بالعربى الكسيح محمد الطيب الامين البكى حار والجنازة (كلب) يا مازيمبي !! * مرات (الفرح) بيبكى *ومرات (الحزن) بيضحك .. * وضحك الحزن هو (بكاء مغلف) ، وبكى الفرح هو (ضحك مستتر) .. * والإتفاق ياتى من حيث ان (دموع) الفرح و(دموع) الحزن كلامها طعمهما واحد .. * يعنى ما ممكن تكون (دموع الفرح حلوة بينما تجد دموع الحزن مُرة) .. * الدموع هى الدموع .. * كتب حلنقى : (الدموع دائما حبايب وانت أفراحك حبايبك والزمن نفس الجراح الصابنى بيها مصيرو صايبك وتلقى دمعاتك حبايبك) .. * إحنا الأفراح (حبايبنا) والجماعة ديلك (الحكام دائما حبايبهم) .. * وردى غنى : (شن بتقولوا فى الفرح المعذب سيدو) .. * الفرح فى حد نفسه فيه تعذيب وبعض الشقى والشجن .. * وفى السودان عندنا (الحزن) هو العنوان .. * و(التعاسة) ربما هى مفصلة على مقاس الشعب السودانى حتى انني اخاف ان يحاسبنا القانون على (الإبتسامة) و(الضحك المعافى) .. * والأفراح فى السودان عادة تجد الفرح (علي مسؤولية صاحبه) .. * الفرح في البلد دى زي (صحبة الراكب) .. * وصحبة الراكب للذين لا يعرفونها هى مثل تأهل المريخ .. * المريخ ده يا كافى البلا وصل دور المجموعات ب(اللولوة) وهسه وصل دور الاربعة (صحبة راكب) .. * ناس المريخ ديل يشهد الله بيذكروني بى (أخو العروس) .. * في عروسات كده عندهن اخوان (هُبل) جنس هباله .. * الواحد بيكون فرحان إنو هو (اخو العروس) .. * مرة عندنا في حلتنا ولد زي ديل .. * الولد ده يوم عرس اختو كرهنا الحفلة .. * تكون قاعد ليك في كرسي وبتعاين في الجكس الولد ده يجيك من هناك يقول ليك : يا شاب لو سمحته ادينا الكرسى ده .. * تقول ليهو : كرسى شنو ما شايفني قاعد ؟؟ * يقول ليك : يا زول اديني الكرسى انت ما عرفتني ولا شنو ؟؟ * تقول ليهو : ابدا ما عرفتك .. يقول ليك انا اخو العروس .. * عروس ب(الفاء) .. * هسه تأهل المريخ بيشبه الزول البيقول ليك (انا اخو العروس) .. * تأهلكم ده المفروض تخجلو منو .. * المهم .. * ما علينا .. * الفرح في البلد دى اصبح شخصي .. * يعنى بتفرح لما تعرس وبتفرح لما تنجح وبتفرح لما تقبض المرتب .. * فرح شخصى .. * نحن نعانى من نقص فى (الفرح الجمعى) أو (الفرح الجماعى) .. * ربما تكون اخر فرحة جماعية او نصف جماعية هى فرحة الناس بتحرير (ابو كرشولا) .. * عدا هذا لم نفرح قريبا .. * ولأنه (الكبير) فقد كان الفرح أكبر .. * صناعة السعادة هى من الصناعات (الثقيلة والشاقة) جدا.. * صناعة السعادة تضاهى صناعات (الشاحنات والبواخر والقطارات) خاصة فى وطن اصبحت (التعاسة) هى (الوجبة الرئيسية) فيه .. * ولكنه الهلال .. * هذا الحبيب الذي أطرب (ود الغرب) وجنن (ود الشرق) وعذب (ود الشمال) وبشتن (ود الوسط) وحتى (الجنوب المفقود) لم يسلم من السعادة .. * انه (هلال العز وهلال عازة).. * هلال الغبش والدكاترة والمهندسين والكماسرة والموظفين وعمال اليومية والعساكر والسواقين والباعة المتجولين وربات البيوت وحسنوات الجامعة والمغتربين والأطفال والشياب والعيانين .. * انه هلال هذا الوطن .. هلال معبق بالصندل والعرق وريحة الدم والقرنفل والنعناع .. * هو خليط و(عصير جمال) وهو (سكر حلال) و(سُكر ينفع حتى مع مصابى السكرى).. * كانت اللوحة باذخة الجمال والمشهد خرافى داخل استاد الهلال .. * مبكرا حضرت الجماهير العظيمة وحشدت الحناجر والطاقات وقامت بدورها على الوجه الأكمل فنالت ما تستحق من الفرح والفخر والتحايا .. * نامت هذه الجماهيرية العظيمة والشفاه باسمه والجبين مطروح والحسود زعلان .. * الهلال هو (ورثه) تقاسمها