إعلامنا المرئي.. يصر دائما أن يجسد ثالوث الشر (الفقر – الجهل – المرض).. ويحدث العالم كلو.. إنو نحن فقرانين.. وجهلة.. ومرضانين.. ومافينا فايدة تب.. يمرقو على السهلة.. يصورو في الشوارع.. الناس الفقر باين على هدومها.. على أكلها.. على ملبسها.. على مركبها.. كارو.. وجاريها حمار والحمار يا الله ويا أمين جاري الكارو وهي فاضيه.. والضبان يتبادل فيهم مرة فوق ضنب الحمار ومرة يطير يرك فوق نخرة سيد الكارو.. الغريبة مافيهم ولا واحد بيهش الضبان.. سيد الكارو من الفتر ما قادر يرفع ايدو يهش الضبان.. كل البي يسويهو يرفع شلوفتو الفوقانية فوق وبطرف الشنب يهش الضبانة.. ولو الضبانة النوع الثقيل ولايوق تمشي وتجي في النهاية يخليها لي الله بس.. والحمار الضنب ما قادر يهزو من الفتر والتعب.. أو اتنين من الشماشة باركين في الواطا ويتلاوا في دلقان معطون بسليسيون.. أو يعملو تحقيق في موقف مواصلات ويجيبو واحدة مالية وشيها كريمات لمن دفق.. وواقفة في الشمش الحارة.. وبي خلفية ثقافية للفلهمة العورا تقيف قدام الكميرا". ياااااااي.. مواصلات زي الزفت.. صراحة كدا.. تو مطش.. تو مطش.. حاجة فزيعة.. وبعدين يعني الاولاد ما يشوفو واحدة حلوة الا يشاغلوها.. يااااااااي فزيعين.. متخلفين.. يعني الواحد لازم يكورك.. ما يجي براحة ويشيل رقم الموبايل.. ".. وواحد يكون واقف لابس عراقي وسروال وسديري.. ومحكر الطاقية فوق حواجبيهو.. وينضم "أنا اللخو سعد الله عوض الكريم.. اهدي للنزير وعباس وعوض الكريم ود عمي سعد الله بي قبقبة.. أنا جايي من الضهب.. ما من ناس البلد دي.. جايي البلد دي كايس لي مرا اسعاها.. وأسوقها.. ونمشي هَنَااااااك.. البلد وتقعد مع امي ".. ثم يبتسم ويتلفت علي ذات الكريمات ثم يتابع " بنوت البلد عندنا مستخلفات.. ما فنجريات زي بنوت الخرتوم" يخلو المستخلف دا مع الفنجرية ام كريمات.. يلملمو كميراتهم ويرجعو الاستوديهات.. وتشتغل برامج.. صحة.. دكاترة قاعدين والتلفونات تتخابت.. ان نضمو في السرطان.كل الناس تشتكي.. إن نضمو في السكري.. تحلف تقول السودان كلو سكري.. إن نضمو في الدغت.. برضو.. الولادة ومشاكلها.. لو سمعتهم تقول البلد دي مافيها مرا بي تلد.. يعني مافي مرض جابو سيرتو.. تلقى التلفونات من بداية البرنامج لي نهايتو.. انتهو من الدكاترة بعدو مباشرة ناس الأعشاب.. والحلبة وعشبة بن علي.. ولبن العُشر.. ثم ناس الحجامة والفصادة.. والكي بالمنجل والمرواد.. بعدهم برنامج.. العلاج بالقرآن.. ويختموهو لينا.. ببرنامج اجتماعي.. من قولت السلام عليكم.. طلاق في طلاق.. لحدي مع السلامة.. زول حلف طلاق علي المرا ما تسوي شي كاجرتو وسوتها.. وقعدو في الجرسة.. زول مطلق وبيسأل.. او.. زول ناوي يطلق.. "ألو.. يا شيخنا.. لو قلت للمرا.. لو مشيتي حتة معينة انتي طلاقنة.. والمرا قامت مشت.. أها الطلاق واقع؟" "ايوا.. طبعا لو ما سمعت نضمك.. ومشت واقع.. عاد نسوي كيفن؟.. علا انتو ما تتفاهمو براحة بلا حليفة.. انتو متزوجين ليكم كم؟" "نحن عرِسنا يوم الخميس الجاي إن شاء الله".. الباب البجيب الريح- صحيفة اليوم التالي