حاجة السارة شائلة قفتا وماشه على الجزارة .. لاقت عمك السر قالت ليهو "السر يا أخوي سمعت بالإعلان حق جريدة الطيب مصطفى القالوا فيهو عايزين فيهو بنات للعمل في الكويت.. عمك السر " لا والله يا حاجة السارة أنا الجرائد دي ما بقراها لو عترتا في واحدة حقت الطيب مصطفى دي ما قاعد أقراها .. لانها جريدة عنصرية .. وما بتشبهنا.. والراجل ده أنا بكجنوا .. حاجة السارة : والله يا السر جنس الكلام ده لا سمعنا بيهو ولا طقش أضانا .. بتي رقية قالت لي مكتوب فيهو أن عايزين بنات يعملوا في الكويت .. شنو كده سنتر .. نوع البت دي البتجي بتقول ليك " شكراً على أتصالك بشبكة زين" غايتو ده كلام رقية بتي !! وقالت لي دايرين ليهم 3 صور من سبيبة الرأس لغاية الرجل .. وتكون مختلفة ... لما سالت مختلفة كيف قالوا لي يعني بالجمبة وبي وراء وبي قدام " شفتا قلت الأدب" أسي عليك الله الصوت ده داير ليهم 3 صور مختلفة اسي كان بعاتي ووشها شين لكن صوتا سمح مش بقضى الغرض لو وافقنا من أساسوا. السر : عليك الله يا حاجة السارة الكلام ده صحي !!! حاجة السارة: أنت يا السر عايش وين الشكية لي الله لا بتقراء جرائد ولا بتشوف تلفزيون ولا بتخش الفيس بوك !!!... السر : والله يا حاجة السارة بالنسبة للجرائد دي أنا خليتا زمان .. لانو كلها الرئيس مشى والرئيس جاء ونافع قال المعارضة ما نافعة .. هو النجيض ما فاهم طظ من سبحان الله .. وكان على التلفزيون كلو كريمات النسوان وشاي التخسيس وقصص كده .. وكان على الفيس بوك ديل الإيامات دي ماسكين في قصة ناس الشرطة العسكرية البحلقوا للناس صلعة وانتي عارفاني أنا زول "أصلع" يعني الموضوع ما جايب حقوا إلا محمد ولدي بجي يوريني الحاجات المهمة زي المظاهرات والإحتجاجات وبوريني الصور في شباب كده مشاء الله يعتمد عليهم .. وكان على الخطيب بتاع الجامع شغالين لينا ساكت أنو الفقر والجوع ده إبتلاء من رب العالمين هو نحنا من ما جونا المسخوتين ديل جعنا.. لكن ونعم بالله لكن يا السارة يا أختي ربنا الكيزان ديل ما ببتليهم مالم .. حاجة السارة ... والله يا السر الحكاية زادت من حدها .. والناس مفروض بعد ده تفرق بين الخير والشر .. العايشين فيهو نحنا ده شر عجيب خلاس ... ما قلنا شئ في حكاية الأسعار الفي السماء دي والدواء حق السكري والضغط الكل يوم بزيد ده .. كمان جابت ليها " قلة أدب"، وبلا خجله كمان وظائف للجنس اللطيف ووين في جريدة " الإنتباهة".. وقالت لي سمية بت بخيته أنو الإعلان ده في " موقع " وزارة العمل .. بدور أسالك يا السر موقع ده شنو يعني ... السر : يا السارة إلا أسال ليك من الشيتن الأسمو "الموقع" ده انا ما كبرتا على الحاجات دي .. لكن أظنوا زي الفيس بوك كده والمازنجر .. وحات الله ورسول الله .. الحكومة دي عايزة تجننا .. حاجة السارة : وكمان قالوا ليك مكتوب عديييييييييييييييييييييييل كده في الجريدة أنو البشرة حق البت الدايرة تشتغل تكون ما داكنة وشكلها جميل ... عاد ده كلام يا السر يا أخوي ... بناتنا بقن زي البضاعة في سوق الله أكبر.. ناس الحكومة بعد ما قرضوا البترول ومشروع الجزيرة ومصنع أسمنت عطبرة ومؤسسة الرهد الزراعية