الشعب الأزرق بالتساوى ونفس الأحساس العالى عاشته الخرطوم وام درمان وبحرى ونيالا وكسلا والدامر وبورتسودان والدويم والأبيض والجنينة وسنار ومدني وكوستى ودنقلا والقضارف وعطبرة والفاشر وكوستى والدمازين وبقية حسنوات السودان .. * أنه الفرح الجماعى الذى يضاهى الزواج الجماعى .. * حداشر فارس دخلوا الميادين فكانوا على قدر الرهان (جضمو الكفر) وجندلو مازيمبي .. * كل النجوم كانو أبطال يسستحقون المحبة والتقدير .. * ومن الصعب جدا ان تكتب عن جماهير الهلال لان المشهد أكبر من التصور وارفع من الادراك والخيال .. * هنيئا للهلال بهذه الجماهير (الطاااااااعمة) وهنيئا للجماهير بهذا الهلال (الفااااااااااخر).. * من حق الجماهير ان ترفع الرأس لان هذا الهلال (بيملأ العين) .. * هلال رغم النواقص يمضى الان بقوة وثبات دون اى مساعدات .. * لا جلاكسي ولا مركوب نمر .. نحمد الله .. * قالو مازيمبي جاكم والمساكين ما عارفين التمساح ما بهددو بالغرق .. * قالو كدبايا بيرقص فرد عليهم اطهر الطاهر ورقص السودان كله ما عدا (نسابت) كدبايا .. * والله البيشوف اهتمام جمهور المريخ بكدبايا يحلف يقول الزول ده عندو معاهم نسب .. * أ تقول بكري المدينة متزوج اخت كدبايا ده .. * عليك الله هسه ما بتخجلو كباااار كده وتقولو كدبايا جاكم ؟؟ * ما بتخجلو ؟؟ * ده الهلال ما بخوفو بمازيمبي ولا كدبايا .. * هلال حلال خدمة يمين وعرق جبين .. *لا بنعرف منشطات ولا منبهات .. * اولادنا بيشربو الشاي والقهوة وبجو داخلين .. * لا منبه ولا منشط .. * نحمد الله .. * وكدبايا الكان عاجبكم ده ح يرقص لما يقابلكم يا صحبة الراكب .. * ونحن ما بنقول ليكم مازيمبي جاكم لكن بنقول ليكم إحنا جيناكم .. * والله انا في الدنيا دي عندي (خمسه) امنيات (تلاتة) هى : * الأمنية الاولى إنو ما في حكم يستلم دولارات من رئيس نادى ، والامنية التانية نقابل المريخ في المربع .. * نقابلكم في المربع عشان نعرف (اخو العروس منو) ؟؟ * لما نقابلكم الفيهو بخور بنشم .. * عظمة الهلال انه بكل هذا النقص يفعل ما يفعل في كبار افريقيا .. * كبار افريقيا حاليا فيهو اتنين بس : (الهلال ومازيمبي) .. * والباقين (اطفال افريقيا) .. * كونو تتأهل عبر السندوتشات هذا لا يعني انك كبير من كبار افريقيا .. * كونو تتأهل صحبة راكب ده ما بعنى انك كبير بقدر ما بيعني انك (اخو عروس ساكت) .. * المهم .. * إذا إعتبرنا ان السودان هو (إنسان) .. * كده نعتبر انو السودان ده هو (زول) .. * نعتبر كده .. * واى زول طبعا حر في (إعتباراتو) .. * الهلال يمثل (قلب) الزول الذى هو السودان .. * الهلال (كرفتة) فى (عنق) السودان .. * الهلال (عمامة) علي رأس السودان . * بل هو السودان .. * ولذلك نحن نحب هذا الهلال الذى يقوم بادوار لا تقل عن ادوار القوات المسلحة .. * القوات المسلحة تكسح وتمسح وتفرح والهلال كذلك .. * قال علمه قال .. * والله انا ياداب عرفت الاهلى المصرى قصد يطير من الابطال ليه ؟؟ * الاهلى خاف على سمعتو من ناس العلمة والمريخ .. * الاهلى طلع اعقل من مازيمبي والهلال .. * الاهلى اتعامل بمبدأ : (سمعتي ومصاريف جامعتي) .. * لكن السنة الجايه لو لقينا الابطال فيها ناس العلمة والمريخ بنطير مخصوص .. * ياخى علمه ؟؟ * مجموعة فيها علمه ومع ذلك (اخو العروس) اتأهل صحبة راكب .. * غايتو جنس غايتو ؟؟ * العمود ده اسمو (قولت خير) وبكره يا مريخاب بندخل ليكم في التقيل .. * باكر كان الله ادانا عمر نشوف اخو العروس جاء من الجزائر ولا لسه .. * و..و.. * والزول بفتخر وبباهى بالعندو يا مكسيم
