سودارس : اغرب ما كان في البيت الابيض أن جورج (بوش) نايبه (ديك) تشيني

دورات تعريفية بالمنصات الرقمية في مجال الصحة بكسلا د. الشفيع خضر سعيد يكتب: الدور العربي في وقف حرب السودان السودان.."الشبكة المتخصّصة" في قبضة السلطات مقتل 68 مهاجرا أفريقيا وفقدان العشرات إثر غرق قارب ريال مدريد لفينيسيوس: سنتخلى عنك مثل راموس.. والبرازيلي يرضخ نقل طلاب الشهادة السودانية إلى ولاية الجزيرة يثير استنكار الأهالي السودان..إحباط محاولة خطيرة والقبض على 3 متهمين توّترات في إثيوبيا..ماذا يحدث؟ اللواء الركن (م(أسامة محمد أحمد عبد السلام يكتب: موته وحياته سواء فلا تنشغلوا (بالتوافه) مسؤول سوداني يردّ على"شائعة" بشأن اتّفاقية سعودية دبابيس ودالشريف منتخبنا المدرسي في مواجهة نظيره اليوغندي من أجل البرونزية بعثة منتخبنا تشيد بالأشقاء الجزائرين هل محمد خير جدل التعين واحقاد الطامعين!! دقلو أبو بريص أكثر من 80 "مرتزقا" كولومبيا قاتلوا مع مليشيا الدعم السريع خلال هجومها على الفاشر شاهد بالفيديو.. بلة جابر: (ضحيتي بنفسي في ود مدني وتعرضت للإنذار من أجل المحترف الضجة وارغو والرئيس جمال الوالي) اتحاد جدة يحسم قضية التعاقد مع فينيسيوس حملة في السودان على تجار العملة إعلان خارطة الموسم الرياضي في السودان غنوا للصحافة… وانصتوا لندائها توضيح من نادي المريخ حرام شرعًا.. حملة ضد جبّادات الكهرباء في كسلا تحديث جديد من أبل لهواتف iPhone يتضمن 29 إصلاحاً أمنياً شاهد بالفيديو.. بأزياء مثيرة وعلى أنغام "ولا يا ولا".. الفنانة عشة الجبل تظهر حافية القدمين في "كليب" جديد من شاطئ البحر وساخرون: (جواهر برو ماكس) امرأة على رأس قيادة بنك الخرطوم..!! وحدة الانقاذ البري بالدفاع المدني تنجح في إنتشال طفل حديث الولادة من داخل مرحاض في بالإسكان الثورة 75 بولاية الخرطوم المصرف المركزي في الإمارات يلغي ترخيص "النهدي للصرافة" الخرطوم تحت رحمة السلاح.. فوضى أمنية تهدد حياة المدنيين أول أزمة بين ريال مدريد ورابطة الدوري الإسباني "الحبيبة الافتراضية".. دراسة تكشف مخاطر اعتماد المراهقين على الذكاء الاصطناعي أنقذ المئات.. تفاصيل "الوفاة البطولية" لضحية حفل محمد رمضان بزشكيان يحذِّر من أزمة مياه وشيكة في إيران لجنة أمن ولاية الخرطوم تقرر حصر وتصنيف المضبوطات تمهيداً لإعادتها لأصحابها انتظام النوم أهم من عدد ساعاته.. دراسة تكشف المخاطر خبر صادم في أمدرمان اقتسام السلطة واحتساب الشعب شاهد بالصورة والفيديو.. ماذا قالت السلطانة هدى عربي عن "الدولة"؟ شاهد بالصورة والفيديو.. الفنان والممثل أحمد الجقر "يعوس" القراصة ويجهز "الملوحة" ببورتسودان وساخرون: (موهبة جديدة تضاف لقائمة مواهبك الغير موجودة) شاهد بالفيديو.. منها صور زواجه وأخرى مع رئيس أركان الجيش.. العثور على إلبوم صور تذكارية لقائد الدعم السريع "حميدتي" داخل منزله بالخرطوم إلى بُرمة المهدية ودقلو التيجانية وابراهيم الختمية رحيل "رجل الظلّ" في الدراما المصرية... لطفي لبيب يودّع مسرح الحياة زيادة راس المال الاسمي لبنك امدرمان الوطني الي 50 مليار جنيه سوداني وفاة 