سودارس : الريدة الكتيرة يا حنين شقاوة

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

الريدة الكتيرة يا حنين شقاوة
يوميات الشفت

احمد دولة نشر في الصحافة يوم 17 - 12 - 2010

الريدة هي نوع من الحب، بطريقة بلدية - يقولوا ليك فلان ده رياد يعني حبيب ومن النوع المن يشوف ليه واحدة حلوة يقعد يتخفف ويتكبكب ويغرود في عيونه ? والريادين مافي حفلة بتفوتهم حتى لو كانت (تعليمة عروس) ...! ولا جرتق ولا قطع رحط. والريدة غالباً ما تكون من طرف واحد من طرف الرياد أما البت فتكون ما جايبة خبر صاحبنا.. علشان كده الفنان قال (الريدة الكتيرة يا حنين شقاوة).
والريدة كما يقول العارفون ببواطن الأمور زي (الرغوة) تنتهي بعد الزواج وبعد داك تبدأ المناقرة والشقاوة.. جاء في وكالات الأنباء ونقلاً عن صحيفة حكايات بعددها رقم 578 بتاريخ 24/2/2009م ان المناقرة والنقد يقويان قلب الزوجة ويطيلان عمرها وجاء في تلك الدراسة ما يلي:
1. خلصت دراسة مصرية الى ان الزوجات اللائي يتنازعن مع ازواجهن يحمين انفسهن من المشاكل في القلب وغيره من الأمراض التي تسبب الوفاة عكس الزوجات اللواتي يلزمن الصمت (يعني يقطعوا في مصارينهم) فهؤلاء يتعرضن للأصابة بالأمراض القلبية أكثر من غيرهن اربع مرات، يعني الدراسة عديل بتقول للنسوان عشان ما يجيكم مرض قلب كرهوا ازواجكم بالمناقرة...! لماذا اغفلت الدراسة جانب الأزواج المساكين التحرش بهم في المناقرة؟ ما أكيد لو النسوان ما جاهم وجع قلب حيجي للأزواج المساكين لانه وجع القلب جاي جاي..
2. اكدت الدراسة فائدة الزواج على صحة القلب وان الأشخاص الذين لم يتزوجوا ابداً هم الأكثر عرضة لخطر الموت المبكر وهذا يؤكد ما ذهبت اليه الاغنية الشعبية التي تقول: (مغص مغص يا العزابة *** تموتوا مغص يا العزابة؟؟).
3. شملت الدراسة 80 الف شخص نصفهم تقريباً من المتزوجين وتمثلت الخطورة الأعلى في الاشخاص الذين لم يتزوجوا على الإطلاق خاصة الرجال تليهم الأرامل والمطلقون والمطلقات. وانا اضيف من عندي الجيد هم اصحاب الزيجات الناجحة التي يجمع بينها الحب وما في مناقرة وما في نكد.
4. نرجع لنظرية الريدة الكتيرة يا حنين شقاوة، ونبرهن بالغناء والشعر ان الريدة دائماً من جانب الرياد وان المحبوبة دائماً ما تكون ما عارفة، ولا عاملة فيها تقيلة، ولا فاتحة للشخص الرياد.
الريدة الكتيرة يا حنين شقاوة
كلما نزيد حنان انت تزيد علاوة
(ابراهيم حسين)
شايف هو يزيد في الريد وصاحبتنا تتعالى وتتكبر عليه
الريد يجمع ويفرق بحر يروي ويغرق يا الخليتنا قمت مشرق
(ترباس)
بريدك والريدة ظاهرة في عيني بريدك والشوق غمرني وفاض بي
الريدة ظهرت في عيونه والشوق غمره طيب هي موقفها شنو؟
ريدتنا ومحبتنا وليالي هنانا ان شاء الله تدوم نتهنى ونتمنى ونعيش في صفانا
(عثمان حسين)
المحبوب بتمنى دوام الريدة والحبيبة عاملة أضان الحامل طرشة
(عثمان حسين)
كنت بريدك زي عيني
وانا صدقت كلام الريد
عارف قلبك وافي ومخلص
وانك تقسى دي حاجة بعيدة
(زكي عبدالكريم)
الراجل بتكلم بلغة الماضي (كنت) الراجل شوكشوه بس هو الما داير يصدق.
حبيب بريدك ريدة
ريدة الحمام لي وليدة
يا سمسم القضارف
(اغنية شعبية)
الحمامة بتريد وليدة والولد لا يدري هذا الحب يبقى برضو من طرف واحد.
سهر المنام لي وحدي يا قسيم الريد فوقك النبي
(ثنائي النغم)
المسهرة شنو؟ كان ما فتحوا ليه بعد دهكله يقول ليه فوقك النبي.
بريدك يا شقى الأيام عشان بيك الحبيب يسعد
واسهر نجمي عز الليل بعد روح صباحك جد
(حمد الريح)
شقاوة ونجوم وسهاد والحبيب ينام ملء جفونه
البريدو مالو اتأخر بريده يا ناس
(احمد فرح)
مارد عليك يا بارد ما تخليك تقيل
حرمت الحب والريدة وبرضي ما ارضيتك
(وردي)
اشترطت عليه ما يحب غيرها بعد ده كله شوكشته وندمته على حبها البوديك تهبش شنو؟
يا حبيب القلب الريدة ما بالغصب
(محمود على الحاج)
ايوه الريده ما بالغصب ما تفهم ياخي...
هدايا الحلقة:
1. واحد بتاع جزم زعل جاته جزمة نفسية!!!
2. واحد جاه هبوط الدكتور كتب ليه في الروشتة «برشوت»
3. مكانيكي قعد على قهوة وطلب «كاوتشينو»
4. المدرس سأل الطالب هل الثعلب ببيض ولا بيولد؟ التلميذ قال ليه الثعلب طبعاً مكار ممكن نتوقع منه اي حاجة!.
5. واحد سكران قال لصاحبه انت الزيتون عنده كرعين قال ليه لا قال ليه كان كدي انت اكلت خنفساء.
6. واحد ازرق اتزوج واحدة سودة جابوا ولد ابيض سموه «مش ممكن».
7. ميكانيكي اشترى تاكسي كتب عليه الصبر مفتاح 14!
8. واحد قال لصاحبه انت اليوم فطرت ببيض قال ليه ايوه لكن عرفت كيف قال ليه الصفار ظاهر على وشك!
9. صرصور زعلان ومكسوف لانه حلقوا ليه شنبه!
10. الخطيبة للخطيب شايف القمر قال ليها ايوه لكن ليه قالت ليه لأن ريحة شرابك وصلته!.
خاتمة:
الحب والريدة لما تكون من جانبين وتتوج بالزواج عش الزوجية بكون هادي وان القلوب ستكون سليمة..
ونحتم برائعة زكي عبد الكريم:
اسأل نفسك بينك وبينا عن اخلاصنا كيف تتجاهل شوقنا البينا
فاكر الكلمة القلتها لي وانت في لحظة هنية سعيدة
اتعاهدنا على الحنية نقضي عمرنا محبة شديدة
كنت بريدك زي عيني وانا صدقت كلام الريدة
عارفه قلبك وافي ومخلص وانك تقسى دي حاجة بعيدة
مع تحياتي،،،
تنويه وإعتذار:
نرجو ان ننوه الى ما ورد في يوميات الشفت/ عن الاستاذ سيد أبا لا يمت الحدث له بصلة ونحن نعتذر له وما سبب له الموضوع من ألم.

انقر هنا لقراءة الخبر من مصدره.