لامن لاح البرق القبلي ...شق دياجي العتمة وشع ولينا اتناهى مع الآذان .... صوت قمرية في ساعة هجعة اتنسمنا علايل أبوروف .. واتلحفنا سحاب البقعة يدخل المغني : (من علايل أبوروف للمذالق.. من فتيح للخور للمغالق) اتذكرنا بلدنا ونيلها الأنسام الهابة عليلة راشة دعاشها نهارها وليلها بلابل صادحة في دوحة ظليلة في الآصال يسكرنا هديلها حليل أم در وملوكها حليلها يدخل المغني : (الليلة كيف أمسيتو ياملوك أم د ر) كم من نيمة تعانق غيمة وجدول كابي في موية ترعة الأغنام السارحة بترعى وفي الوديان طاب ليها المرعى وشيخ دفع الله كبر وصلى في الضحوية كم من ركعة اتحزمنا واتلزمنا .. واتوكلنا علي الرزاق أفواج.... أفواج اتشعبطنا على الترماج هدومنا ملانة تراب وعجاج والكمساري يكورك فينا (خش لي جوه وحاسب أوعى) عالم زحمة ومالية الفجة كم من كارو ولوري سفنجة وخلف الزنكي وسوق الملجة تكاسي (الطرحة) تفضي وتملا بيع قطاعي وبيع بالجملة وجنب التمنة عجايز جالسة بتلعب (ضمنة) ديمتري بازار وصوت (زنقار) (من بف نفسك ياالقطار) بياعين في كل مكان ند وعطور وبخور تيمان وبالله عليك ياماري علي سوق أمدرمان لولاقاك (عباس رشوان) وعم (شلقامي) وحاج (عتمان) هناك واقفين وسط الميدان اتلقاهم بالأحضان .. أحجز كرسي في مطعم (برسي) وأعدل كيفك من (على كيفك) برد جوفك من (خيرات) و(ميامي) العامر بالخيرات وقول للناس الماشة متاجرة والعرسان الجاية مسافرة من (الفاشر) ومن (ودمدني) أغلى نصيحة ليكم مني: أفخم شيلة في شارع (العدني) خليك ماشي..رايح وغادي في (الشنقيطي) وشارع (الوادي) وتابع الجولة أغشى (تبيدي) و(أولاد ملا) وخد لي عروسك خاتم ودبلة وأحفظ مالك بص في يمينك .. وبص في شمالك شوف واتملى ...في خلق الله.. وريح بالك وأملا عبونك بهجة ومتعة ... وجأة ونحن في (ساحة الشهداء) طلت لينا بدور القلعة آخر بهجة وآخر روعة يدخل المغني: (العيون النوركن بجهرها) سرنا معاها عريس وعروس سيرة وزفة لشاطي النيل اتباخخنا بموية السيل وكم غنينا في عز الليل موجة تغني ..وموجة تشيل يدخل المغني : (عريسنا سار البحر ياعديلة .. وقطع جرايد النخل ياعديلة) ولما سمعنا دق النوبة في (حمد النيل) ونقر الطار رحنا نقزنا كبار وصغار اترحمنا علي الأبرار انشاد ديني : (عليك اعتمادي دايما في كل لحظة ... بدنياي ..في الرخيا.. وفي كل شدة) وهفت لينا نهدي شوية نقرأ المولد والليلية في حي (بانت ) و(البلدية) فتنا ميدان (الخليفة) وزرنا جوه (الاسبتالية) ناس عزيزة علينا غالية دوبيت : (شهرين أدرجين راقد علي كوعي عليل في العنقريب اتطبقوا ضلوعي الأهل الكبار ما عرفوا موضوعي والهدم الجديد فشيتو بدموعي) (بالملازمين ) احتفلنا واتقدلنا في (ود البنا) وكم دندنا مع (الفرجوني ) و(ود البنا) يدخل المغني : (طال هجري يا أم د ر أمان ) اتسامرنا في (بيت المال) واستبشرنا بحسن الفال واتحكرنا .. قعدنا لعبنا (كوكان عشرة) تحت (الدومة ) في (سوق الشجرة) وكان في النية يبقى مقيلنا في (دار الهجرة) وقبل ماتمغرب علينا شلنا خطوتنا ومشينا طفنا بي حي (المسالمة) و(المظاهر ) و(ودنوباوي) والكهارب من بعيد في الشوارع نورها ضاوي وقفنا في (حي العرب ) عزفنا مزيكة قرب نحي بي كل الأدب لي أساطين الطرب .. (أنا في شخصك بحترم أشخاص ) اتذكرنا أماسي ندية أعادت لينا مشاهد حية جرتق وعرضة في (حي العرضة ) و(الردمية) صندل فايح من صبحية في (الهاشماب ) و(العباسية) اتهندمنا واتعطرنا ورحنا سهرنا.. أجمل سهرة .. في (حي الأمراء) هناك صباحي (برمضان زايد .. ووردي .. وعشة الفلاتية ) و(المامون) و(أحمد جمعة ) قمنا لحقنا صلاة الجمعة ورحنا نكمل للصبحية يدخل المغني : (هات لينا صباح .. يخمد البدر ويخجل المصباح) حليل المولد و (سوق الزلعة ) والتهليل في يوم العيد وسط الحي والناس مجتمعة وسالت دمعة أهاجت فينا كوامن لوعة لما طرينا شوارع الحلة ولعب البلي والكرتلة سينما (برامبل ) و(الوطنية) و(عنتر وعبلة ) دكان (موسى) و(برعي الترزي ) (سعيد العربي ) وسمك السكي الليمون في (حي البوستة ) وباسطة (بين) و(بابا كوستا) طرينا في وهلة زمن الجهلة وضل النخلة ونوم السهلة حاجة (حنينة) وخالتي (سكينة ) وغنوة حنينة يدخل المغني : (الزهور صاحية وانت نايم ) يتداخل مع صوت أطفال ( الله خلق للنعجة ضنب ...) الأنداد أولاد الدفعة سعيد وكرومة وتنقو وسمعة الدافوري صباح الجمعة وفي العصرية وقون المعرب لما تمغرب للمغلوب أحسن من مية وياما ضحكنا لما بكينا يوم سكتنا كلاب (الحلبة) ومن الخلعة وكتر العجلة اترادفنا تلاتة في عجلة وتاهت بينا دروب الرجعة اتدلينا في (حي العمدة) جنب الزول الماخد سندة يدخل المغني : (قوم بي وخد سندة .. بالدرب التحت ..) وست الشاي الراصة العدة ومنقد نارها مولع ولعة وطفلة صغيرة في عرض الشارع قايدة أبوها ومادة القرعة وصوت المادح .. جنب الجامع ... باكي ونائح (ياراحلين الى منى بقياد) حليلهم أهلنا الكان ليهم شنة ورنة ربنا عالم .. كانوا معالم شامخة أبية لا باسبورت ولاجنسية وفي القاسيات كان ليهم فزعة (تاج السر يوسف (أبو العائلة) وصوت المادح جنب الجامع باكي ونائح (ياراحلين الى منى بقياد ..) حليلهم أهلنا الكان ليهم شنة ورنة أهل الوجعة ربنا عالم ... كانوا معالم شامخة Taj Elsir Abu Alayla [[email protected]]