18 مهاجرًا وفقدان 50 بعد غرق قارب شرق ليبيا احتجاجات لمرضى الكٌلى ببورتسودان السيسي لترامب: ضع كل جهدك لإنهاء حرب غزة تقرير يسلّط الضوء على تفاصيل جديدة بشأن حظر واتساب في السودان استعانت بصورة حسناء مغربية وأدعت أنها قبطية أمدرمانية.. "منيرة مجدي" قصة فتاة سودانية خدعت نشطاء بارزين وعدد كبير من الشباب ووجدت دعم غير مسبوق ونالت شهرة واسعة مقتل شاب ب 4 رصاصات على يد فرد من الجيش بالدويم دقة ضوابط استخراج أو تجديد رخصة القيادة مفخرة لكل سوداني أفريقيا ومحلها في خارطة الأمن السيبراني العالمي الشمالية ونهر النيل أوضاع إنسانية مقلقة.. جرائم وقطوعات كهرباء وطرد نازحين السودان.. مجمّع الفقه الإسلامي ينعي"العلامة" ترامب: "كوكاكولا" وافقت .. منذ اليوم سيصنعون مشروبهم حسب "وصفتي" ! بتوجيه من وزير الدفاع.. فريق طبي سعودي يجري عملية دقيقة لطفلة سودانية نمط حياة يقلل من خطر الوفاة المبكرة بنسبة 40% عَودة شريف لماذا نستغفر 3 مرات بعد التسليم من الصلاة .. احرص عليه باستمرار

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

اغرب ما كان في البيت الابيض أن جورج (بوش) نايبه (ديك) تشيني

محمد عبد الماجد نشر في النيلين يوم 28 - 10 - 2013

عبر (وان طال السفر) في هذه المساحة إن شاءالله سوف نقوم بتلفزة خاصة (شفاهية) لمباريات الدوري الاسباني وسوف ننقل (تلفزيونياً) بعض المباريات العالمية ..دون أن نمس الحقوق الحصرية لقناة الجزيرة.
أي زول ما عندو كرت الجزيرة ما مشكلة.
ح تشوفوا المباراة هنا.
شفتوا كيف؟.
عشان ما تقعدوا تتغالطوا لينا زي (القرع).
اول (القرع) بيغالط ؟.
ما عارف ..ما تسألوني ..(يتهيأ لي كدا القرع دا أي حاجة ممكن يعملها).
يغالط ..يشاكل ...ويطلع الشارع كمان.
ح اقعد (اتخيّل) ليكم كدا خيال ساكت ...لمن تصدقوا...(البعرف بعرف ..والما بعرف كمان بي طريقتو).
التلفزة سوف تكون (حصرية)..وح نبدأ بأشهر كلاسيكيات العالم في كورة القدم.
ح ننقل ليكم مباراة برشلونة وريال مدريد في الليغا الاسباني ..يعني يا جماعة ح نطلع ليكم من مباريات الامل عطبرة والنيل الحصاحيصا.
ناس النسور ديل ..تاني إلا في الجمع والعطلات الرسمية.
شفتوا (النقلة) دي كيف؟.
بله جابر ..وموسى الزومة إلا في (هوامش) تاني.
أي واحد عاوز يشاهد المباراة دي من خلال هذه المساحة ..لابد من أن يكون عنده (كرت) السفر.
سفر عديل.
ما عاوز اقول ليكم كرت (الجزيرة).
كرت السفر ...يعني كرت (وان طال السفر).
الاولو شرط ...اخرو نور ....ومهند كمان.
عشان ما نكون ظلمنا (مهند).
مهند ..وبشه.
من البداية نكون واضحين.
اها اليوم داك ...يوم المباراة ...طلعنا من البيت بدري ...وقلنا ماشيين (الكامب نو).
اندرعنا لينا في (جلاليب) تقول ماشين عقد.
اتذكر اليوم داك ..شربنا شاي الصباح بالزلابية ..الظروف ما معروفة في (اسبانيا)..والاكل هناك ذاتو (مشكوك في شرعيتو)..عشان كدا قلنا نتقّل من البيت ..ونمشي جاهزين.
نحن في السفر (شفوت)..ما بنتمقلب.
طلعنا من (دغش) بدري..لاقنا ليك عمك (بخيت ود الطوبة) ...واقف في رأس الشارع..قال لينا الليلة من صباح الرحمان دا ماشيين وين؟.
