أكوبام كسلا يعيد قيد لاعبه السابق عبدالسلام    الخارجية: رئيس الوزراء يعود للبلاد بعد تجاوز وعكة صحية خلال زيارته للسعودية    الأمر لا يتعلق بالإسلاميين أو الشيوعيين أو غيرهم    الأمين العام لرابطة العالم الإسلامي يستقبل رئيس وزراء السودان في الرياض    طلب للحزب الشيوعي على طاولة رئيس اللجنة الأمنية بأمدرمان    شاهد بالفيديو.. فنانة سودانية تنفجر غضباً من تحسس النساء لرأسها أثناء إحيائها حفل غنائي: (دي باروكة دا ما شعري)    الخلافات تشتعل بين مدرب الهلال ومساعده عقب خسارة "سيكافا".. الروماني يتهم خالد بخيت بتسريب ما يجري في المعسكر للإعلام ويصرح: (إما أنا أو بخيت)    تعاون مصري سوداني في مجال الكهرباء    شاهد بالصورة والفيديو.. بأزياء مثيرة.. تيكتوكر سودانية تخرج وترد على سخرية بعض الفتيات: (أنا ما بتاجر بأعضائي عشان أكل وأشرب وتستاهلن الشتات عبرة وعظة)    ترامب : بوتين خذلني.. وسننهي حرب غزة    البرهان: لن نضع السلاح حتى نفك حصار الفاشر وزالنجي وبابنوسة    شاهد بالصورة والفيديو.. حصلت على أموال طائلة من النقطة.. الفنانة فهيمة عبد الله تغني و"صراف آلي" من المال تحتها على الأرض وساخرون: (مغارز لطليقها)    شاهد بالفيديو.. شيخ الأمين: (في دعامي بدلعو؟ لهذا السبب استقبلت الدعامة.. أملك منزل في لندن ورغم ذلك فضلت البقاء في أصعب أوقات الحرب.. كنت تحت حراسة الاستخبارات وخرجت من السودان بطائرة عسكرية)    يوفنتوس يجبر دورتموند على التعادل    أول دولة تهدد بالانسحاب من كأس العالم 2026 في حال مشاركة إسرائيل    900 دولار في الساعة... الوظيفة التي قلبت موازين الرواتب حول العالم!    "نهاية مأساوية" لطفل خسر أموال والده في لعبة على الإنترنت    د.ابراهيم الصديق على يكتب: معارك كردفان..    رئيس اتحاد بربر يشيد بلجنة التسجيلات ويتفقد الاستاد    عثمان ميرغني يكتب: المفردات «الملتبسة» في السودان    إحباط محاولة تهريب وقود ومواد تموينية إلى مناطق سيطرة الدعم السريع    محمد صلاح يكتب التاريخ ب"6 دقائق" ويسجل سابقة لفرق إنجلترا    شاهد بالصورة والفيديو.. خلال حفل خاص حضره جمهور غفير من الشباب.. فتاة سودانية تدخل في وصلة رقص مثيرة بمؤخرتها وتغمر الفنانة بأموال النقطة وساخرون: (شكلها مشت للدكتور المصري)    السعودية وباكستان توقعان اتفاقية دفاع مشترك    المالية تؤكد دعم توطين العلاج داخل البلاد    غادر المستشفى بعد أن تعافي رئيس الوزراء من وعكة صحية في الرياض    تحالف خطير.. كييف تُسَلِّح الدعم السريع وتسير نحو الاعتراف بتأسيس!    دوري الأبطال.. مبابي يقود ريال مدريد لفوز صعب على مارسيليا    شاهد بالفيديو.. نجم السوشيال ميديا ود القضارف يسخر من الشاب السوداني الذي زعم أنه المهدي المنتظر: (اسمك يدل على أنك بتاع مرور والمهدي ما نازح في مصر وما عامل "آي لاينر" زيك)    الجزيرة: ضبط أدوية مهربة وغير مسجلة بالمناقل    ماذا لو اندفع الغزيون نحو سيناء؟.. مصر تكشف سيناريوهات التعامل    ريال مدريد يواجه مرسيليا في بداية مشواره بدوري أبطال أوروبا    ماذا تريد حكومة الأمل من السعودية؟    