بسم الله الرحمن الرحيم (2) البوره عاجباني البوره عجب شديد , ما تفتكروا البوره العربيه الالمانية الصنع , لكن عاجباني بورة البنات لانها غيرت كتير من مفاهيم خاطئه وعادات ورثناها ونقلد فيها دون ان نفكر في اهميتها وضرورتها من عدمه , زمان العرس قالوا اربعين يوم , اربعين يوم الناس تبطل مشاغلها وتجي تتكسر في بيت العرس والعريس يصرف دم قلبوا , منتهي العطاله وعدم الشغله وقلة فرص الاستثمار في ذلك الوقت , ثم اصبح العرس شهر وتقلص الي اسبوعين فاسبوع ثم ثلاث ايام بلياليها , وهو الوضع الذي استمر كثيرا مصحوبا بدلع من العروسات لو ما العرسان في ذلك الجيل كان بالهم طويل لكان السودان اليوم عدد سكانه اربعه انفار , دلع يخلي الزول يكره العرس , فتح خشم المبلغ الفلاني , لازم فتح الخشم ده , وبعد الخشم يتفتح يسدوا الله تاني , نقه الي آخر المشوار , والشبكه , ( بفتح الشين ) وتبدأ الشبكه ( بكسرالشين ) ثم الشيله اربعه وعشرين اربعه وعشرين , اربعه وعشرين توب ( دي عليكم الله مرأه ولا الناله ) اربعه وعشرين فستان ( عرض ازياء ) اربعه وعشرين شبشب ( زول ولا الدوده ام اربعه واربعين ) اربعه وعشرين اي حاجه سواء كبر حجمها او تضائل , المهم اي حاجه تخطر ببالك اربعه وعشرين اربعه وعشرين , وشيلة الاكل باللوري الشطه بالبوكس الطلح غابه ونص والصندل بالقنطار الحنه بالقلاب وده شويه وداير زياده وخالة العروس تقول للعريس بدون ماناس امك يعرفوا زيد لينا الصندليه دي انشاء الله باغتين صغار ويستمر دلع العروس واهلها مع احتمال وارد وهو ان الشغل ده ممكن يقوم في اي لحظه , وبعد داك الشروط , بتنا ما بتسكن مع ام زول , تأجر ليها براها بيت بالطوب الاحمر ( الكلام ده خلي بالك في بيت ناس العروس الجالوص وداخل الراكوبه التي تسندها حيطة الجيران , وطبعا ده كلو لو العروس وافقت بالعريس , لانو كان في عروسات برفضن من طرف ده شين , وده قصير امشي بيهو في الشارع كيف ( فستان هو ) وده ( اخدر ) خلاص يا الطماطم الحمراء , وده معقد , المهم اسباب للرفض شكليه وكتيره , وممكن واحده تتخطب وفي عرس اخو صاحبتها تلاقي صاحب اخو صاحبتها وتتعرف بيهو ويدهشها بشكلو او عربيتو ويكون ده سبب كافي لفركشة الخطوبه , وبعد مداولات تقول للخطيب هاك شبكتك وطبعا زمان الرجال كاتلاهم العواره يحرد الشبكه ويمشي ينخرط في سلك القعدات والشراب والاسي ويودر نفسو سااااي , الليله واحده بترجع الشبكه مافي , واذا قومت الشغل لسبب منطقي يطالبها الخطيب بالشبكه كامله وبالشبشب الجابو ليها من سعد قشره يوم خطوبة ايناس صاحبتها 0 الظروف اجبرت الشباب علي العذوف , والشابات بارن , وبارن الموضه لان لبس الموضه ( بدون توب ) يقنع الفتاه والمجتمع بانها لسه صغيره وقطار العرس مافاتها , الظروف خلت الشابات يكنكشن في اي شاب يطرق الباب ويكون قدر المسؤليه ولو يسكنها في قلبو خلي مع ناس امو , الشابات بقن عاقلات ودارن الستره بعد مابقت البوره بالجمله , بي تمر وفي الجامع كفايه , عقد وافرتق معاك , جيب اهلك ونرجع سوا , والشباب اليأس جعلهم يهربون من مسؤلية الزواج والخوف من بكره خلي الشاب يقول يافكيك 0 اللهم زوج شباب هذا الوطن اجمعين , الدعاء ده ذكرني موضوع , قبل كم سنه مشينا عقد بالامتداد , وكان المأذون هو امام مسجد الحي , وجابوا مكبر الصوت وخطب فينا الماذون مطالبا الناس بنبذ العادات الضاره في الزواج وتزويج الشباب حتي يعف المجتمع المسلم , النسوان جو البيت كان عاجبهن المأذون وحديثه الي ان جاء للدعاء , دعاء المأذون بالمايكرفون وقال اللهم زوج الشباب ونحنا نقول آمين ,النسوان زاتهن قالن آمين , وواصل اللهم زوج من له زوجه واحده , كلنا اتلفتنا يمين وشمال ولما لقينا الدار امان قلنا آمين , والنسوان جوه صرن وشوشن وواحده قالت عليكن الله شوفن الراجل الما بخاف الله ده 0 سلكتد اجمل مهرفي الدنيا الدين والخلق يا ناس والي لقاء