كتلتو منو؟.
والله انتوا ما بتطلعوا (بدري) كدا من فراغ ...اكيد كتلتوا ليكم زول.
قلنا ليه يا حاج بخيت ..ماشين كورة برشلونة وريال مدريد.
قال لينا دي وين؟..في ميدان عقرب.
قلنا ليه ميدان عقرب شنو؟..دي في (الكامب نو).
والكامب نو وين لي برج الفاتح؟.
برج فاتح شنو يا حاج..دي في (برشلونة).
وبرشلونة دي برة (ام درمان) ؟.
ام درمان شنو يا ناس ؟...الزول دا يفهموه كيف؟.
يا حاج بخيت ..الكورة دي في (اسبانيا).
اسبانيا دي بره ولاية الخرطوم يعني؟.
ولاية الخرطوم شنو؟..دي في (اوروبا)...اوروربا الما هنا يا حاج.
اوروبا دي بره السودان؟.
يا جماعة دا يفهموه كيف؟...انت مالك عاوز تعطلني...(يا ريت لو اختصرنا الموضوع وقلنا ليه المباراة في ميدان عقرب ...بدل التعب دا).
كان ارتحنا في (عضمنا) دا.
لو عارفين الجرجرة دي كنا اختصرنا الموضوع.
يا حاج خلاص (الكامب نو) دا ...شرق موقف جبرة القديم...جوار البنك.
الجماعة ديل جابوا (الكامب نو) في موقف جبرة القديم ...ديل عاوزين يودونا وين؟.
طيب يا حاج بخيت وقت انت (فاهم) الحكاية دي ..مالك عامل لينا فيها من صباح الرحمن رايح.
اتخارجنا من عمك (بخيت ود الطوبة) ...قابلتنا في محطة المواصلات الحاجة (شفيعة بنت البستلة).
حاولنا ...نطارشها ..ونعمل فيها ما شايفين الحاجة شفيعة بنت السبتلة ...(نحن عارفين كلامها كتير ، لو لمت فينا ح تشبكنا ليك نضمي).
يمين بعد رفع الدعم من المحروقات لو فتحت ليها موضوع ..ما بتقفلو.
لكن الحاجة شفيعة بنت السبتلة شافتنا ...جات علينا ..وقالت لينا الليلة من الصباح كدا ماشين وين؟.
مرقتكم دي ما ساي.
قلنا ليها ماشين (الكامب نو).
والكامب نو فيها شنو؟..فراخ جمعية ...ولاّ بوزعوا فيه (بطانيات) سقط.
كنا عاوزين نشرح ليها الحكاية ...لكن صاحبي ..قال لي لو قلنا ليها الحكاية ما ح تفكنا ..اختصرها بس.
قول ليها أي حاجة.
قلت ليها (الكامب نو) دي فيه تطعيّم ضد السحائي.
والسحائي البجيبو شنو في الشتاء؟.
قالوا يا حاجة في سحائي (شتوي) ظهر حديثاً.
طيب ما تسقوني معاكم ، اطعم.
نسوقك وين يا حاجة ؟..التطعيم قالوا إلا بي كرت الجزيرة ...وانت ما عندك كرت.
كمان دي عملوا ليها (كرت).
يا جماعة الحاجة دي نتخارج منها كيف؟.
عشان نتخارج سريع ...شفنا لينا (ركشة)..وقلنا لي بتاع الركشة ...خارجنا من هنا عليك الله.
بتاع الركشة ..قال لينا انتوا ماشين وين؟.
قلنا ليه ماشين (سانت مارتي).
بتاع الركشة طوالي وقف ..وقال لينا (سانت مارتي) دي وين؟.
في شارع الستين ..ولاّ عبيد ختم؟.
قلنا ليه (سانت مارتي) دي حي في برشلونة.
يعني ماشين وين؟.
ماشين (سانت مارتي) ..قلنا ليك.
لا انا اوديكم وين بالركشة دي؟.
(سانت مارتي).
عليكم الله انزلوا لي من الركشة دي ..انا ما فاضي للحاجات دي ...نحن ناس المرور (الكوبري) ما بخلوني نقطعو ..عاوزني اوديكم (سانت مارتي)..انتوا بتستهبلوا ..انزلوا عليكم الله ..مشواركم دا عاوز ليه (امجاد).
وقفنا لينا (امجاد).