الشرطة تضع حداً لعصابة النشل والخطف بصينية جسر الحلفايا    شاهد بالصور.. زواج فتاة "سودانية" من شاب "بنغالي" يشعل مواقع التواصل وإحدى المتابعات تكشف تفاصيل هامة عن العريس: (اخصائي مهن طبية ويملك جنسية إحدى الدول الأوروبية والعروس سليلة أعرق الأسر)    إنت ليه بتشرب سجاير؟! والله يا عمو بدخن مجاملة لأصحابي ديل!    وزير الداخلية يترأس إجتماع لجنة ضبط الأمن وفرض هيبة الدولة ولاية الخرطوم    في أزمنة الحرب.. "زولو" فنان يلتزم بالغناء للسلام والمحبة    إيد على إيد تجدع من النيل    حسين خوجلي يكتب: الأمة العربية بين وزن الفارس ووزن الفأر..!    ضياء الدين بلال يكتب: (معليش.. اكتشاف متأخر)!    في الجزيرة نزرع أسفنا    من هم قادة حماس الذين استهدفتهم إسرائيل في الدوحة؟    مباحث شرطة القضارف تسترد مصوغات ذهبية مسروقة تقدر قيمتها ب (69) مليون جنيه    في عملية نوعية.. مقتل قائد الأمن العسكري و 6 ضباط آخرين وعشرات الجنود    الخرطوم: سعر جنوني لجالون الوقود    السجن المؤبّد لمتهم تعاون مع الميليشيا في تجاريًا    وصية النبي عند خسوف القمر.. اتبع سنة سيدنا المصطفى    عثمان ميرغني يكتب: "اللعب مع الكبار"..    جنازة الخوف    حكاية من جامع الحارة    حسين خوجلي يكتب: حكاية من جامع الحارة    تخصيص مستشفى الأطفال أمدرمان كمركز عزل لعلاج حمى الضنك    مشكلة التساهل مع عمليات النهب المسلح في الخرطوم "نهب وليس 9 طويلة"    وسط حراسة مشددة.. التحقيق مع الإعلامية سارة خليفة بتهمة غسيل الأموال    نفسية وعصبية.. تعرف على أبرز أسباب صرير الأسنان عند النوم    بعد خطوة مثيرة لمركز طبي.."زلفو" يصدر بيانًا تحذيريًا لمرضى الكلى    الصحة: وفاة 3 أطفال بمستشفى البان جديد بعد تلقيهم جرعة تطعيم    







شكرا على الإبلاغ!
سيتم حجب هذه الصورة تلقائيا عندما يتم الإبلاغ عنها من طرف عدة أشخاص.



(إلى روح الصديق العزيز سعودي دراج الذي شاركني هذا الحوار مع صديقته أم جمعة). بقلم: حسن الجزولي
سودانيل نشر في سودانيل يوم 01 - 02 - 2015

نون الناطقات بملكاتهن:- ناشطة اجتماعية تدعى أم جمعة
* ليس في مدينة الخرطوم بحري من لا يعرفها، خاصة في حيها العريق بحي كوبر، حيث شكلت لوحدها مركز إشعاع إجتماعي كبير، وحيث ظل منزلها يستقطب كافة مجموعات الطيف السوداني من كل صوب وحدب، حيث اتفق على محبتها جمع كبير من نساء ورجال حيها والأحياء المجاورة لها، خاصة ناشطات الحركة النسائية والشبابية بمدينة بحري، فضلاً عن عضوات وأعضاء الجباه الديمقراطية من طلاب وطالبات جامعتي الخرطوم والقاهرة الفرع وبعض المعاهد العليا بالعاصمة، منذ منتصف ستينات القرن الماضي وحتى نهايات السبعينات، كما أمً مجلس مؤانساتها عدد من أطباء اٌمتياز وأخصائييها بمستشفى بحرى وبعض عيادات العاصمة، الذين كان واسطة عقدهم الدكتور الراحل عوض دكام، كما صادقت عدداً من رموز الحزب الشيوعي بالعاصمة وكوادره بمدينة بحري، وجمعتها علاقات ود وصداقة مع الراحل محمد إبراهيم نقد وسعودي دراج وعلوية تابر الكادر القيادى بالاتحاد النسائي السوداني، لا غرو فقد انضمت للحزب الشيوعي منذ نهايات الخمسينات وكانت من مؤسسات الاتحاد النسائي ، زاملت فاطمة أحمد إبراهيم وخالدة زاهر وفاطمة القدال ودولت محمد الحسن وغالبية كوادر الحركة النسائية، ودفعت ثمن مواقفها السياسية الشجاعة سجناً ومضايقة في لقمة عيشها، وبعد مفارقتها لحي كوبر وإنتقالها للعيش مع زوجها وابنتها الوحيدة باكنام، فقد لفها الحزن لهذا الفراق والرحيل الإضطراري، حيث كان حي كوبر بالنسبة لها المتنفس الذي كانت تعيش عليه، وما أن أُخرجت عن مياهه حتى انقطع الأوكسجين عنها!. حاورتها صحيفة الميدان خلال دعوة غداء و"جبنة" عصرية أمها معنا صديقها القديم الأستاذ سعودي دراج الكادر القيادى في الحزب الشيوعي والكادر الشبابي العمالي يوسف حسين الذي تربى في كنفها وترعرع بمنزلها منذ سنوات صباه الباكر، إضافة إلى كريمتها الوحيدة باكنام، ولم يكن من أطلق عليها هذا الاسم سوى الشهيد عبد الخالق محجوب صديق والدتها منذ خمسينات القرن الماضي!. وهذا الحوار معها تم بشق الأنفس لأنها استعصمت بالصمت المطبق ورفضت في بداية الأمر أي حديث، متعللة بأنه ينكأ جراحاً من الذكريات وينبش سنوات عزيزة قضتها الحاجة أم جمعة مع أعز الأهل والصديقات والأحباب، ولكنا خلال شد وجذب وتحايل صحفي استطعنا رغم إصرارها على عدم التعاون معنا أن نخرج ببعض من سيرة لأمرأة تركت بصماتها واضحة على مجتمع كوبر ومدينة الخرطوم بحري، وهذه حصيلة دردشة امتدت منذ الثانية عشر ظهراً وحتى الخامسة مساءً:-
حاورها: حسن الجزولي
* أم جمعة إٍسم ولا لقب؟.
+ ده إسمي اللي إتعرفت بيهو، أم جمعة الحاج عبد الجبار رزق الله. ( حسبو آدم زين العابدين)
* وإنتي أصلاً من وين؟ .
+ ( بعد أن طالت فترة صمتها يرد سعودي دراج موضحاً:- هي اتولدت في الجريف واستوطنت حي كوبر.
* والله يا حاجة أم جمعة يكون كويس لو عرفتينا بي بيتك في حي كوبر وذكرياتك مع الحبان فيهو؟!.
+ عاد ديك فترة سمحة بالحيل ،، الحركة فيهو مستمرة لآخر الليل والأقدام ما بتنقطع،، بحري كلها تلقاها عندي ،، في ضل الشجر برة البيت تلقى الجبنة وتلقى الفطور وتلقى الونسة والقرقراب،، أنا وعلوية تابر والنسوان نجهز الخروف لاجتماعات الجبهة الديمقراطية في الجامعة ومرة للعمال. دخله ومرقه ،، غايتو ،، ده كلو انقطع حسع!.
* منو من الزوار الكانوا بجوك في بيت كوبر؟!.
+ كلهم والله!.
* كلهم زي منو مثلاً؟!.
+ إنت يعني عامل فيها ذكي عاوز تجرجرني في الكلام؟.
* عاوزك تحكي لينا!.
+ قلت ليك ما توجع دماغي ،، ما بحكي!.
( بعد فترة صمت)
+ خلي سعودي يحكي ليك!.
* أنا عاوزك إنتي تحكي!.
(سعودي موضحاً):-
+ الحقيقة كتيرين اللي كانوا مرتبطين بعلاقات إجتماعية معاها!.
* زي منو مثلاً؟.
+ خليها تحكي ليك عن عبد الخالق!.
* عبد الخالق محجوب؟
+ أحكي ليهو عنو يا أم جمعة!.
(تصمت أم جمعة فيواصل سعودي):-
+ تعرف كان عندو معاها علاقة أسرية وكان بجي بشرب معاها القهوة وتنقل ليهو موضوعات بحري وحال الناس!.
( هنا توضح أم جمعة، ربما بعد أن راقت لها شهادة سعودي عن علاقتها بالشهيد عبد الخالق):-
+ (ضاحكة) كان بحب قهوتي ،، بجيني طوالي والله ،، ما بنقطع ،، مرات بجي مع نعمات زوجتو يزوروني في كوبر.
