الدوري المصري اتلغى بسبب أحداث بورسعيد .. واللاعبين كلهم في إجازة مفتوحة من المشاركة في اللعب التنافسي ماعدا الأندية المشاركة في البطولات الأفريقية ودي طبعا نادي الاتحاد السكندري مافيها... وزي ماكلنا عارفين الحضري يلعب حاليا مع هذا الفريق.. الراجل فكر وحسبها في راسو وداها شمال وداها يمين لقي لو قعد لغاية شهر ستة (فترةالإعارة القالوها) بدون كورة مع العمر المتقدم جدا وفي راسو فترة زيارته للسودان ومشاركته مع فريقه في عدد قليل من المباريات لقي النتيجة مخيفة جدا معناها إنتهي كلاعب .. يعمل شنو .. يعمل شنو .. إتذكر اتفاق الإعارة وإتذكر إنه جمال الوالي خاتي اتحاد الكورة في أصغر جيب من جيوبو وعارف الراجل ما حا يصدق لو ضرب ليهو تلفون ساكت وقال ليهو إن عصام الحضري حاينطط من الفرح خلي يقول ليهوأنا عايز أرجع المريخ من غير لاندم ولا اعتذار ولايحزنون بس عايز أرجع ح تتفتح له مكاتب الإتحاد العام علي مصراعيها وشبيك لبيك ياوالي نحن بين إيديك عايز إيه؟ الحضري يرجع؟ جدا لكن كيف إنت عارف قوانينا مابتسمح بالإنتقالات إلا في فترات الإنتقالات والدوري شغال نرجعوا كيف ؟ إستثنوهو.. قالها جمال ببساطة شديدة.. الإستثناء عندو شروط مامتوفرة في حالة الحضري.. كيف مامتوفرة؟ قالها جمال بغضب.. إنتو مابتحسو ما شاعرين بالمأساة العايش فيها اللاعب المصري بعد كارثة استاد بورسعيد.. أبسط حاجة نقدمها ليهو إن يواصل نشاطه في السودان مش الحضري بس لو في طريقة أي لاعب مصري عايز يلعب عندنا نعمل موسم استثنائي الهلال لو عايز يسجل ابوتريكة وبركات وعماد متعب ونحن ممكن نجيب مع الحضري حارس المنتخب الأول الشناوي أصلا مشكلتنا في الحراس ولو في طريقة نجيب لينا حارسين مع الحضري. والأمل يسجل لو عايز من الإسماعيلي وأهلي شندي من حرس الحدود نحن أشقاء ومفروض نقيف مع بعض في الظروف دي .. الغريبة ناس الاتحاد بفكروا وترزية القوانين بفتشوا في الثغرات عشان يسمكروا عودة الحضري حسب رغبة الريس جمال المابقدر يرفض أي طلب للحضري .. ايام مغادرة الحضري لبلده وإساءاته وبذاءاته ورفضه لكل الرجاءات والبكائيات وسف التراب واستفزازه المتواصل للمسؤولين وسخريته منهم بطريقة أثارت غضب حتى المواطن العادي الذي لاتربطه أي علاقة بكرة القدم (حرارة قلب ساي) كان الإتحاد مجرد منفذ لتوجيهات الوالي حولوا القضية للجان المسؤولة أنقر ماحولوها .. أتصلوا بالاتحاد المصري وهددوهو بعدم مشاركته مع المنتخب .. وبسذاجة لايقع فيها إتحاد مبتديء نفذوا الأوامر وخاطبوا الاتحاد المصري ولما الخطاب وصل نحن في السودان سمعنا ضحكة المصريين ومافي داعي نقول الباقي لأنه مهما كان برضو إسمو إتحادنا السوداني لكرة القدم .. وبعد مابقينا مسخرة في التواضع الإداري .. الوالي ماسكت هو طبعا مابعرف حاجة لكن برضو بعرف أي حاجة قاموا حولوهو للجنة الإنضباط ليه؟ قالوا أساء للكرة السودانية والمسؤولين السودانيين .. طيب ماهو بسيء من زمان الجديد شنو؟ قالوا المهم حولناهو .. الاتحاد مسكين وقراروا عند جمال الوالي بعد ما الحضري انتصر على الوالي الضعيف جدا في مواجهته وافق الأخير على انتقاله للاتحاد السكندري حسب رغبته وبملاليم مقارنة مع القروش المدفوعة لانتقاله بمافيها قروش غرامة النادي الأهلي المصري.. أنقر الحضري ماجاء السودان عادي وزار الاتحاد عادي وقابل المسؤولين بالترحاب عادي وسافر بعد ماكمل الاتفاق.. ولا انضابط حاكموا ولالجنة قابلتو ولايحزنون .. الوالي عايز كده في زول يقدر يقول لا .. هسي الوالي عايزوا يرجع لانه مزاج الحضري حكم بكده ومزاج الحضري لما يقول الوالي ينفذ في نص الموسم في ربع الموسم في فترة انتقالات في فترة مباريات لازم يرجع يرجع .. النشوف آخرتا زي ما بقول أستاذنا سعد الدين إبراهيم.