٭ إننا لا شك نحيا في هذه الدنيا ولسنا في الجنة لابد اننا سنقابل في هذه الحياة أصنافا من الناس منهم الطيب ومنهم الخبيث، ومنهم البريء والفاجر ومنهم الصادق ومنهم الكذاب، ورغم ذلك في المقام الاول ان الانسان مكرم بنعمة الخالق ويقول المولى عز وجل :( ان الله لا يغير ما بقوم حتى يغيروا ما بأنفسهم). نحن في هذا المجتمع لا نستطيع ان ننكر بعض الاشياء ننظر اليها دون ان نعطيها ادنى اهتمام مثل الفكي وستات الودع او الوداعيات. فست الودع ايضاً ظاهرة اجتماعية منذ قديم الزمان موجودة وسط المجتمع حتى بعض الفنانين يتغنوا بها في الحفلات العامة.. ست الودع ارمي الودع شوفيهو لي لو عندم شيء ما تختشي اي شي.. فكان حوارنا الصحفي مع واحدة من ساكنات الحارة الا وهى حنان كالمبو مشهورة بترمي الودع بتفتح العلبة وتدق الزار. سألنا حنان ازيك يا حنان قالت مرحب بيكم يا شباب انتي من وين يعني مسقط راسك من وين؟ قالت انا من مواليد الله كريم وجئت الخرطوم ايام السيول والامطار سكنت في هذه الحارة والحمد لله. دايرين نعرف اصل الودع جاي من وين وانت ماشاء الله عندك زبائن من النساء والشابات والحياة ماشة معاك باسطة؟ قالت الحمد لله قالت الودع دا يوجد على اطراف البحار وهى قواقع تشبه القرقور تعيش بداخلها دودة الشرنقة تعيش داخل البحار فتقع على شواطيء البحار فتقتل رمال الشواطئ الساخنة الدودة فتصبح (جوفاء) فيحملها الحواتة(القوقعة) الى الاسواق فنستخدمها نحن سبعة حبات في كشف التنجيم لأن الدنيا خُلقت في سبعة والسموات سبعة والايام السبعة والبحار السبعة وتقول بعض الروايات والاساطير في عهد من عهود بني اسرائيل ان هنالك امرأة كانت من بني اسرائيل ترمي الودع فنزل عليها جبريل فقال لها دايرك ترمي لي الودع، فرمت المرة الاولى فقالت ان في هذه القرية سوف ينزل الملك جبريل في المرة الثانية قالت هذه القرية نزل فيها جبريل الآن في المرة الثالثة قلت لولا اخاف الكذب لقلت انك جبريل ، فقيل ان جبريل خطف هذه الودعات السبعة فوقعت منها واحدة في البحار لأن قارون كان من قوم بني اسرائيل وهو عالم فيزيائي وكان يتعامل مع النساء المنجمات فإن التنجيم دا موجود منذ قديم الزمان والله اعلم. في أثناء حديثنا جاءت احدى بنات الحارة شافتني اتحشمت فأستأذنت مني حنان كالمبو فقالت عن اذنك جاء وقت العمل ولا كيف، فدخلت الشابة فقالت ليه والله يا حنان انا كل ما يتقدم لي زول للزواج بتاعي بطرشق ما عارفه انا عندي كج ولا عندي شنو اسع دا العريس الرابع يطير مني، دايراك تشوفي لي في شنو فقالت ليها ادفعي البياض ختي النية فرمت الودع قالت اصدقوا يا عيال ماما قالت ليها يا بتي دا الخاتي عينه عليك دا مرتاح جداً عنده بيت عنده عربية كلك زي عربية اخونا بلة جابر، وعنده اثنين محل بترينة موبايلات في السوق العربي لكن بس يعني...... الشابة تقول ليها النبي تكملي ما تقولي بس راضية بيهو حتى لو راجل مرة. قالت ليها بس يا بتي مشكلته قلت ليكي شين زي اخونا البرة امين باما قالت ليها بريه........ احسن بورتي.
