(التيار) الناهة بنت مكناس الناهة بنت مكناس.... كانت وزيرة خارجية مورتانيا....مسكينة شغالة في شغلها في امان الله..... لمو فيها شعراءنا السودانيين وشبكوها قصائد.. القصيدة تحك القصيدة.... الحكومة الموريتانية لحما اكلا ودخلت في ضفورا.... واستحرجت.... وفي اللخير رفدو الناهة من الوزارة.. وحسي تراها متمحنة عند اهلها... تودي وتجيب.... قطع رزق... ما عرفنا شي في قطع رزق ناسنا المعانا... مرقنا في موريتانيا بقينا نقطع في رزق وزراء شنقيط... كمان قالو في شاعر سوداني دبلوماسي..خلا الدبلوماسية وانشاء الله علاقتنا الخارحية تخرب.. خلاها وقعد يتغزل في الناهة....هو يغني ويدوبي للناهة.... ونحن امريكا شابكانا .. الجزرة والعصاية. وتعلب بنا.. تحندقنا بالجزرة نمد ايدنا عشان نشيلها (جبّط) تدينا بالعصاية...لمن ايدنا ورمت من الدق.. والله غايتو نحن ناس فعلا قرود... مثّل الجزرة والعصاية دا مثل لتدريب القرود في السيرك... القرد ان سوى شي سمح وبسط سيدو يديهو جزرة وان لخبط وقعد ينطط يديهو علقة بالعصاية. والخواجات بيقولوهو ويكتبهو في جرايدهم قاصديننا نحن واننا قرود وممكن يروضونا زي ما دايرين..ونحن نجي فرحانين وبالخط العريض نكتب فيهو العصا والجزرة العصا والجزرة يعني الاولاد خلاص بيعرفو نضم الخواجات،ونحن الغبيانين قاعدين نشتم في روحنا ونشبه نفسنا بالقرود ويجي الواحد فينا في التلفزيون ينجعص ويشبكنا(حقيقتن وحقيقتن). امشي يا قرد!..ورواية اخرى تقول ان العصا والجزرة هي لترويض الحمار..تعلق جزرة في عصاية وتركب الحمار وتمد الجزرة قدامو والحمار يفضل ماشي طول الوقت عشان يصل للجزرة المعلقة في العصاية قدامو مع انني من انصار التفسير القردي فضلا عن التفسير الحماري... واخونا الدبلوماسي دا شغال غزل في الناهة بنت مكناس...ابوها مات قبال سنتين... لقوها يتيمة...وقبلو عليها... هن كان رجال وشعراء بالصح ما يكتبو قصيدة في هلاري كلينتون...؟........ واللا كانو يكتبو في الوزيرة الاسرائيلية ديك؟عشان اسرائيل ترسل لينا طيارات تضرب اي حرف مكتوب في اي مكان. وتخلينا نجقلب وارفدو وزير الدفاع والوزير داك سجن الصحفي في عربيتو(هو عليكم الله لاقي؟)....وتستصدر اسرائيل قرارا من مجلس الامن.. يحمونا فيهو النضم عشرة سنين لي قدام.. حقارتهم في المساكين والضعفاء...من قلة النسوان الوزيرات في الدنيا دي .؟ وبعدين السودان دا فيهو خمسة وعشرين مليون مرا....ما اتلقت واحدة يتقال فيها شعر..؟.كدي شاعر فيكم يختف كراعو يوم خميس لاي صالة افراح ان ما جا مارق لو بعشرة قصائد اقل شيي،دا غير الكلمات و الحروف الممكن تشتت منو فوق الدرب...شخصي الضعيف والشليق... ابت عليه شلاقته الا ان يلحق سوق الغزل دا.... ويدخّل خشمو فيهو... يمكن يربح ..اقول لها:- ما للفؤادِ من( دٌل) (دُل) (دُل) وتتنطيطي؟.... أعلةٌ ألمت به ام شوقٌ لارضِ شنقيطي؟ نهاني ناهي الهوى عن هوى اللاهة.. . ولا يعلم ان هواها حواني حد البلابيطي لافحةً التوب بالشمالِ فنجرة فغارت.... منها سليلات ارض البناطلين و البرانيطي فبدت بدرا منيرا و خديناتها مكعوجات عاليات النعيق قعونجات رغما عن الزيطي قفل الباب:- القصيدة الطيطية التي ختم بها المقال