* خبر إعدامو إستقبلتيهو كيف؟
(تصمت)
* خبر الاستشهاد كان مؤلم طبعاً عليك،، مش؟!.
(تواصل صمتها بينما يتدخل سعودي):- وريهو كنتي وين الوكت داك؟!.
+ كنت ممسوكة أنا ذاتي؟
* بالله ! ،، يعني كنتي معتقلة؟!.
+ كانت معاي علوية تابر ونسوان تانيات ،، ودونا سجن أم درمان، هناك لقينا السجن (متروس) رجال ونسوان.
* ده في أحداث 19 يوليو؟
(هنا تستعدل ضاحكة في جلستها على السرير بعد أن ظلت مستلقية):-
+ كنت مع علوية تابر ونقلونا سجن أم درمان، في حراسات بحري قابلت قريباً لي إسمو كباكة (تضحك عالياً) ،، هو ذاتو مسكوهو في أحداث هاشم العطا ،، سألتو لمن شفتو قلت ليهو مستغربة:- مالك بجاي عملت شنو؟! ،، قال لي بي نرفزة:- وإنتي جايبنك هنا يدقو ليك زار؟.
* المدة القعدتيها كم في سجن أم درمان؟ ،، سمعتي بي إعدام عبد الخالق هناك؟
(تصمت بينما يوضح سعودي):- هي السيرة دي بتتعبها شوية بالمناسبة لأنو إعدامو كان صعب عليها ،، تعرف ؟ ،، بتها الوحيدة دي إسمها في الشهادة (خديجة) لكن عبد الخالق هو اللي سماها "باكنام"!. هي هسع خريجة جامعية وموظفة!.
* طيب قابلتي منو في السجن؟.
+ إنت يا حسن يا ولدي ما عندك شغلة؟!
* ما ده شغلي يا حاجة أم جمعة!.
+ شغلتك تسعلني (سعال) منكر ونكير؟!.
* أبداً والله ،، أنحنا عاوزين نتونس معاك ،، إنتي بتكوني قابلتي (فاطنة) أحمد إبراهيم في السجن خلي بالك!.
+ (فاطنة) دي قابلتها من الخمسينات ،، (فاطنة) لا هينة ولا لينة. دي من بيت خرج علما وخرج ناس فاهمين ومثقفين ،، أبوها قاضي وأمها خاتمة القرآن.
( يوضح لها يوسف حسين أني سألتقيها بلندن قريباً)
* عندك وصية ليها؟ لو قابلتها أقول ليها شنو؟
+ (أجابت بسرعة):- قول ليها أرجعي تعالي!.
* ترجع عشان شنو؟ هناك قاعدة كويسة جداً معززة ومكرمة.
+ ( معترضة):- فاطنة كرمت نفسها وما دايرة حد يكرمها ،، دي أول أمرأة تدخل البرلمان، لمن تلقاها سلم عليها وأنا بما بقول ليها أرجعي أوامر كده ،، هي براها بتقيم وضعها!.
* .........!
+ إنت راجع متين؟
* قريب!.
+ بدور أرسل ليها حاجة من هنا ،، أرسل شنو؟!.
* هي ما محتاجة لي حاجة ،، إنتي عاوزه شنو نجيبو ليك؟!.
+ بدور سلامتك.
* كدي كلمينا زيادة عن زوارك في كوبر ،، أنا عرفت إنو دكتور عوض دكام برضو من زوارك!.
+ دكتور عوض يرحمو الله ، كان بطلع من عيادة المساء لبيتي في كوبر، وأول ما يدخل علي يقول لي بي ضحكو داك " ألحقيني بفنجان القهوة ،، أصلو ما كان بقطع الأتر ،، أهلو هنا في بحري كلهم بعرفهم.
* وتاني منو؟
+ والله كلهم ،، دكاترة بحري ديل،، ناس الامتياز والاخصائيين ، كلهم أولادي وما كانوا بغبوا. الطلبة والعمال والموظفين ، مية زول داخل ومية زول مارق ،، جوة البيت وبرة البيت تحت الشجر. ديل يغسلوا وديل يكووا وديل يضبحوا وديل يجهزوا في الأكل وكميات هدايا تملا البيت عشان نوزعها للمحتاجين ،، زمن يا حسن يا ولدي!.
* .....!
+ ......!.
( تستأذن لصلاة العصر ثم تعود )
* يالله ورينا عرفتي نقد كيف؟.
