العم عصام مش عارف ماله اليومين دول ، بقالو فترة وهو مش علي بعضه ، مركز ومش مركز ، عشان بكره مافيش حد يقول إنه ريكاردو هو السبب ، أو إبن بلده ليما ( ماسورة) ومش نافع وكلام زي كده ، في رأي لو سألتوني حا أقولكم إن ريكاردو ماقصرش مع المريخ ، وهو عندي ( رائد) مدرسة الواقعية في التدريب ، ونجح بواقعيته إنه يقود المريخ لدور الأربعة ، وإحتمال كبير يصل بيه للنهائي ، أصلو مدرب حويط أوي ومابيحبش المغامرة لا علي أرضه ولابره أرضه ، وهو أفضل مدرب بيحترم الخصم ، ماببصش لده فريق كبير ولا ده فريق صغير . مصيبة ريكاردو في الأخطاء الساذجة من اللاعبين واللي دايما بتهده وتهد الفريق ، لو جبنا أي طفل صغير من الشارع وقلنالوا أيه ده أيه اللي عملوا الحضري ده ، الراجل ده مالو بيعمل كده ليه ، في حارس مرمي في الدنيا بالإستهتار ده ، في حارس مرمي في الدنيا (وكبير ) من كله سن وعمر في الملاعب ده عميد ياعم يعني خبرات ما تعدش . معقولة ياحضري الكورة تجي لغاية عندك وهي ماشة علي أقل من مهلها بدل ماتاخدها في حضنك وتطبطب عليها ، وتهشكها وتدلعها ، تخلي الراجل الطويل اللي من ساعة مادخل وهو مش عارف بيعمل في إيه يعمل فيك كده، ياخي ده أنا اللي مابعرفش حاجة قلت مين عمود النور ده؟ ، المدرب ده إيه جاي منين في حد يدخل لاعب مش قادر يستلم كورة واحدة بطريقة صحيحة ؟ إنت عارف مشكلتنا إيه ياحضري إننا (بنفتي) في اللي لينا فيه واللي مالناش فيه ، أتاري المدرب طلع عنده بعد نظر مننا كلنا قولي ليه؟ أقولك من غير ماتقول ليه؟ ماهو إنت مش أول مرة تعمل عملتك دي عملتها مرتين تلاتة في مباراة الفريق الكنغولي ليوباردس ، وعمتلها في السودان في الدوري المحلي كتير أوي أوي ، بس هو طلع بيشوف أحسن مننا ، في الشوط الأول والمهاجم جنب منك ( مرتين) والكورة مفروض بين إيديك ، وإنت بتعمل في حركات بإيديك عايز تستلمها ومش عايز تستلمها ، وفي المرتين المهاجم لو مد رجله كان جاب قون ، وفي وضع من اللي جاء منه القون ( الملح) الملح دي عندكو في السودان يعني ببلاش ياعم عصام إنت أديت الكنغوليين قون ببلاش . إيه ياعم مالك ، إحكي لي بقالك فترة وإنت مش إنت ، في السودان بيقولو إنك قدمت مستويات كويسة ، وعملت فرق كبير مع الفريق ، بس أنا لي نظرة برضه لأني اعرفك من زمان أوي ياحضري ، إنت مش إنت ده مش مستواك إيه ياراجل العمر عمل عمايلو ولا إيه؟ ، نظرك قل ولا حاجة؟ فين المرونة اللي كنت عليها ؟ ياعم عصام ده أنت أي كورة من مسافة بعيدة مابتشوفهاش ولا حتي بتحاول معاها ، رد فعلك مش هو صدقني ، كتير من الأقوان بتدخل وإنت بتتفرج ، آه بتطلع كرات والناس بتشوفها صعبة ، بس في الغالب مش بتكون بعيده عن توقعك أو قريبة يعني شايفها كويس ، في حاجة في النظر مش عاجباني آخر مرة رحت لدكتور العيون إمتي؟ مش حاترد أنا عارفك . بس اللي لازم تعرفه إن المريخ تعب أوي لغاية ماوصل هنا دور الاربعة ، وتعب أوي عشان يطلع من ليوباردز الكنغولي بنتيجة إيجابية ، ويضمن إنه قطع تلات أربع الصعود للنهائي ، فعيب أوي إن حارس كبير زيك يهد كل التعب ده بغلطة ساذجة زي دي .. عيب . hassan faroog [[email protected]]