بسم الله الرحمن الرحيم في السلك الناس كلها بتتكلم عن التجنيس امس الاذاعه الرياضيه عبر برنامج الرائع عبدالمولي تناولت الموضوع الخط ما دخل معاي كان عندي رأي في الموضوع رأي يستند الي الانتماء الاكبر للوطن مافكرت في الانتماء الاصغر للانديه ياناس ياهوووووووو الاتحاد السوداني لكرة القدم هو الجهه الاداريه المناط بها تسيير نشاط كرة القدم علي المستوي القومي وتطويره والعمل علي النهوض به وحماية اللعبه وحماية اللاعب الوطني والدوله تعطي من خلال خطتها العامه لكل اداره مساحه واسعه لوضع الخطط والبرامج واللوائح التي تقود الاداره الي تحقيق اهدافها واهداف الاداره هي السبب الذي من اجله تنشأ الاداره وتقوم الدوله بالتنسيق بين اداراتها المختلفه لتخلق تجانس يساعد علي الوصول الي الاهداف الاداريه اندية القمه تبارت في احضار الاجانب ليلعبوا كرة القدم عندنا في وطنا العزيز ده الاتحاد رأي ان ترك الحبل علي قارب الاجانب يضر باللاعب السوداني ويضايقه في خانته قام الاتحاد حدد عدد الاجانب في كل فريق الفرق ماعجبها قرار الاتحاد احتالت علي القرار بالتجنيس اصبح لكل فريق خمسه لاعبون اجانب في حين ان المسموح به اربعه اجانب حاول الاتحاد انقاذ قراره السابق واتي بلائحة المجنسين وصل الامر للقضاء والذي اصدر قرارا قضي علي آخر آمال الاتحاد في الابقاء علي اكبر عدد من الخانات للاعبين الوطنيين مادايرين نخوض في قرار القضاء لانه جدير بالاحترام والطاعه المهم عدم التنسيق بين جهات الدوله الاداريه ( الجهه التي اصدرت قرار التجنيس والجهه الاخري وهي الاتحاد العام ) كان السبب المباشر في الترهل والتوغل الاجنبي علي الخانات الوطنيه كل العالم يعرف التجنيس للرياضييين او خلافهم ولكن جنسية الدوله لاتعطي لشخص لايستفيد من خدماته الوطن في المقام الاول اللاعب المجنس يلعب للنادي وهي فائده بسيطه ولا يلعب للفريق القومي وهي الفائده الكبيره المفترضه في اللاعب الاجنبي بل ويحرم اللاعب الوطني من مساحاته في التنافس مع ناديه داخليا او خارجيا ويأتي الوطني للفريق القومي من دكة البدلاء القانون عندنا يعرف حق منح الجنسيه ونعرف انها ليست ببدعه ابتدعها المسؤلون مؤخرا ولكن كان عليهم قبل ممارسة السلطه واستعمال الحق ان يعودوا للاتحاد الذي حجم مشاركة الاجانب كان عليهم ان يعرفوا السبب ولو فعلوا ذلك لما منحوا الجنسيه للاعبين بالصوره الحاليه ممكن نجنس لاعب موهوب وصغير وتتيح له القوانين ان يشارك دوليا باسم الوطن مع الفريق القومي لكن ان نجنس ( من طرف ) دون ان تعود تلك الجنسيه بالنفع علينا قوميا فهذا ليس المقصود من منح الجنسيه استثناءا سمعت من الرياضيه ان اكثر من ثمانين اجنبي مسجلين في اتحاد الخرطوم بفرق الدرجتين الاولي والثانيه بربكم هذا العدد بعد خمسه سنوات يمكن ان نستطيع معه ان نحصل علي فريق قومي سوداني ابا عن جد ؟ ياناس شداد ماتابوهوا في كل الظروف بعد ده ملحوقه اقعدوا في الواطه وختوا شروط تجنيس الرياضيين بالتأكيد يصبح التجنيس بعدها اغراضه قوميه بحته وليست فوائد تعود علي النادي فقط عندها سيضطر النادي الي البحث عن لاعب يجنسه تتوافر فيه صفات وشروط تفيد الفريق القومي قبل النادي ويقعد الفريق القومي خالف كراعو والانديه تغزيه بلاعبين ممتازين ويكون من شروط التعاقد وقبول التجنيس ان يلبي اللاعب المجنس نداء الفريق القومي اذا ما طلب منه ذلك لاسانا السوداني يلعب لفريق مالي القومي سولي شريف السوداني يفكنا منو الله باري ديمبا السوداني قاعد وقسطنطين يولف في مدافعي الفريق القومي ايداهو السوداني هدافا لاندية افريقيا وفريقنا القومي طاير من اي منافسه والامثله كثيره جنسيتنا حلوه وعاجبانا والدايرها يجب ان يكون خارقا في مجاله ويفيد الوطن اولا اهلنا بايتين في الصفوف دايرنها والغرباء في بلادا طيرها عجمي لاقنها الاولي اهلنا البايتين في صف الجناسي والبظابير علي النونو السوداني ياربي جا السودان ولا لسه ايفوسا السوداني قالوا بحب الحلو مر والمامبو السوداني عليكم الله ادوا كابوندي كمان الجنسيه والله ياهو الفضل ايفوسا وديمبا وكابوندي وسادومبا وامبيلي وسولي شريف سته اجانب في الهلال تاني الهلال الفضل فيهو شنو محلي غير انجازاتو ؟ بعدين حلاوةالانجازات بتكون لما تتم بايدي وطنيه يعني لو في الشركه السودانيه لصناعة الطائرات المدنيه وكان كل مهندسي وموظفي وعمال تلك الشركه اجانب ما بنفرح بالانجاز لكن بنفرح اكتر للشركه السودانيه لصناعة المراكب التقليديه طالما كانت الصناعه بايدي سودانيه اصليه ونفرح شديد لو طورت الشركه السودانيه لصناعة المراكب التقليديه لصناعتها وحولتها لمصنوعات مطاطيه بالايدي السودانيه يعني حتي علي نطاق الانديه الكأس الجويه احلي لو جات باقدام سودانيه ميه الميه طبعا بتكون حلوه لو جات حتي ولو باقدام سودانيه مجنسه او اجنبيه لكن الاولي احلي سلك كهربا يا وطن يكفينا انك في جوازاتنا الاسم والي لقاء
