سندس الناظر .. من أشهر وأفضل مطاعم السمك في أمدرمان اكتسب شهرة كبيرة ممتدة لسنين طويلة وهو يجيد فنون وأسرار مهنته باتقان ويحافظ بل ويزداد عدد زبائنه على الدوام إنه هاشم بخيت التقته (آخرلحظة) في دردشة سريعة وهو يزاحم في توفير طلبات زبائنه بالقرب من ميدان الربيع. ٭ اسمك بالكامل ومن أي مدينة؟ - أنا هاشم بخيت عمر من أبناء الجموعية قرية عمورات ٭ كيف أخذت طريقك لممارسة هذه المهنة وهل هي متوارثة من الأسرة؟ - إحنا أهلنا الجموعية ديل أصلاً شغلهم السمك ووراثة وتلقى القليل النادر عندو شغل تاني غير السمك ودي الشغلة الادانا ليها الله من آبائنا. ٭ أول مرة اشتغلت وين ومتين؟ - أنا أصلاً شغال مع الوالد كنت في سوق العرضة،و منه انتقلتا هنا مكان الوالد سنة 1970م بالعباسية، و هو طبعاً اتخلى عن الشغل لأنه أصبح كبير في السن سنة 1983م وأنا من بعدو استلمت مكانه، لأني أنا الشغال معاه، وأنا الولد الكبير ودي مهنتي ومهنة والدي. ٭ قالوا إنك كنت شغال مع شعيب ربنا يرحمه؟ - لا أبداً شعيب دا أخوي ووالده خالي شقيق والدتي وشعيب أصلاً شغال مع والده وبعدها انفصل منه، وأنا شغال مع أبوي وما حصل اشتغلت مع زول. ٭ أسعار السمك بدأت من كم والآن بكم؟ - زمان كنا بنبيع السمك من غير طلبات عادي بأي مبلغ بندي الزول لكن الآن تحكم فينا الغلاء الحاصل حالياً.. الطلب ب 35 جنيه لأن أسعار الزيت غالية، وزمان قبل سنتين كان الطلب ب10ج وأنا لما بديت في المنطقة دي بدأت بجنيهين ونصف. ٭ حسب آراء الزبائن محلك بالفعل جاذب كيف كسبت هذه الثقة؟ - أي الحمد لله وأنا كسبت الثقة دي أولاً المصداقية في العمل أهم شيء عندنا والمعاملة مع الزبائن وأنا ما بعامل الزبون بما عنده من قروش..حتى الذي لايملك و ما عنده بيآكل حتى والطلب ب35ج بس إنت تصلنا كيف. ٭ أفضل أنواع السمك البحبها زبائنك؟ - حالياً بحبو السمك البلطي هو الأكل السائد بالنسبة للمجتمعات كلها.. ثانياً في السمك العجل والكبروس أغلى من البلطي!! لكن عندنا في السمك المجمر ما محبوب لكن ممكن يتعمل في البيت صينية أو شوربة، ٭ يقال إن أنواع السمك البتحبها زبائنك ما متوفرة دايماً؟ - لا أبداً مستحيل لأنو إحنا بنركز على البلطي تركيز كامل، وفي أنواع ثانية بتكون متوفرة لكن بتكون كميتها بسيطة لأنه ممكن الزبون يغير رايه من البلطي لصنف آخر. ٭ هل الزبائن من أمدرمان والخرطوم فقط أم من مناطق أخرى؟ - من أمدرمان والخرطوم وبحري ومن الشجرة والحلفايا بجوني زبائن وسمعتنا مغطية الحمد لله. ٭ أشهر الزبائن؟ - ما بقدر أحدد ليك في ناس «كتار» بجوا يشيلو مني كميات كبيرة وهم كتار جداً ٭ ما رأيك في التوسع الذي شهدته محلات السمك في العاصمة..؟ وهل تأثر عملكم بها ..؟خاصة أصحاب المحلات العادية؟ - إحنا شغلنا شعبي وبالنسبة للمحلات الكثيرة الناس يشتروا بأي سعر لأنه محلهم بالجد مهيأ وببيعوا بأسعار عالية.. وما بجاملوا زول دى الشئ الخلانا نضغط الناس ونعمل السعر ب35ج وكنا بندي الناس بأي سعر. ٭ يوم الجمعة بيكون بيع السمك أكثر إقبالاً من الأسر لوجودهم في المنزل؟ - نعم صحيح بجوا يشيلوا طلبات للبيوت وهناك أسر بيأكلو هنا، الواحد يجيب أولاده بيأكلو عندنا، لكن في الغالب بشيلوا طلبات للبيوت. لأنه زي ما قلت ليك سمعتي مغطية الحمد لله.. بس ما بقدر أحدد ليك الزول المسؤول بجي يقعد يجيني شخص تاني يشيل الطلبات يقدمها له. حتى مرات ما بشوفه بعيني.. حتى لو وقف في الصف. ٭ أكثر الأيام زحمة وأكثر الأيام الإقبال فيها عادي؟ - الأيام الزحمة الجمعة والسبت والأيام العادية في زحمة برضو الحمد لله لكن مازي الجمعة والسبت.. الجمعة طبعاً بتكون أحسن من السبت لأنه زمنها محدود مثلاً لحدي الساعة 12 ظهراً.. لازم نقفل عشان كدا بيحضروا بدري يحصلوا قبل ما نقفل. ٭ أشهر الزبائن في المحل من الفنانين والرياضيين والصحفيين؟ - الفنانين منهم أبو العركي البخيت، وعبدالقادر سالم وغيرهم أما الصحفين منهم استاذ هساي والصحفي الأستاذ أحمد محمد الحسن، وبعض منهم ما بعرفهم أنا أما الرياضيون فمن مجتمع المريخ .. وأيضاً مجتمع نادي الهلال منهم الكوتش شوقي ومحمد آدم مداومون بصورة مستمرة.
