بسم الله الرحمن الرحيم في السلك • كورتنا الجايه • كورة الفريق القومي • ضد الكنغو • الكنغوووووووووووو • بلد ناس مازيمبي • ناس كديابا • الزول البرقص زي مكنة قص النجيله • تتذكروا اول مره شفنا الرقصه دي وين ومتين ؟ • وكانت النتيجه كم ؟ • قالوا فريق الكنغو فيهو تسعه من ناس مازيمبي • تسعه في خمسه بي كم ؟ • اييييييييييييييييييييك • الله يستر • مازدا • طبعا انت حريص علي نفسيات لاعبينك • وبالذات ناس الهلال • حفاظا علي تلك النفسيات يامازدا • استبعد ناس الهلال من المباراه القادمه • يقوموا يشوفوا ناس مازيمبي ديل يتذكروا هيروشيما • ونفسياتهم تبوظ • وانت يا مازدا ما بتحب كده • سفرتوا الطاهر حماد ساااااي • اسي كان نفع • اها • يس المريخابي • في الضرائب • ناس الدمغه • قال قسم خالد قال البتغلبوا العبوا يا مازدا • وقال ده كلام صاح • وسمعنا بيهو قبل كده • لكن البتتغلبو العبو دي جديده ياقسم • مازدا يثبت تشكيله علي شنو وهي مغلوبه ! • اها • قال ليك النجم الساحلي غلب الترجي خمسه • الله يجازيك يا مازيمبي • السنه دي قالوا اي زول اخد من مازيمبي خمسه • حاياخد خمسه في الدوري من غريمه • العب يامازدا بي راجي وطمبل • شوف كديابا كان يرقص • والله تصفق ليهو ما يرقص • لو صفقوا ليهو صفقة النواب في البرلمان يوم رفع الاسعار ما يرقص • تحسبوا لعب كمان ! • يجيب من جوه بس • يارب • وفق الفريق القومي • وانصره • من اجل الوطن • ومن اجل عيون اطفالنا • ومن اجل سمعة وطن عريق • سادومبا قالوا لسه ما جا • انشاء الله المانع خير • اوعه تكون الحاجه رجعت للمرض القديم • الحضري مازال نجم التمارين • موووووووووووووتوا • اها • ايها الناس • مانسينا الاذاعه • مانديلا اف ام • قربت • ونبشركم النادي الاسري قرب • وصالة الافراح قربت • وقناة النجوم حلم سيصبح واقع قريبا • ابقوا معنا • وايد في ايد نجدع بهناك للطموح • ايها الناس • انه موسم الجماهير • الجماهير اللابسه كلها رقم 22 • قريبا تستلم الشعار بسعر رمزي • حافظ عليهو • يوم نقول احمر نقلب الجانب الاحمر • والاصفر بي جوه • ويوم نقول اصفر • نعكس الآيه • رسائل مريخيه رائعه كتييييييره وصلتني • بكره ننشرها انشاء الله • ايها الناس • غيب الموت بالامس اخونا في الله وفي العرضه وفي الرياضه وفي السراء والضراء المرحوم /علي حاج حسين قسم السيد • خال اللاعب الدولي السابق كرار ابو علي • كان نعم الاخ ومن خيرة الاهله واكثرهم تبسما في وجوه الصحاب • يسألك عن حالك كلما قابلك • يصل الارحام • زول واجب • نعزي انفسنا فيه قبل ان نعزي الزعيم عبدالله بشير والاخوه قسم والفاتح وصلاح وحيدر ابو سته • غابت شمس ولكن عشمنا كبير في شموس تركها علي خلفه • ابناء يسطعون مثل والدهم شموسا تضئ وتعرف الحق والواجب • نسأل الله ان يجعل البركه في ابنائه وان لا يفتنا من بعده • برغم فداحة الفقد • لا نقول الا مايرضي الله • انا لله وانا اليه راجعون سلك كهربا ننساك كيف وفي كل صيوان نتذكر كورة الامل والي لقاء سلك babikir maki [[email protected]]