والمصانع وباعوا شارع النيل .. وقاموا سفروا أولادنا بره السودان وودهم الدهب .. بعد ما قرضوا نصهم في حرب الجنوب الزمان ديك .. عايزين يودوا بناتنا عشان يعملن الحاجات الما كويسة .. اسي أمانة في زمتهم دي " رجالة" دي .. الدين الإسلامي قال كده ... الناس ديل يا السر ما أظن عندهم علاقة بالدين الاسلامي .. عمك السر : يا حاجة السارة أنتي الليلة مالك يا أختي فائرة كدي .. اسي بجي " ابو دقن " العامل فيها مؤتمر وطني داك وبتسكوتي .. حاجة السارة : مني دي يا السر ... انت ما بتعرف السارة بت جاد الله ما بتخاف من زول والمعبود بالحق الكلام ده أقولوا في وشوا ودنقوا العاملة زي الزعافة دي .. هو الراجل ده غير الكضب عندو شنو ... بالله كل إنتخابات يجي يكضب على بناتنا ويقول ليهم لو صوتوا " للشجرة" بنعرس ليكم .. أتاريهو عايزين يودهن " الكويت " عاد الحكاية دي ما حارة .. اي زول ود بلد ما بعمل كده .. الناس ديل لو خليناهم ... برجعونا لزمن العبودية .. ويبعونا نحنا ذاتنا .. عمك السر : صدقتي يا السارة!! يا حليل أسماعيل الأزهري وناس الأستقلال وقبليهم ناس الثورة المهدية اسي كان قاعدين للوكت ده وشافوا جنس العمائل دي كان اتبروا مننا .. لكن حكمتو بالغة الله يجازي الكان السبب ... الراجل أبو نخرة طويلة ده السلم تعبنا وشقنا لي ناس الحركة الإسلامية ... واسي يقعد يتباكى على الحصل ... لكن يا السارة ليهم يوم .. وحات الله اولادنا في الحي حقنا ده شغالين كويس وبدوا يتحركوا .. بس الناس مفروض تتلمى كلها عشان الناس ديل يختونا كدي ولا كدي ... ياخي الناس دي يا حاجة السارة ما بتخجل ولا بتختشي ... البشير كمان يقول ما عايز أترشح تاني .. هو نحنا يا ولدي شفنا ليك شنو في الكم وعشرين سنة الفاتت ديل غير الكلام الفاضي والجعجعة والشعارات والرقيص البراء شغلة .. البشير ده لو لقى ليهو كوم تراب بقيف فيهو وبرقص .. .. ياخي أنت لو صحي ود بلد مفروض عشان مصلحتا تقدم أستقالتك وتسلم البلد لي ناس احسن من ناسك ديل .. وبعدين يا السارة في ناس بمغسوني وبجيبوا لي الجلطة وبرفعوا السكري .. يقولوا ليك البشير كويس لكن التحتو كعبين .. ياخي ده سخف عجيب والله .. هو لو كويس التحتو ما بكونوا كعبين .. حاجة السارة : السر التنظيرات دي ما بتنفع، وشغل الوليدات ديل لو ما طلعوا الشارع وقفوا الناس ديل في حدهم الناس دي حيعملوا فينا عمائل ما يعلم بيها إلا ربنا وبعدين المعارضة من البطن دي ما بتنفع .. الشارع ده فيهو الحل.. دحين ما شفتا ناس تونس ومصر بعملوا شنو .. وانا زمان شغالة أقول المصريين ديل ناس جبانين.. والمعبود بالحق طلعوا اجدع ناس .. ونحنا الما عارفين نفسنا دايرين شنو .. السارة يا أختي هوي خلي بالك من بناتك ما تسمعي بيهم في الكويت شغالات " ..... سنتر" .. اها ودعتك الله .. حاجة السارة : يا السر المرة الجاية خلي الأمام بتاع الجامع اب دقن ده يفتح موضوع الجنس اللطيف ده عشان نشوفهم ناوين على شنو .. وفتك بعافية ... " تطنطن .. هي وين العافية ... يا حليل زمان ..الكرعين نجرهم جر ... الله يجازي الكان السبب .. تعرسوا وتلدوا ونحنا نمووووووووت ... [email protected]
