في البدء التحية لحملة مشعل العلم والمعرفة في بلادي أساتذتنا الاجلاء وهم يبدأون تصحيح امتحانات الشهادة السودانية والتحية لوزارة التربية والتعليم وهى تذلل الصعاب وتبذل لهم المال الصعب في الزمن القحط . التحية لكل الاسر وأبنائنا الطلاب والطالبات وهم ينتظرون النتيجة لرسم خطى المستقبل الزاهر بإذن الله . حقيقة سعدت كما الآخرين لزيادة مستحقات التصحيح الى مبلغ (300) الف جنيه للمعلم والمعلمة وسعدت جداً وأن اتنقل بذات الخبر بين المواقع أتفحص نشر هذه البشرى التي يقف خلفها سعادة وكيل وزارة التربية والتعليم الاتحادية المكلف الأستاذ محمد سر الختم الحوري ووكيل وزارة المالية المكلف الدكتور عبد الله إبراهيم الذى وافق (مشكوراً) على اعتماد المبلغ . وكم تمنيت لو اننى لم اتابع الخبر واكتفى كغيري بأن هناك تحفيزاً مجزياً للمعلمين هذا العام و(خلاس) ... حا تقول لى في شنو يا أستاذ صاح ؟ أقول ليك انا وأصلاً الوجع راااقد من وزارة ماليتنا من يوم ما (مسك قرونها) الدكتور جبريل ! ولسه (مغايس) القمح والموسم الزراعي الماضي وتهريب القمح لمصر(مورما فشفاشي) لى هسي . نجى لموضوع قروش المعلمين ! (حلو الكلام)؟ بعض الصحف يا صاحبي والمواقع الاخبارية تناولت خبر الزيادة كإجراء عادى تم بين وكيلى الوزارتين دون الإشارة الى مكان اللقاء او الاجتماع و (قلبت الصفحة) والسلام على طه الامام . ولكن هناك موقع (الرائد نت) اخبارى عمل لى (خمّة نفس وشحاتيف روح) قال شنو ؟ واتمنى صادقاً ان لا يكون ما سأسرده صحيحاً وسأنقله لكم بتصرف دون الاخلال بالمعنى ! (قال ليك) إن الأستاذ محمد سر الختم الحوري التقى وكيل وزارة المالية المكلف ! وين في مكتبه ؟ في قاعة الاجتماعات الرئيسية بوزارة المالية ؟ لا والله قال ليك (في منزله) يعنى مشى ليهو في (بطن بيتو) ! عشان يشرب معاه كباية شاى وكده ؟ قال ليك لا .... (للتباحث معه حول زيادة استحقاقات المشاركين في أعمال تصحيح الشهادة السودانية) آآآي والله دى صيغة الخبر يا جماعة ! وواصل الخبر في وصف المشهد (الفوضوي للدولة) تدار من منازلهم . قائلاً .... وإن سعادة الوكيل عبد الله بتاع المالية (وااافق) على مبلغ ال (300) الف جنيه . (و قال ليهو) والله يا الحوري رغم الظروف الاقتصادية الصعبة التي يمر بها السودان إلا انهم (ناس المالية) يراعون جهود المعلمين ومقدرين تعبهم و(كده) فعشان كده (اديناكم) ...!! والحق يقال يا جماعة بحسب الخبر ان وكيل المالية امتدح المعلمين وما قصر (خااالس) بل وقال إنه مهما اجزل لهم العطاء فإنه مُقصر في حقهم (والله ياخ كتر خيرك) ..... على هذا الكلام الطيب. (نجي نشوف) وكيل التربية والتعليم قال ليهو شنو؟ يقول الخبر ..... (من جانبه قدم الأستاذ الحوري شكره الجزيل وعرفانه النبيل وتقديره الكبير لوكيل وزارة المالية على (حسن الاستقبال) وموافقته على رفع مزية التصحيح! يا اخونا ده وكيل وزارة يخاطب وكيل وزارة ! جزيل شنو ؟ ونبيل شنو ؟ دافع من جيبو؟ أرجع (تاااني) وأقول أتمنى ان لا يكون ما قرأته قد حدث فعلاً وان يكون (ناس الرائد نت) هم من صاغ الخبر بهذه الصيغة الروائية ! حقيقة اتمنى ذلك وإلا فإن قلنا ان من يحكم السودان حالياً هو وزير المالية في ظل هذا الفراغ المعيب لما جانبنا الحقيقة .... وإلا فقل لى بربك ما الذى يجعل وكيل وزارة (يحنس) آخر وعلى (كباية شاي) أن يعطي حقاً مستحقاً للمعلمين الاجلاء من مال هذا الشعب لن يدفعه الوكيل من ماله الخاص ! ولماذا تنازل الأستاذ الحوري عن الحق المعنوي له ولوزارته فى ان يعلن الخبر واللقاء والجهد عبر وسائل الاعلام قبل موافقة (معالي الباشا) . على الأقل إبراءً لذمته وتمليكاً لحقيقة تعامل وزارة المالية مع وزارته ومع بقية الوزارات ومؤسسات الدولة؟ (بدل) الشغل البطفوا ليهو اللمبة ده . يا أخى هذه وزارة اسمها (وزارة المالية والتخطيط الاقتصادي) نعم نصفها معطل وليتها نجحت فى حراسة المال العام . وزيرها عاجز و(مكنكش) سلخ حتى (النملة) في السودان لم يبق للمواطن (أمل واحد يعيشو) هذا الوزير يا سادتي بالأمس الاول قال خلال جلسة المجلس الاقتصادي والاجتماعي لجامعة الدول العربية الذى عقد بالقاهرة إن السودان على استعداد تام لاستقبال الاستثمارات العربية وتذليل كافة الصعاب والعقبات! وإن هناك إرادة سياسية كافية ! (يا زول ..!!) يا السيد جبريل يا دكتور إنت متأكد من الكلام ده؟ إرادة سياسية كمان؟ السيد جبريل الذى أضاف (108) جنيهات للتر البنزين (خلوا بالكم انا بقول لتر وليس جالوناً) وأضاف (90) جنيهاً للتر الجازولين ولم يرمش له طرف يدعو المستثمرين العرب للسودان ! ومن هو هذا المستثمر (الغبي) الذى سيأتى لبلد (لتر) بنزينها يباع بدولار كامل واربعة وثلاثين سنتاً ؟ يا ناس (الثورية) الزول ده ما عندكم غيرو ؟ قبل ما أنسى : اتفاق سلام جوبا الزم الحكومة بسداد مبلغ (700) مليون دولار لدعم اتفاقية السلام وبما ان الفقرة لم تحدد حكومة منتخبة او انتقالية فهل لنا ان نسأل السيد وزير المالية بصفته الوصي على مال الحكومة في حاجة دفعتوها للسلام يا دكتور ؟ وان كانت الاجابة بنعم فهل للرأي العام ان يعرفها ؟ ماااا لازم كمان نعرف القروش دي بتمشي وين و جلود النمل دى بعتوها لاى مدبغة ؟ واللا أنا غلطان يا جماعة؟
