الوقت الساعة التامنة مساء في زقاق بمدنية أمدرمان سمعت كلام كدا غريب من مجموعة نسوان واحدة قالت للتانيات (أنتو ست اللبن شفتوها)ما لكين ست لبن بجد والله تشبه البيه وتزيد علي والله العباية اللبسها رهيبه وقالت يا بنات اللبن دا حقها واللبن من المزراعة حقتم و عندها شنطة زي الكمساري زمان للقروش ومفتاح العربيه والعربية يا نسوان (أتوس) قالت نعيمة أنا أشتريت لبتي عربية أها الاتوس بقت بتاعت لبن (أحي انا من البوبار وخرف الصغار) والعربية الكراسي الوراء شالوها عشان الجركانات يقعدن شوف عيني ما قالوا لي والله ظريفة كدا ونضيفة تفتح النفس للبن حسي أنتو والله لو جات بشتروا منها كدي أنتظروا أمكن تجي دي مواعيدا ...! أخوك طبعا طفيلي ومرضان شمارات عملت الدرب ساسقالحدي ما جات (ست اللبن ) ديك يا العربيه الاتوس الذهبية زي ما قالوا والرأس المربوط بالشارب الاسود والعباية مفصله علي الجسم والسمرة ما سمرة شمس دي حاجة كدا تشبه العسل المهم الرطل عندها بجنيهين وكمان نفس المقاس والعبار بتاع الزوال اللي بيبيع بالحمار قلت تعيش كتير يا أبو الزهراء تشوف كتير والله ودي أخر صحية من ركب التقدم في بلدنا والانفتاح الاقتصادي . طبعا أخوك أشتري وهو ما بتاع لبن أستمتعت بالنظر ومعاملة الشراء وبهجة التسوق والاكتشاف الجديد وأنشالله أعمل روب ومش كمان