طارق محمد عبد الله المعد النفساني ضرورة…!!! & قلناها وكررناها ولا ولن نمل التكرار بان تواجد معد نفساني بالهلال النادي الكبير كما هو الحال بالاندية الكبيرة (جت) ضرورة ملحة والامر ليس من باب الوجاهات والصرف في الفاضي واذا استصحبنا تجارب الممتاز في الموسم الماضي والحالي نجد ان الازرق وفي السنة الفاتت كان متقدما علي وصيفه المريخ بثماني نقط كاملة وبعد تعرضه للخسارة في القمة اخفق وتعادل مع حي العرب بمعني ان الخسارة ولدت اخفاق جديد وفي هذا الموسم وعقب انتصارات متتالية وصلت لاحد عشر فوز خسر الهلال امام اهلي الخرطوم ثم جاء وتعادل في المباراة التي تليها امام كوبر بصعوبة( 3/3) مع انه كان متقدما بهدفين نظيفين وايضا الاخفاق اعقبه اخفاق اخر عارفين ليه…؟؟؟؟ & لاننا شعب عاطفي خالص خالص ولاعب الهلال مطلوب منه ان يكون احترافي ودي تجي كيف ونحن وفي غياب المعد النفساني اشبه بمن القاه في اليم معصوب العينين ومربوط الرجلين وقال له اياك اياك ان تبتل بالماء، والشاهد ان الاخفاقات لايتم تدارك اثارها بسرعة في الهلال الكبير جراء الحماس الذيادة وتعجل اللاعبين اعادة البسمة للملايين مما يفقدهم التركيز وتشيع الفرص ويتواصل النزيف شفتوا كيف…؟؟؟ &ولو كان بالهلال معد نفساني حتما لتغيرت الامور وطاقة الاخفاق السلبية كان سيتم التعامل معها بعلمية ومؤسسية بعيدا عن العاطقية من اجل تحويلها لطاقة ايجابية وحينها تعود الامور طبيعية ويحقق الاسياد المراد الانتصارات الكروية وبالتالي تسعد الامة الهلالية صاحبة الاغلبية وتاني وبحسب الظرف نكررها اظن للمرة الالف المعد النفساني في الهلال الكبير ضرورة ملحة ماسااااكت ترف ونتمني كلامنا المرة دي يجد اذن صاغية ويجد الاهتمام هذا الملف قبل ما دورة الايام تلف ونلقي نفسنا في معمة مجموعات الكبار وبدل التطلع للانتصار نفتش للهزيمة بشرف. & وعشان جيل اللاعبين الحالي قبل القمة يعرف مرة زماااان بيحكي لينا عمك شرف الهلال خسر مباراة دورية قبل القمة مباشرة وجماهيرو جات دار النادي مبتهجة و تهتف فجاة الاداري الكبير الزمن داك شاخور علي حيلو وقف قاليهم كمان فرحانين انتوا اظنكم ماعارفين انو الهلال من الصعوبة بمكان يخسر ورا بعض مرتين عشان كده معقدة جدا مهمة اللاعبين كلموهم يامساكين، سكتوا وقعدوا خجلانين شفتوا كان كيف الارث التليد لهلال الملايين…؟؟؟ اهداف سريعة..اهداف سريعة & سادتي لاعب الهلال يعاني من ضغوط جماهيرية، ادارية، اعلامية، اسرية، اقتصادية… الخ.. والجميع يريدون دائما الانتصار انتصار يعني انتصار…!! & لذلك عندما يحدث الاخفاق وتحل الخسارة مع انها عادية جدا في كرة القدم تسيطر علينا حالة ندم علي انتصار فات وبقي عدم. & سادتي الهلال فريق كرة قدم ماكائن خرافي لايهزم وعلينا ان نعرف ثقافة التعاطي مع الخسارة والتعادل لان كرة القدم ماطوالي انتصار، انتصار، انتصار. & والسوال لكل هلالابي الايام دي زعلان ومحبط انت بتشجع منو اكتر الهلال ولا الانتصار …؟؟؟ & البيحب الهلال يهواه في كل الاحوال يزعل ويفرح باعتدال اما البيحبو بس في حالة (انتصار) احسن يشوفه ساكنه وين و يمشي يطلبه من ابوها عديل. & واحيانا انتصار صدفة يغطي علي سلبيات واخفاقات يكون ضرره لاحقا كبير. &ومرات اخفاق ونزيف، يخلينا نرجع نقيف ونكتشف واقع مخيف، نعدل السلبيات ونصل القيف، عندنا فريق عملاق بعدل المزاج والكيف. & وزماااان مازمان خالص خسارة من التاكا ظهر بعده الهلال بشراسة وقوة فتاكة، ولو مالاراش داكا، كان افريقيا اتسيدوها ناس اسامة الثغر والريح كاريكا اختصارا كاكا. & ويظل الهلال الرقم الصحيح بالكرة السودانية وغيره الكسور والبواقي. & نتطلع لهلال قيافة فايت العرب والافارقة مسافة. & ازرق وابيض لون الفل هلال القمة حبيب الكل. & واخيرا احمد الله كثيرا انني حي ازرق