نعم يا شباب ..على وين إن شاءالله؟.
على (سانت مارتي).
سانت مارتي دي حاجة غير (الهوت دوق).
هوت دوق شنو؟..سانت مارتي دي في برشلونة.
بتاع امجاد وقف..وقال لينا اركبوا ليكم (دفار)..امجادي دي والله (لساتكها) كعبة ..الحلة الجديدة ما بقدر اصلها.
نظرنا للساعة ..لقينا الوقت راح ..والمباراة قربت..صاحبي قال لي الموضوع دا إلا قطر.
لكن قطر بوصلنا.
قطر ح تنظم (كأس العالم)..ما توصلنا ..انت يا زول بتتكلم كيف؟.
نهاية الكلام ..من ركشة لي امجاد ..لي قطر ..لي شوية (طيارة) كدا ..لقينا نفسنا في برشلونة في (سانت مارتي).
الموضوع (خيال) ما تشددوا في الطريقة التى وصلنا بيها برشلونة.
الزول المعاي قال لي قبل ما ندخل المباراة ..نشوف لينا (بوش) ولاّ سندوتش طعمية ..المباراة دي ما معروفة...والاكل في الاستاد قالوا ممنوع.
احسن نأكل بره.
مشينا على بقالة في (سانت مارتي)...قدرة الفول (موقية) بره الدكان.
قلنا لبتاع الدكان الاسباني عازين لينا موية فول.
زولكم ما فهمنا.
افتكرنا قلنا حاجة تانية ..الاسبان بفتكروا موية الفول (زيت غيار).
فاكرنو حاجة بعملوها للعربات.
دا يفهموه كيف؟.
بوش ...اش بوش يعني ..بوووووش ..كسر فول عليه زخبات جبنة ...(الكلام دا بي الاسباني).
زولكم جاب لينا (بوش) الرئيس الامريكي السابق.
الزول دا نفهمو كيف؟.
ساعة ونص ..نحن بنشرح لبتاع الدكان في (البوش)..قلنا ليه هو عبارة عن (كبرتيك) الفول زايد (فلوريد) الجبنة مع يوناتيد الشمارات مع شوية توم وبصل كدا ورغيف...والله الجنبك ما بتديهو.
ما تقعد تعاين لينا كدا ..زي (كروت الشحن).
أول كروت الشحن بتعاين؟.
والله كروت الشحن دي ..في البلد دي ..تعمل أي حاجة.
كان بقت على (المعاينة) هينة.
بتاع الدكان افتكر (الوصفة) دي عملية ارهابية ..طبعاً في برشلونة ما عندهم (بوش).
هو ناس ما عندهم (فول) ..ح يكون عندهم (موية) فول.
اذا كان الاصل مافي ...هل يمكن أن نجد الفرع؟.
المهم عشان ما اطول عليكم ...في النهاية وصلنا لينا إلى اكلة في مجملها كدا ممكن تقول عنها (بوش).
بوش أو على الاقل كدا (ديك تشيني).
ديك تشيني دا يا جماعة ما (ديك) ، ما فرخة (ما تقلعوا لي عيونكم ساكت)..ديك تشيني دا كان نائب الرئيس الامريكي جورج دبليو بوش.
شفتوا النظام دا كيف؟.
عشان بس تعرفوا ..نحن ما بنتكلم ساكت.
شفنا لينا ركشة من البقالة ..وقلنا ليه على (الكامب نو).
قال لينا الكامب نو بي (70) جنيه.
ليه يا اخوى ..نحن عاوزين نشترى منك الركشة ...نحن ما عاوزين الركشة ..نحن عاوزين نمشي الاستاد.
قلنا يمكن ما فهمنا.
قال لينا 70 جنيه ..يعني 70 جنيه.
يا ود الناس 70 جنيه في شنو؟.
بتاع الركشة قال لينا رفعوا الدعم من المحروقات.
وانت مالك ومال رفع الدعم من المحروقات ...الكلام دا في السودان..انتوا الدخلكم بيه شنو يا الاسبان.
بتاع الركشة قال لينا بالاسباني ...الحكاية دي بتنعكس على كل الاشياء.
قلنا خلاص ندفع ...المباراة قربت.
وصلنا الاستاد ..لقينا ليك الصفوف دي مرصرصة حول الاستاد زي (الكعك).
قلنا دا شنو السودان دا.
نحن خلينا السودان عشان الصفوف دي.