+ من زمان بعرفو، بعرفو وبعرف أخواتو وبنمشي ليهم أنا وعلوية تابر في الأعراس والبكيات في القطينة.
* ......
+ ومرات في الاختفا كنت بطبخ ليهو أكل كان بريدو وبرسل يوصلوهو ليهو!.
* أكل زي شنو؟
(تصمت)
* أها ،، والتيجاني الطيب؟!.
+ ليهو الرحمة ،، التيجاني الطيب وأخوانو كلهم وفتحية زوجتو ، كنت بقرا الميدان وكل الصحف. كنت مشتركة في الميدان.
* وحسع؟!.
+ ما بعرفو! ،، إنت يا زول ما عندك شغلة ولا شنو؟!.
* ما قلت ليك دي شغلتي! ،، حصل طلعتي بره السودان يا أم جمعة؟.
+ (تصمت ويوضح سعودي دراج):-
+ سافرت كتير بالمناسبة!.
* معقول؟! ،، ورينا مشيتي وين ياحاجة
+ مشيت الاتحاد السوفيتي ومشيت اليابان!.
* يعني لفيتي العالم! ،، أحكي لينا يا الله.
(تنادي سعودي ويوسف سبت لمساعدتها في فرك الملاح!)
* البتطبخي فيهو ده ملاح شنو؟.
+ ويكة بي فاصوليا.
* يعني ملاح بصارة ،، مش؟!
+ ياها بصارة.
* دحين البصارة ما بفركوها بي ملوخية أو ملاح أخضر ؟!.
+ يا ها زاتا ،، ما تراكا بتعرف! ،، الملوخية بتجي بعدين.
* حسع سعودي ده بخدم فيك هنا ،، في بيتو قاعد بخدم يا ربي؟!.
+ أسألو هو! ،، آي بخدم.
* عرفتيهو كيف؟
+ طيب سائلني مالك؟!.
(سعودي ضاحكاً):-
+ ما قلت ليك ،، الزميلة دي ما بتقدر عليها!.
* مشيتي الاتحاد السوفيتي واليابان في وفد الاتحاد النسائي مش؟!.
+ مشينا مع فاطمة أحمد إبراهيم.
* أحسن حاجة عجبتك في روسيا شنو؟
+ النظام والانضباط ،، أريتا هي حياة الهنا والمنى ،، تعرف ( تعتدل للحديث وهي مستلقية) :- في روسيا الساعة اربعة صباحاً الشارع ده يتنضف ، أهم حاجة النظام،، الكبير ورا الكبير والصغير ورا الصغير،، وأبرز حاجة النظافة،، شعب كريم جنس كرم ،، بس زي السودانيين يا دكتور.
* عرفت إنو فرع حزبك رشحك في انتخابات عام 1986؟!.
+ (تصمت ،، فيوضح سعودي دراج):-
* أيوة صحيح ،، رشحها فرع حزبها للانتخابات ولكن تنازل الحزب لمرشح الاتحادي الديمقراطي عبد الوهاب خوجلي.
( تواصل أم جمعة وقد تحمست للدردشة):- دعمتو ووقفت معاهو في الانتخابات، وسقط مجذوب يوسف المحامي مرشح الجبهة.
* ........!.
+ غايتو ،، طالما أنا في كوبر دي ماكان في مرشح جبهة بفوز فيها. والله بعد نتيجة الانتخابات مجذوب زاتو كتر خيرو جاني وسجل لي زيارة وكان معاهو ولدو يوسف، وقال ليا العفو والعافية.
* ده شرف عظيم إنك تترشحي في منطقتك ،، معناتو ليك شنة ورنة من جماهير الحي مش؟!.
+ (تصمت بينما يوضح يوسف سبت):- الزميلة أم جمعة متخصصة في مجتمعات كوبر وأسرها، كانت تُستشار في كل صغيرة وكبيرة، أي ناس عاوزة تعمل زواج يتصلوا بها، الجمعيات التعاونية، المناسبات في الفرح والوفيات، كانت عمدة حي كوبر تقريباً.
+ ( يضيف سعودي دراج):- في جانب مهم جداً يكشف مدى إمتنان أم جمعة وارتباطها بالقضايا اللي آمنت بيها ووظلت تتداع عنها، تعرف في فترة إعتقالات انقلاب 19 يوليو، أم جمعة كانت تحمل المؤن وحاجيات المعتقلين بالشوال وتذهب بيها لكوبر!.
