن بصراحة *تمنيت إنو الهدف يكون صحيح ما أوف *عارفين ليه؟؟؟ *كي يعرف الأهلة إحساس الغبن والظلم التحكيمي الذي تجرعناه من زمن كورة سوق القش *لكن أيا كان *المستوى لا يشرف *ورجعت لي شريط المباراة تاني *علي أجد فيها ما يطمئن على بقاء أطلال الكرة السودانية *ما لقيت التكتح *لكن اكتشفت حاجة *وأقولها للأمانة *فمريخيتنا لا تمنعنا عن قول الحقيقة *تعرفوا توني طلع تسعة طويلة؟؟؟ *يختف يجهجهك يجري بجهة وزول الهلال بالجهة الأخرى *زول الهلال ما عندو حل غير يفتح بلاغ بالنيابة في تسعة طويلة ويضيفوا ليهو مادة إشانة السمعة كمان *توني بخلي السمعة شينة والريحة طير طير *أيها الناس *الحملة على إبراهومة لا يستحقها الرجل *وحتى لو *أنا بقول لو *لو قبل إبراهومة التدخل الإداري في الشأن الفني *وقبل فرض لاعب عليه برغم المخالفة الما اتحاسب عليها *فده ما الغلط الوحيد في مريخ اليوم *والغلط في مريخ اليوم يقوم الصلعة *أما الغلط في مريخ الأمس فحدث ولاحرج *عشان كده حقو ما نشخصن الحلول *الشخصنة دي بالذات هي الخربت علينا مريخنا الرائع *ولسه ما فات شي *تخلصوا من الصغائر ليبقى المريخ كبيرا كما عهدناه وكما عشقناه *أيها الناس *نريده مريخا قويا كبيرا بحق وحقيقة *مش مريخ يدار بالأمزجة وتتقسمه الكيمان *ونكرر الأخطاء *ونجي نقول المريخ ناد كبير *الكبير كبير بقوانينه ولوائحه وتطبيقها *كبير بخططه التنموية وطموحاته *لا بمجرد أمنياته *لذا *ولكل ذلك *يجب أن نغير نظراتنا لبعضنا *فلقد مللنا المحامرة *ومعاينتنا لبعضنا *كمعاينة الكلب للشحموطة *أيها الناس *الشفت الشايقي يحتاج دعواتكم فلا تبخلوا *أها *نجي لي شمارات والي الخرتوم *كان شفت يا والينا *من السخانة الفينا *قربنا نعضي الشمس يا أخينا سلك كهربا ننساك كيف والكلب قال أجمل حاجة قابلتني في الفيس استنكار إسرائيل لمقتل شيرين أبو عاقلة …لأ وإيه تكليف لجنة أديب بالتحقيق وإلى لقاء