النضم في أكل القعونجات.. والحمير المضبوحة.. والكلاب النضم فيها نارو ما بردت.. يوم الجمعة الساعة العاشرة مساء برنامج في قناة الخرطوم الفضائية عن "شعيب صائد التماسيح".. جابو شعيب في منطقة من مناطق السودان ونحن مبارينو.. ومقدم البرنامج بصوت جهور يشيل ويشكر في شعيب وهو في رحلة صيد للتماسيح.. ويشكر في مهنتو.. ثم بعد ان اصطاد شعيب كمية من التماسيح.. تنقلنا الكميرا الي مجموعة من الناس.. منتظرين شعيب وتماسيحو.. ثم.. يسلخ شعيب اكبر تمساح.. ويقسم لحمو علي الحضور كل زول شايل ماعونو.. وتنقلنا الكميرا الي ساج فيهو زيت.. وقطع لحم التمساح تنطط فيهو.. وناس متحلقة منتظرين اللحم ينجض وياكلوهو.. ومقدم البرنامج يشيل ويشكر في لحم التمساح انه لذيذ وشهي وطعمو زي لحم السمك.. في نفس الوقت وقبال يومين.. قرأت تصريح للسيد معتمد الخرتوم.. يقول فيهو "أي زول يضبح حمار حقو يعدمهو".. وذلك تعبيرا عن غضبه وفداحة جرم ضبح الحمير وبيع لحمها للناس.. مما جعلني احزن اشد الحزن علي المسكين المضطهد الحمار.. دايرين يعدمو الزول البيضبحو.. بينما تحتفي ولاية الخرتوم متمثلة في فضائيتها.. "تلك القناة التي ولدت باسنانها.. ودي جملة بجيبوها طوالي بمناسبة افتتاحها.. وبعدها طوالي شبكونا بشعيب صائد التماسيح.. واكل الناس لي لحم التمساح.. يتلفتو جاي وجاي ما يلقو مادة يشغلو لينا الفيديو.. مما يجعلني اتيقن أنها فعلا مولودة بأسنانها.. ويمكن كمان عندها ضنب".. تحتفي الولاية متمثلة في قناتها باكل لحوم التمساح.. بينما معتمد الخرتوم يتوعد ضباحين الحمير بالإعدام! سعادة المعتمد بصراااااحة موضوعك مستحمي.. والحمموهو ليك ناس قناة الخرطوم.. حمموهو وخلوهو يجلبغ مع تماسيح شعيب.. حقااااااارة باينة بينونة كبرى بالحمار.. الحمار لا بياكل غنماية ولا بياكل بقرة.. ولا بياكل زول.. وفيهم حمير طيبة لا بتعاكس ولا بتكاجر.. عكس التمساح.. ما بيفرز اي حاجة فيها لحم يتلافها ويبلعها جب وجب.. وناس القناة يحتفو ويحتفلو باكل لحمو.. .وانت داير تعدم الزول البيضبح حمار؟.. حتى لو بيضبحو علي الطريقة الاسلامية.. لكن يا سعادتك انتو المسعولين ديل وقت تقولو نضم ما قاعدين تتشاورو؟.. وما قاعدين تتفقو علينا؟.. والله انا خايف ناس القناة ديل يكونو ما سمعوك قلت كدي.. ودي تبقى نصيبة.. وإن سمعوك تبقى نصيبتكم كلكم يتلاقو فيها.. انت قلت لحم الحمير كعب و داير تعدم البيضبح حمار وهم يشكرو في اكل لحم التمساح.. غايتو شي يحير والله! حسي نسمع نضم منو فيكم؟.. واللا نخلي ليكم اللكل دا كلوكلو؟.. لكن عشمي كبير في هئية كبار العلماء تطلع لينا "منيو".. بي البناكلو شنو؟ والما ناكلو شنو؟.لانو الظروف ما معروفة.. والحياة ماشة عااااااااصرة!! نصيحة من مواطن هدي ورضي.. إن قلتو لو اكل حمير بياكل وإن قلتو لو أكل تماسيح بياكل.. إن دايرين تسو فينا معروف.. عليكم الله قنواتنا البتشف من بعض وما عندها طعم دي.. لموها لينا كلها في قناة واحدة وريحونا من مساككتها.. انتو ما دايرين اللجر؟ الباب البجيب الريح- صحيفة اليوم التالي