* ........!
+ عساكر السجون كانوا يعرفونها وتعرفهم، والضباط يكنون لها كل احترام وتقدير، ودي مسألة كان ليها اعتبار وتقدير كبير من كل المعتقلين. كانت تطلب من جميع المعتقلين حصر احتياجاتهم لتوفرها ليهم في الزيارات القادمة.
* وحسع يا أم جمعة؟!.
+ حسع وين ،، زمان كنت حوامة ،، بحوم وبمشي المناسبات والندوات والاجتماعات ،، لكين حسع كبرت وفترت والكرعين ما شايلاتني. زمان كان عندي صحة وقوة وعافية وبحوم برجولي ديل لا خلينا مظاهرات ولا خلينا مواكب ولا اعتصامات ،، شاركت في المواكب ضد مايو وناس فاطمة عبد المحمود كانو حاشية نميري. ،، دحين قعدت المرض هداني ويا ريت القى دوا للكسير ده.
* الله يزيدك عافية وصحة ،، قلتي ليا عمرك كم سنة يا أم جمعة؟!.
+ سبعين سنة
(يضيف سعودي دراج):- تمام سبعين سنة ودخلنا الحزب سوا!.
* إنت كم سنة يا سعودي؟!.
+ أنا 78 سنة ودخلنا الحزب سنة 1955.
* دخلتو كيف وفي ياتو ظروف؟!.
+ (أم جمعة مواصلة):- دخلنا كده! ،، أنا وسعودي دفعة.
* .....!.
+ بتذكر عملو لينا حفلة شاي في فرع الحزب لمن جيناهم!. دخلن معانا ناس فاطمة عطية، جيناهم مبلمات ولابسين تياب التوتل الأبيض وده كان توب الاتحاد النسائي.
* كدي إتذكروا الزميلات والزملاء العاصرتوهم في فروع الحزب بمدين بحري الحزبية في الوكت داك؟!.
+ (وبدأ كل منهما – سعودي وأم جمعة – في إيراد الأسماء):- السر تابر وشقيقته علوية تابر حمري أمين، حمزة النور، قاسم أمين، عباس علي، هاشم عابدين، أبو الكرم ،عبد الله عبد الكريم الجاك، صابر محمود، علي صيام، مصطفى علي سليمان، كرومة، حسن بيومي، محمد رجب، محمد عثمان الزبير وزوجتو عواطف، خليل الياس، محمد عمر الكابتن، فاطمة عطية وعبد اللطيف كمرات، عثمان حمد محمد، المرحومة صفية الصايم، محمد صلاح وأختو ليلى صلاح، دكتورة ثريا مضوي وحالياً في منطقة بري، أحمد حسين، دولت محمد الحسن، قاسم كرم الله وهو قريب الجنيد علي عمر، حيدر زين العابدين من ناس شمبات وحسع موجود.
* كانت عندك تجارب كبيرة في الجمعيات التعاونية وجمعيات ربات البيوت،، مش؟!.
+ ( بعد فترة صمت طالت):- ناس اللجنة الشعبية قالو جمعية ربات البيوت بتمول الحزب الشيوعي لأنها كانت بتوفر كميات كبيرة من السكر للعضوات والأسر وكانت مؤثرة جداً في الحي. كانت تضم عدد كبير من نساء نشطات وكانت تعاونية، توفر السكر وبتوفر المواد التموينية والخيرية للمناسبات، تعال شوف الكراسي وتعال شوف الخيم والترابيز، الصحون ، والصواني، الترامس بكل أنواعها، موية وشاي وخلافه، كان عندنا مجلس ادارة لأنو عندهم مال مستثمر.
* تقريباً ده كان مساوي لنشاط منظمات المجتمع المدني حالياً!،
+ (يوضح سعودي دراج):- تقدر تقول المعادل ليهو ،، كان الشكل الجنيني لمنظات المجتمع المدني بس بشكل أهلي وشعبي أكتر!.
