والرواية بحسب ابنعوف نفسه ان عربة بوكس توقفت وهبط منها احد عشرة رجلاً غلاظ شداد مسلحين بالسيخ والعصي واوسعوه ضرباً والواضح لابنعوف ان الامر قامت به عصابات الكيزان اذ ان ابنعوف له قصيدة عصماء في ذم الكيزان بعنوان مسدار النصيحة ويقول ابنعوف والذى يحي منتدي شعري دوري في جامعة النيليين ان المنتدي معترف ومصدق به من قبل ادارة الجامعة بل تم تكريمه من قبلها وقطعاً لايخلوا المنتدي من نقد الحكومة يا ريس صباح الخير وياها الحالة خمسة سنين نجابد في القراية رجالة خلاص كمل الصبر والأمور بطالة وإحنا ولاد رواعيه وعقبال ترباله قضينا الخدمة في الميدان كتال وبساله ومضغنا الصبر في صي نسايمو علاله بعد جبنا الشهادات البوظف شاله ود ناسك مدير ... إلا الكفاءة عطاله الدكتور وحاتك جوكي سايق الرقشة وأب شنبات مصاقر البيت مع ناس عشه يا حرس ام مسور الا كديب لا حشه ول أنقد بالسنبك تجيبو الكشه أكلو لحمنا ناس الحله قالو عطاله مراتاً طلب مرات كتار عتاله بعد ما رضينا يا ريسنا نبقى عماله فتحولنا الحدود للحبشه والبنقاله بطانتك خمرت فوقنا القبيله فطير واقع المغصه والغبنه الملازمو خطير شباب أتلزم العركم ودوا وقصطير بعد ما عيشو فتق ليش بتدي الطير يا ريس جزم شعبك رقد موجوع ولا هماهو تاني حضارة المشروع الظلم المرض علمنا لحس الكوع والسد أبره في قش للمضايقو الجوع جوامع الفشخره البتصلو فيها براكم تسو كم مدرسة لشعب جاري وراكم ؟ الحرص المدجج اهس كان ضاراكم يوم البعث قابلني ان بقيت باراكم . جت استوزرو الكيزان وملكو السوق ناسين ساقية الدنيا الدوام بتسوق الصفاقه اسه والنقايزه عسوق ما ببروكه ساعة جره الواسوق .. ما بتتوظف الولد الحكومة اتخلت شومالك ضهر ساساق وروحن سلت خلاف الطلبه والمهن الحسابه مخلت إن الجيش أباك ضعت وقنيصتك جلت بنات العفه والعزه وسترت الحال إن أبن العوج والشين تراهو الحال إما يخوضن العوجه ومشي الأوحال ولا تحفي ساساقه جري وترحال سيد المكتب الضروه وتلاته سراير عقب الباب مظلل نازله فوقو ستاير بره تشوف سكرتيرتو ام سديرن فاير قبيل كار الحبش واسع زعماتو حراير التعيين قبيل فوقو الشروط منسجمه شهادة وكمبيوتر فوق لغات العجمه اسه شروطو في الكفل البصد الهجمه والسوق أنزرد بالميسجور والنجمه أول مره تتمنع تقول مي دايره يوم يومين تلاته تره قصيدة الشاعر محمد الحسن يوم يومين تلاته تره المريكب سايره هبشه وهبشتين قلده وتدور الدايره ول تشيل دبيليمها وتقبل غايره عقبان صاحبته ولمة بنات خالاته مرات فد فراش اتوسدن تلاتة البلد القبيل قايل حكمتو صلاته إحنا بغلتك آ ريس وعد عثراتها . يا بلد الوجع ما في الحكومة براها حتنا أنحنا قولة الحق دي ما بنطراها يا الدكتورة عيانتك قضت مسراها وأنتي مفسبكه وجادعه المريضة براها في المستشفي موبايلين وستة شرايح وتسمع قهقهات شنون دكاتره فرايح العيانة تقنت والديكيتير مايح والبجي للحوادث يا الحبايب رايح باليل في المكاتب تلقى ألف حكاية النيرس المكبرته والمرفقة غاية من مكتب مطرف يا المرمده جايه في شن العرق والصقط فوفايه وزير الداخلية سلام الليلة يوم منكورك أولاد الكبار خربوهو جت مشكورك ما دام العوج والشين مرق من كورك تبقى العوجه فيهم ولا في عسكورك عسكور المرور أدو البسوقو إشارة وقوفو ناضمم ضحكو وغمتلو صرار أنا والقاعده جنبي العوحه ما بتتضاره قالت فوق قصد غايتو المعيشه بصاره شرف الكاكي في الغرزة وحكرتو غريشه وتلقاهم جامعات في قهاوي الشيشة اضان الشرطة طرشت ولا عينها عميشة أما الدولة فاهمة والمواطن كيشة .. الدورية تمرق والعساكر شاده والسارينه تنبج في الظلط مي راده أولاد الكبار بالثابتة في كم ماده فد تلفون يدق ترجع تقبل صاده التقرير بجيك كل يوم تمام يا ريس والمؤمن فطن قالك رسولنا وكيس اسه بقولك الحق إن لحقت العيس قبل ما يمرقوك أبان دقون متيس الهيروين زرد جامعااتنا عرض وطول والفنان بغني مع الوزير مسطول لوري البنقو يا ريس بخش على طول قصر يد حكومتك والحكاية تطووووول شريف نجيريا مبسوط من ندى وصاحباته وفي ماي دوقري فرشولهم شرفنا ثباته بعد ما كنا في كرن أم لبوس همباته يات من فينا ديوس راسو تحت الباتا في جده ونواحي دبي بقينا حكاية وجرن بنوت مهيرة على الرزيلة حفايه جوازنا أب صقر كسرنا جناحو بغايا والسوداني قوادن غفير أندايه وخابر نضمي يا ريس بجيك في محلك وراجين فوق جمر بندور نشوف راس حلك يا فشيت غبينتنا أم ضلامنا حلك ولا نوارك الوجعة ونصد ونخلك واسندي علينا يا بلد ام تنايه نصايبك وعضي علينا في ساعة الوجع بنايبك أقدلي وشيلينا هموم صغيرك وشايبك رجال في الشينة والوجعة المغبي حبيابك ما بنفوتك إن بخلت وطاتك وجفت وما بنزحزح أن تقلت يمين وإن خفت كراعن ما مشت في حر هواك وإتحفت إن كال الرماد فيها الضحيوه وسفت أبينا السفر والاغتراب في جده وعهداً يا وطن إن شاء الله مافي مرده بنوم في التراب ونخت ضراعنا مخده بنعيش في هواك إن شاء الله نأكل رده .. قصيدة الشاعر محمد الحسن ابنعوف Dimofinf Player مسدار النصيحة -محمد الحسن ابن عوف http://www.youtube.com/watch?v=oPxTzHYzHAk&feature=player_embedded
