بسم الله الرحمن الرحيم شرف الحكُم..بقى حقكم..يا مصطفى ؟ جود لينا يا زمن العجائب والمحن بيِّن مع الأيام جديدك في المساخر والإحن شيل كل مسئول كَشْكِشُه.. جواه شوف ايه الفضل... يرميه في الشعب الفضل شان تاني ما دايرين بطل لي طبظة تزرع رملة بين أضراسنا يوماتي.. تضْرُس بلدنا بحالا ...للعالم تصل يا مصطفى..قلت المعارضة ايه تكون في عرفكم؟ ما ليها في شرف الحكُم..؟ شرف الحكم بقى حقكم؟ مرق السجل بي إسمكم؟ لي غيركم انتو يسِمهم؟ ياخي إتلهي.. جاك البلى البيخمكم سنةً تساب..تغتسبَكم وهجيرة تلفح ضلكم صَرْصر تشتت شملكم الخاويات أعجاز نخل الريح تشيلكم كلكم لكن أقيف النسألك قبال يجيكم يوم غضبنا البخلعك وتشوف بطن كرعيك جريك ما ينفعك بس كيف حكمنا يشرفك ما دمنا شحاتين..؟ هوت دوق وموية دش من قبلكم ناقصين؟ ما كنا نحلم بيها لو كنا سكرانين؟ بين الشعوب صرنا انجاس ومرذولين.؟ قوم لف عليك الله سويتنا في مغسة ما تنسى أي كلام شان الحساب قرب أرجاه من هسه أرجاه من هسه معمر حسن محمد نور 9/3/2015