+ (أم جمعة):- والله الجمعية دي إستفادوا منها حتى اخوان عمر البشير في الحلة ،، بعد الانقلاب الكيزان مشوا فتحو بلاغ في محاكم النظام العام ضد جمعية ربات البيوت، وقالو في تلاعب في كميات السكر وتوزيعو، كل الناس كانت مطاردة ومعتقلة ومشردة ،، بعد جلسة جلستين تم شطب البلاغ ، بس بعد داك قبلوا على تكسير التعاونيات في بحري ، صادروها ووزعهوها على كوادر الجبهة ،، حرم التهامي وأم سُر علي سعيد أميات ولكنهن واعيات جداً وقدمن طلبات للحزب، في ناس في الحلة قالو عيب تودو اماتكم للمحاكم وكان فيهم ناس من الكيزان زاتم ،، النسوان اتحدو قالو يجو الناس المتهمين جمعية ربات البيوت ويحلفو في القرآن يقولو إنو ببيعو السكر في السوق الأسود ومافي زول شهد واتشطبت القضية.، عمر البشير قال ليهم انحنا جينا عشان نعرف الحرامي منو ونفضحو، اتحاد الشباب حاولو يفكو دعاية وسط الناس إنو غالبيتهم انضموا للأمن عشان يخلقو بلبلة وتشكيك وظنون!.
* .....!.
+ عمر البشير ونظامو حاربونا واعتقلونا ، هو الكسر الاتحادات والمنظمات ،، الاتحاد التعاوني بكوبر عمر البشير ونظامو ده صادر قروشو بالمليارات وعرباتو وممتلكاتو حتى روضة الأطفال شالوها مننا وقدر ما رفعنا قضايا مافي زول أنصفنا . اللواء عبد الحي كتر خيرو مشى لي عمر قال ليهو ياخي ام جمعة دي ما شقت واجتهدت في بناء الاتحاد التعاوني ده ،، عمر قال ليهو القانون ياخد مجراه انا بالنسبة لي اليمين واليسار واحد وكل زول ياخد نصيبو قدام القانون، بس الحصل لا انصفونا ولا حاجة وشالو كل جهدنا البنيناهو بالسنين.
* ........!.
+ الترابي سبب المشاكل دي كلها والبلاوي اللي أنحنا فيها دي ،، والحمد لي الله على أي حال!.
* شايفك جبتي سيرة البشير وأخواني كتير ،، بتعرفيهو من كوبر؟!.
+ بعرفو زي جوع بطني ،، ياهو ود كوبر!.
* بتذكرك وبعرفك؟!.
+ (بعد فترة صمت طويلة ودون أن تستعدل في إتكائتها وكأنها غير راغبة في تفاصيل تضيف قائلة):- بعرفو وبعرفني ،، بنعرف بعض بالحيل ،، جابوني عشان أشرف علي عشا عرس بت اختو واتكلمنا مع بعض!.
* بخصوص شنو؟!.
+ ....!.
* لسع في مزاورة ليكي من عضوات الاتحاد النسائي الزمان؟!.
+ أنا يا حسن يا ولدي زاتي عندي لوم!.
* لمنو؟!.
+ لوم كبير للناس!.
* قوليهو ،، وضحيهو!.
+ ما حسع ،، لمن يجي وكتو!.
* في مؤتمر الحزب الخامس كانت واحدة أثناء الغناء بتدي نقد الشبال ،، دي إنتي ولا علوية تابر؟!
+ أنا ما قدرت أمشي المؤتمر السادس ،،
* بكل القدمتيهو ده بتكوني راضية عن نفسك،، مش؟!.
+ ما ندمانة من تجربتي وما طالبة من زول ييشكرني أو كرمني ،، أنا كرموني ،، جوني الأخوان قالوا ليا عاوزين نكرمك في النادي ورئيسو كوز قلت ليهم ما بمشي ،، ناسي وحباني جوني في بيتي وكرموني بحفل شاي وبسكويت وشهادة تقدير وانا شكرتهم لأنو حباني وناسي، كانت واقفة في التكريم ده الزميلة خدوم، الشعب السوداني حسع مافاضي لتكريم ،، مشغول بطاحونة الحياة في أكلو وشرابو . فيما بعد تم تكريم لي من مختلف الطيف السياسي في المنطقة ، شيوعيين، وبعثيين، بما فيهم ناس الكيزان نفسهم وقبلناهم بعد ما أقتنعوا بتكريم الشعب السوداني للناس البستحقوا التقديم.
__________
أعيد نشر الحوار كاملاً هنا نسبة للأخطاء التي صاحبت نشره في عدد صحيفة الميدان الصادرة صباح اليوم للأسف.
عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

انقر هنا لقراءة الخبر من مصدره.