- الهادي سليم عبد التام.. من اشهر من وقف بين الخشبات الثلاث في السودان، حرس عرين المريخ في الفترة ما بين 71-81 وهجر البلاد ثم عاد.. وفوق هذا وذاك فهو ظريف الملاعب ونجم المعسكرات. - عن طفولته قال: البداية طبعا كانت بالخلوة.. وحلتنا كانت منبع فنون وكورة.. ود الامين وشيخ ادريس بركات والفاضل سانتو ومحمد حسين كسلا وعباس ركس وانا لعبت قبلهم في القمة. يقول الهادي سليم قبل المريخ كنت في نيل مدني.. والغريبة ما بديت حارس مرمى كنت بلعب جناح بعد داك احتاجوا لحارس مرمى لعبت ومن ديك وعيك. حافز تسجيلي للمريخ كان «1.500» الف وخمسمائة جنيه والزمن داك حاجة كتيرة تشيلهم في كيسين.. وقمت بآخر بص مشيت مدني.. الوالدة كانت جاية من بيت بكا لمن شافت القروش دي مردوفة بكت تاني. ليه - قالت ولدي بقى حرامي.. لانو مرتبي كان «11» جنيها في البيطري وكان شغال معاي الفاضل سانتو بعدين اخواني فهموها ان دي قروش الكورة. التعامل مع جمهور جديد وانت جايي من مدني؟. فرق كبير جدا.. وبأمانة زول غيري كان خلى الكورة.. المسألة دايرة شجاعة ادبية لانك بتسمع كلام فارغ وشتيمة انا كان بكوركو لي من اجي خاشي «الهادي الشين دخلت بي وين» وكانت اصرار انو لازم العب كويس.. لكن بصراحة بغيظوا الزول. في مباراة هلال مريخ سنة 81 مشيت هنيت لاعب جاب قون وقالوا الشغلة دي فيها كجور وكدة؟. أتذكر انو الجاب القون زيكو انا لما مشيت دائرة السنتر من قوني مشيت اهني كمال عبد الوهاب لانو لعب ليهو الباص بتاع القون.. وكمال شاف زيكو جاري في ضل الكشافات ولعب ليهو الباص وهو مقبل عكسو لا كجور لا حاجة. الانطون والكورة والكجور؟ بصراحة انا واحد من الناس قبل ما اجي العاصمة كنت في مدني.. بشوف اللعيبة وانا صغير بجيبوهم للفكي وبيديني فنجان ويغطيني وبشوف ليهم الحاصل، من الزمن داك مقتنع بالكجور في الكورة قبل ما العبها لاني شفت بي عيني. حصل لقيت ليك كجور؟ ما شفت لكن الجمهور لما أجي داير اقيف في المرمى بحفر لي حفرة واعمل نفسي زي الدفنت لي كجور.. هم خلاص تجيهم نفسيات ويقولوا كجرتها. أكرم الهادي سليم كحارس مرمى؟. ابني اكرم دا ما اديتو التدريب الكافي كحارس مرمى.. اصلا هو بلعب جناح فجأة اتعوق حارس مرمى.. لعب بدلو جاني قال لي داير ابقى حارس.. بديت ادرب فيهو نص الليل برانا في دار الرياضة بامدرمان والملعب فاضي. اكرم من الربيع في (3) اشهر لابي عنجة لعب في كأس البنوك طوالي مشى الهلال، الكلام دا كلو في سنة واحدة بس.. انا لو في محلو بعمل لي كتاب عن تجربتو وبعتزل طوالي.. زول من الثالثة للهلال في سنة. طبعا الآن هو في المريخ.