ضع علامة «صاح» أمام رقم الإجابة الصحيحة: وصف الصادق المهدي خصومه في الحزب ب «البعاعيت» وقال إن «الوطني» يمشي مقابر حزب الأمة للتحدث مع الموتى عن حال الحزب وهم موتى وقاعدين في بيوتهم وما شغالين ولا متحركين، تفتكرو الصادق دا بطاعن بالكلام دا في منو: «أ» في ظني هو قاصد بكري عديل بسبب هجومو على الصادق في الحوار الأخير ولأن الصادق بفتكر إنو ناس الوطني هم وراء فكرة الحوار، وبعتبر عديل ميت موت سريري ... معقولة بس يا الإمام « » «ب» لالا الإمام دايقصد الدكتور مادبو لأنو اليومين ديل خاشي معاهو في مشروع تصعيد جديد للخلاف القديم « » «ج» أنا في رأيي الإمام دا بقى قاعد علي الهبشة وما بتحمَّل اي حاجة، وبيني وبينك كدي الجماعة ديل جابو كثافتو خلوه زي العجوز المات راجلها « » «د» معليش ياجماعة شوية خرف كدي علي خفيف « » «2» أبو قناية قال وضع إيدو على «5» ملفات فساد، تفتكر التعليق المناسب لي للجدعة بتاعتو دي شنو: «أ» خمسة بس يا أبوقناية، هسع عليك الله تسوط تلاتة شهور وتجي تقول لينا وضعت يدي على خمسة ملفات بس، ياخي الفاتح براهو وآلية ماعندو خمش «65» ملف فساد، وبعد ده الناس قالت شوية وحرمانات ما إدُخْلن عليا « ». «ب» قول خمسة الف الله يهديك ، لأنو لو طلعت في الشارع دا بشوف أطنان « ». «ج» الخمسة دي مضروبة في كم « ». «د» خمسة ليه اصلك شغال بالتقسيمة « ». 3 - التغييرات الأخيرة طالت قطبي رغم إنو من أصلب عناصر الوطني وخلتو خارج الشبكة خالص، ترى ما هو السبب الخلاهم إجدعوهو الجدعة دي: قطبي دا الجماعة ديل حفرو ليهو عديل كدي، يعني زي ما تقول زي حكاية قوش حتى إنو قالو تفاجأ واستغرب واحتجَ لكن بدون فايدة « ». «ب» والله بس عين وأصابتو، ماعندو حل غير احتسب بس لأن الشغلانية في النهاية ابتلاءات « ». «ج» تغييرات عادية جدًا جدًا جدًا، الحكومة قالت كدي، هو نحن «هنعرف» أكتر من الحكومة « ». إهداءات خاصة من الشيخ الترابي للشيخ يسن عمر الإمام تظلمني والأيام قد تنصف الإنسان تشاهد المحبوب عفوا عيان وبيان ما كنتا تظلم من قلبو بيك ولهان تتركني للماضي مع انو في الإمكان تجدد الذكرى وتنسى كل الكان من يسن عمر الإمام للترابي أنا يا حبيب غرامي تركتو للأيام تركتا حب ودموع تركتا شوق وهيام عودتا نفسي إذا ما اشتدت الآلام أصبر على الحرمان وأضحي بالأحلام جنات هواي العذري ندية كالأنسام تخلي نار الشوق بردا علي وسلام تعريفات عصرية جداً: العدالة هي: أن تعدِل اللوائح والقوانين بما يتلاءم مع متطلبات «الهبر» المناحة هي: أن تمنح خصومك وزارات هامشية في حكومة عريضة الطلاقة هي: أن تطلق يد تجار الحكومة في ميدان المضاربات الدولارية البلاغة هي: أن تبلِغ أبو قناية بكل الحكاية الوجاهة هي: أن توجه بإغلاق صحيفة أخرى الشجاعة هي: أن تشجع الهلال من داخل صحيفة «السوداني»