[email protected] شجرة نيم ظليلة في طرف الحوش وعلى مقربة منها حاجة كلتوم ترمي ليها في طرقات كسرة استعدادا للفطور وصوت الباب الزنكي وهو ينفتح ثم تطرقعه عصاة بائع اللبن وهو يصيح : - سلام ناس البيت جيبو الماعون ؟ فتصيح له حاجة كلتوم: - خبارك الليله اتاخرت ؟ الساعة تمانية ، وماهي عادتك ، ولو ماعندنا عقاب لبن ما كان شربنا الشاي الصباح ده !! فيرد عليها بائع اللبن من خلف الباب : - يا حاجة الدنيا وش عيد ، والاولاد الشغاليين معاي كلهم سافروا أهلم . صحت انا من على العنقريب مكان ما كنت مستلقيا على قفاي اطالع ورق النيم الاخضر وهو يتراقص امام هبات الهواء : - يا عمر اللبان في الباب ، وماتنسى تشتري لناس عمك مختار فيمرق اخوي الصغير عمر منطلقا بماعونين الى الباب وتتعلق عيوني عند الحمامة الوقفة في ركن البيت هناك وهي تغني وكأنها ترحب بالصباح ثم المح حاجة كلتوم وهي تنثر قبضة ( فيتريته) للحمامة الزائرة .. وفي نفس الوقت ... كانت حبوبة فاطمة هناك في مكان ما في راكوبتها تعوس لها في ( سورج ) وقلبها معلق باختها التى غادرتها للحج ، كانت حبوبة فاطمة تعوس وهي تمدح ( شوقي للحبيب ) وخاطرها هناك عند اختها وتتخيل انها بالمدينة وبين كل حينة واخرى تسرق يدها لتمسح دمعة شوق انسدلت على خديها ثم تهز راسها كي تزيل عبرة الاشواق من حلقها ذاك الذي جففه دخان الحطب . أما في البانطون عند المشرع وعلى الضغة الاخرى للنيل كان ودحمد يعلق شنطته في كتفه ويقبض بالعشرة على الكرتونة التى جمع فيها حصاد سنته .. كان في الكرتونة تلاتة تياب واحد لحبوبته مريم ، وواحد لامه ، واخر لاخته التى فاتها قطار الزواج ، ولضيق ذات اليد اكتفي بطرحة كبيرة لكل من خلاته الثلاثة سعاد ، وفتحية ، ومدينة ولم ينسى ود حمد الحلاوة حيث خزن كيس حلاوة ( لبن ) لكل بيت كما انه لم ينسى ان يجمع كل احساسة عند جيبه الامامي حيث ربطة القروش والجنيهات القليله تلك التى يتمنى ان يسعد بها الاطفال يوم العيد الصباح .. كان ود حمد وهو في وسط البانطون وفي نص الذحام يحس بالتعب والدفء ويمخر باشواقه الحنينة كل مساحات الاشواق في اتجاه شط الأهل . أما فاروق ... فقد كان مشغولا يركب في الستاير في بيت الجيران وقد كانت يده توجعه كما ورقبته أيضا ولكنه يكتم ذلك ويتظاهر بالنشاط فهو يكن كثير من الاحترام لجاره حسن ..وقد كان يظن فاروق وهو صغير ان حسن هذا هو عمه اخ والده الشقيق لما كان يحسه من محبة بين الاثنين ومايراه من حسن من (عين حمراء) اذا ما اخطأ هو او تمرد يوما على والدته ... انتهى فاروق من تركيب الستاير فجاءته زوجة حسن بكيس صغير مدته له وهي تقول : - أمسك ياولدي دي شوية حاجات رسلها ولدى محمد من جده وقال تدوها لحبوبتك مسرة . قبض فاروق الكيس وهو يحاول ان يقبض بين جفنيه دمعة كادت ان تطفر فقد اشتاق لمحمد ود جاره حسن ... اشتاق اليه واشتاق لطفولته معه .. وتذكرعندما كانو يقضوا ليل السمر في خلوة المسجد كانو يحضروها مرة ويتمردوا عنها ثلاثة مرات .. وفي سوق المدينة كان التاجر حمدان يقفل في دكانه وفي باله يمر على امه قبل ما يمشى لاولاده فهو في نيته يديها قروش الخروف عشان لما يجبو ليها بائع الخرفان باكر الصباح تديهوا حقو وهو يجيها الصباح بدري بعائلته عشان يضبح ليها فيفطروا جميعا معا على ان تمشي معاه تاني يوم فيضحوا بخروفه هو ، ولكنه لما وصل امه وجدها حزينه وما زي عادتها فسألها : مالك يمه ؟ فقالت له :مافي عوجة ياولدي - كيفن مافي عوجة يمة انا مابعرفك ّ؟! - والله ياولدي جارتنا البي وارنا دي ظروفهم المرة دي ما حلوة وزي الما قدرو يشتروا خروف العيد - بس كده يا يمة نحن وهم واحد باكر بنشيل الخروف ونمشى كلنا نضبح عندهم ونفرح الاولاد الضغار وتاني يوم تجوني كلكم في البيت .. نحن في السودان بنحب بعض ... وكل عام ونحن بنحب بعض ، وبنخاف على بعض ، وبنحس ببعض أسامة رقيعة www.osamaregaah.com
