كثر الحديث في الآونة الأخيرة في عالم الكرة المحلية عن اللاعبين ( الكيشة ) وصار هناك تشبيه للاعب ( الكيشة ) بالماسورة، هذه الحلقة محاولة لربط الكورة باللاعب الماسورة . أنواع المواسير وأنواع اللاعبين: هنالك عدة أنواع من المواسير تستخدم في مجال مياه الشرب والصرف الصحي وتصنع بأقطار مختلفة ومواد مختلفة حسب الغرض منها وموضوع استعمالها كما أن لها اقطارا وأطوالا مختلفة مما يدعو احيانا لقطعها او ثنيها ووصلها. ولابد أن تتوفر في المواسير ثلاثة شروط وهي المتانة وطول فترة الاستعمال وقلة التكاليف ولو قارنا هذه الشروط باللاعبين، فلابد أن تتوفر في لاعب كرة القدم القوة والسعر المعقول لتسجيله ويلعب أكثر من موسم ويفضل أن يلعب في أكثر من خانة. والمواسير لابد من حماية سطحها الداخلي والخارجي حتى لا تتعرض للتآكل والرمي. اللاعب كذلك يجب على النادي حمايته والحفاظ على لياقته وإبعاده عن السهر (والصعلكة) حتى يكون جاهزا لأداء المباريات حتى لا يفقد (حرفته) وعشان كورته ما تفك منه ويشطبوه سريعا. أهم أنواع المواسير: 1) مواسير فخار وهي تصنع من الفخار الحجري القليل المسام. 2) مواسير الخرصانة العادية والمسلحة وتصنع من الأسمنت والخرسانة والرمل وهي أقل ثمنا ويمكن صنعها محليا. 3) مواسير الفايبر قلاس خفيفة الوزن عمرها الافتراضي كبير وتستخدم للمياه والصرف الصحي لكنها مرتفعة الثمن. 4) مواسير الزهرة تتميز بالعمر الطويل (في فرنسا خط مواسير مستعمل منذ عام 4161م اسعارها معقولة وسهلة التركيب). 5) المواسير الصلب وتصنع من ألواح الصلب سهلة الصنع لا تكسر يمكن التحكم في قطرها. 6) مواسير البلاستيك سهلة التركيب سهلة الصنع سهلة النقل. أنواع اللاعبين والمواسير: لاعبو الدفاع ديل زي مواسير الصلب ومواسير الاسبستس والمواسير الخرسانية يصعب اختراقها وتعديها. أما إذا كانوا من نوعية مواسير البلاستيك أو الفايبر قلاس فالعوض على الله حارس المرمى بس إلا يجيب من جوه لاعبو الوسط والهجوم مطلوب منهم المرونة عشان كدا تبعد عنهم صفة (الموسرة). محاولة لمعرفة لماذا شبه للاعب الكيشة بالماسورة: 1) الماسورة إما مصنوعة من حديد أو خرسانة أو صلب، إذن هي غير مرنة، وبالتالي اللاعب زي (عمود النبرو) ما يقدر يتحرك ولا يقدر يحاور كما ان محاورته سهلة. 2) الماسورة دائما تركب تحت الأرض أو على الحائط ويقوليك رموا المواسير أي ركبوها على الحيطة أو العرش عشان يوصلوا من داخلها أسلاك الكهرباء واللاعب لو كان في الأرض أو على الحيطة تبقى مشكلة. 3) اللاعب ذو العضلات الصلبة غير مرن ويمكن كسره بسهولة. 4) إذا كان اللاعب زي ماسورة البلاستيك أو الفخار معناه سعره رخيص والرخيص بي رخصته يضوقك مغصته. 5) المواسير قد تنفجر أحيانا فإذا كانت موية حلوة بتعمل طين وتبشتن الواطة وكان بقت صرف صحي بس اقفلوا (التخزين). 6) في مواسير مستوردة من ماركة (وارقو) سعرها عالي وأداؤها كباري أخير منها المواسير المصنوعة في (الزومة). 7) أشهر محطة بص هي محطة المواسير بالحارة الرابعة الثورة في نادي بقي زي الحارة الرابعة لاعبنو كلهم مواسير. 8) الحنفية يمكن أن يطلق عليها نفس الاسم (ماسورة) بس لو اتحلجت حتكون الموية كابة على طول لو غيروا ليها الجلدة يمكن تتصلح لكن دائما الناس يلجأون لتغييرها، اللاعب البتحلج مصيره الشطب (ماسورة ومحلوجة كمان). هدايا الحلقة: 1) في واحد قال لو قال لي بت عيونك دوختني دي ما قلت ادب دا يبقى نقص في الجلكوز!. ولو قال ليها: شوفوا القمر طالع مع الصباح دا يبقى خيال علمي!. ولو قال: عيونك عيون غزلان "دا عالم حيوان"! ولو البت ردت عليه حريقة تحرقك يبقى دا تشجيع للشجاعة والإطفاء!. ولو قالت ليه أنت حيوان أصلاً - دى حقيقة علمية ولو قالت ليه ما عندك أهل تشجيع لصلة الرحم!. 2) بخيل سمعو ضعيف أولاده رسله ليه رسالة في الموبايل كاتبين ليه بابا عايزين فلوس رد عليهم ها..!. 3) دكتور عيون فتح بطيخة لقاها حمراء كتب ليها قطرة!. 4) سيد الدكان: ليه قروشك دي مبلولة؟ زوجة البخيل: لأن راجلي بكى عليها قبل ما يديني ليها!. 5) بمناسبة الامتحانات: عزيزتي الآم إن الدعاء لابنك وهو ماشي للامتحان: امشي يا ولدي ربنا يديك قدر تعبك قد يكون سبباً في ضياع مستقبله، وشكراً!. 6) واحد زهجان من مرته النقناقة بنى بيته في شكل دائري عشان مرته ما تقول ليه حابسني بين أربعة حيطان. 7) واحد زعلان من مرته كب في نفسه جاز وولع نار وراح حاضنها. 8) واحد مشى مع زوجته محل احذية قال للبائع جيب ليها شبشب زحاف قالت ليه لا أنا عايزة جزمة كعب عالي (ابو مسمار) البائع قال ليه يا اخي اشتري ليها كعب عالي هو انت الحتلبس قال ليه وانت مالك هو انت الحتنضرب؟! 9) واحد ثقيل مشى زار شيخ مريض وقعد معاه مدة طويلة وقال للشيخ انصحني، قال له اذا زرت مريضا فلا تمكث معه طويلا. 10) واحد كسلان قالوا ليه بعد ما تصحى من النوم بتعمل شنو قال ليهم برتاح شوية. 11) صرصور راقد في الانعاش اخوه سأله: - بف باف؟ - قال ليه : لا فردة شبشب. خاتمة: انا شخصيا ما مقتنع بتشبيه اللاعب بالماسورة لكن نعمل شنو لناس مزمل ابو القاسم (وحوووووصه) بتاعه وما عارفين الجاب المصطلح دا منو، اللاعب الكيشة يمكن يكون كبري يمرر الخصوم وإذا قون يكون غربال أو صفاية أو اشتر ودائما ببيضو ليه الكورة من تحت رجليه لكن ماسورة زي ما لافقة، واحد سأل الماسورة بنت منو؟ قال ليه بت نقط، هاك الشطب دا .. مع تحيات .. د. أحمد دولة
