النملة الاولى: أي قلوب ظلومة انا لي الله خليتها. النملة التانية: سجمي الظلمك منو يا أختي... الشكوى لي غير الله مذلة الا نحنا صاحبات.. مالك كلميني؟ ال... النملة الاولى: لا دي أغنية. النملة التانية: ؟؟؟؟؟ النملة الاولى: اقول ليك بامانة عمليتك ما ظريفة وحركتك جبانة. النملة التانية: دا ابو الوليدات! عاد ما يبقى عرس عليك يا بت امي. النملة الاولى: لا دي أغنية برضو. النملة التانية: ؟؟؟؟؟؟ النملة الاولى: اضربني بمسدسك. النملة التانية: صدقتي الزمن دا الجرايد تكتب ساى، عاد الجرائم بقت كتيرة وغريبة، والله مسكتنا خوفة عديل. النملة الاولى: لا دي أغنية انا بغني ساى. النملة التانية: يا اختي التعجب كتلنا عديل بالاصوات الهبابية دي بقت كتيرة والكلمات غريبة وعجيبة، وكل صوت سموهو اسم لا خلو الملك لا خلو ال.... لا خلو ال... النملة الاولى: وناوية تديهو منو عاد؟ النملة التانية: صوتك.. النملة الاولى: لا يا حبيبتي الخطوط اتشربكت عليك انا قاصدة ديك وانتي مع ديل. النملة التانية: وهسي ديل كيف؟ النملة الاولى: يا بت أمي بدون تعليق الخواف ربى عيالو. النملة التانية: يعني دايرة تربي عيالك. النملة الاولى: عيال شنو؟ هو الواحد فينا نفسو دي بقى ما قادر على احتياجاتها.. شغالين بالسنين ما عملنا حاجة.. نحنا كده مساكيين الخريجين. النملة التانية: الا في واحدين متوفقين. النملة الاولى: اذا اتكلمنا بقولو حاسدين.. أها خلينا كده ساكتين. النملة التانية: احسن نغني شوية نضرب الهم بالفرح. النملة الاولى: اكتب لي عرباتك.. اديني دهب امك وامشي البلا يخمك وين جب جب جب.