وقفنا في الصف.
عملنا لينا (41) شكلة في الصف.
في واحد اسباني ..قال لينا شكلكم كدا ..انتوا جايين من كورة الهلال والنسور.
نكرنا ليك النسور باطن وظاهر.
نسور شنو كمان؟.
لو جبنا سيرة النسور برجعونا في اول طيارة.
قلنا اخير نسكت.
والعجب لو قلنا ليهم بنعرف (بله جابر).
كانوا قالوا لينا ما تخربوا لينا كورتنا دي.
اتخيل نفسك بتعاين لي كورة بله جابر وضفر...وتجي فجأة كدا تعاين لي كورة انيستا ونيمار وميسي ورنالدو.
كورة ناس بله جابر ديل طوالي بتعمل تسمم.
بتعمل حول في المصارين.
ناس ضفر ديل ..كورتهم ما كورة قدم.
ممكن تقول سلة.
ممكن تقول بلي.
ممكن شليل.
ما في كورة قدم كدا.
نحن مشينا الكامب نو ..عشان نغسل عيونا.
عشان نشوف لينا كورة ممتعة.
عاوزين نطلع من الدافوري حقنا دا.
العدس ...والبامية المفروكة دي لمن تبدلها بي فراخ وسمك ..بتعرف الفرق.
دخلنا الاستاد..قبل (45) دقيقة من بداية المباراة.
ما حدث في تلك الدقائق ..وما حدث اثناء المباراة وبعدها سوف (نتلفزها) ليكم في الغد إن شاءالله.
هسع عاوزين نتابع مبارة شيلسي وستي.
شيلسي جاب قون.
فوتونا الهدف.
بكرة إن شاءالله نواصل في التلفزة ونشوف الحصل شنو؟.
بس إن شاءالله (الشارة) ما تطير.
ملحوظة : بكرة بدروا يا شباب.
هوامش
الهلال يلعب غدًا مباراة صعبة امام الاهلي مدنى.
الهلال يحتاج للنقاط الثلاث.
لا بد من وجود كاريكا وبكري المدينة ومحمد عبدالرحمن وسيدي بيه في تشكيلة واحدة ...ومن بداية المباراة اذا اراد الهلال الانتصار.
يا صلاح ما تمشي تلعب لينا للتعادل.
لو اتعادلت لينا بنلحقك صلاح ادريس في المريخ.
ما عاوزين أي تعادل.
اتعادلت لينا مع الاهلي عطبرة ..والله يستر من الاهلي مدنى.
الهلال خسر في شندي ..واتعادل في عطبرة امام الامل والاهلي وفاز في الفاشر وكادوقلي ..وفي مدني عاوزنو يتعادل ويفوز.
اتعادلنا مع الاتحاد ...ولا بد من الانتصار على الاهلي.
والي مدني عمل حركات والي المريخ ..قام حفز اندية مدني.
ليه التحفيز كان في هذا التوقيت.
يعني انتصروا على الهلال.
على العموم الهلال يلعب مباراة صعبة امام الاهلي مدني.
لا تقبل الاستهتار ..ولا اضاعة الفرص.
فريق الاهلي مدني يمتلك تشكيلة جيدة ..وبلعبوا كورة صاح.
انتظروا في مدني الممتاز سوف يكون من نصيب الهلال إن شاء الله.
لا بد من سيدي بيه من بداية المباراة.
والامل في بشه ونزار الصاقعة.
محمد كوكو لاعب الاهلي عطبرة ..يستحق اللعب في الهلال.
التسجيلات ما تهملوها.
التحركات لا بد أن تكون من بدري.
احسموا هذه المواضيع مبكرًا.
صلاح ادريس لو مشى المريخ قالوا ح يحوّل بله جابر من الطرف اليمين إلى الشمال.
وح يقدم (ضفر) للهجوم.
وباسكال برجع دفاعو.
باسكال في الوسط زي الزول القاعد في مظلة المواصلات.
يا احمد الحاج ..خلاص خلينا نشوف شيلسي وسيتي.
الكورة الان تعادل.
ومورينهو تقول صلاح محمد آدم.
......
عاجل : صلاح ادريس ح يطعن في انتخابات المريخ...(بقى من أهل الدار).
وإن طال السفر - محمد عبد الماجد
صحيفة قوون

انقر هنا لقراءة الخبر من مصدره.