كرة القدم رياضة غريبة.. مدهشة.. ومتفردة، تلك اضحت حقيقة رسخت بذهني في الفترة الاخيرة.. اذ ان أي مباراة تسبقها وتليها احداث ومواقف تجعلني اقول: يا ريييت لو كنت بفهم في كرة القدم ووالله يا خواني عدم إلمامي و(علم ثقافتي) الرياضية دي من اسوأ الاشياء التي اعاني منها وصدق من قال الجهل بالاشياء داء ومصيبة ما بعدها مصيبة. تنحصر فقط معلوماتي عن كرة القدم في انه يوجد فريقا قمة الهلال والمريخ وبين مشجعيهم كالذي بين الشوايقة والجعليين. الزملاء والزميلات في مجال العمل قبل ان يدركوا عدم إلمامي ذاك حدثت بيني وبينهم مواقف كثيرة ومحرجة لاسيما انهم جميعاً ملمين بكل تفاصيل اللعبة حتى اللاعبين ومن قراء الصحف الرياضية.. فتخيل معي عزيزي القارئ بعض المواقف مثلاً: ٭ عندما تقول أستاذه (م)، فجاه: امير الدامر دا بالغ عديل كدا.. لارد عليها: اذا دخل الفصل يدرس في زمنك طوالي ارفعي خطاب للادارة.. بعدين هو ذاتو احتمال زميل جديد اصلاً الاسم دا ما مر بي ضمن اسماء الزملاء.. لتنفجر بعدها بالضحك المتواصل وتنشر النكتة وسط الآخرين. ٭ في الأيام الاخيرة وعقب لعبة هلال - مريخ (أو مريخ هلال ما تزعلو ساي) خلال فترة الافطار اذا بأحدهم يقول س... س... س... (وطبعاً تعلمت من المواقف الكثيرة السكوت في حالة عدم المعرفة تجنباً للمشاركة الغلط.. فاذا كان الكلام من فضة فالسكوت من ذهب.. إلا ان حب الاستطلاع الداخلي كان يجعلني فريسة التوقعات: ٭ يا ربي يكون قاصد سمك.. يعني يفطر سمك يتمتم كده وهو انته يا اخوي راتبك ده قدر شنو؟ سمك شنو الفول كفايه.. نسيت مصاريف المدرسة والبيت وحق الكهرباء والموية.. عاد سمك كيف؟ ٭ لا لا.. عرفته احتمال سلفية.. هي لاكين يقسموها كيف لمن يطلعو ليك منها سلفية! كمان ولا دي نكتة الشافع ال سألو الاستاذ ما هو الذي لا يقبل القسمة على اتنين ليرد عليه: دي ماهية ابوي يا استاذ أمي قالت كِده وقالت الحاجة دي مطمنااااها... بعدين اذا كانت سلفية ده حق عاد والحق ما فيهو خجل مهما كان حجمو.. إلا انه قبل ان اتم توقعاتي قال سادومبا لينفجر الجميع بعضهم بالضحك وبعضهم بالغضب.. وللمرة التانية بدأت التوقعات: - يكون أستاذ جديد.. إلا الشغل بقى صعب عملها كيف دا يكون عندو واسطة كاربة. - لا.. لا.. عرفته زوج زميله واحدة من البايركس عرست.. إلا البعرس منو الزمن ده في الظروف الصعبة دي.. هو الواحد نفسو دي ما قادر يتم احتياجاتها... والاثاث والقروش يلقاها وين؟؟ لأعرف لاحقاً انه لاعب تسبب باحراز اهداف النصر لأحد الفريقين. - عقب احدى المباريات وبعد جهد وتعب في المواصلات وصلت مكان العمل متأخرة وتسللت للداخل لأتفاجأ بالجميع والفرح ولم اسمع سوى الله.. الله.. الله.. فوجدت نفسي أصرخ فيهم (دا مافيهو شماتة يا اخواني .....دايم وجه الله.. كلنا لها «إنا لله وإنا إليه راجعون».. حق والانسان فاني.. بس إن شاء الله ما خلى وراهو أطفال صغار؟) والجديد منو؟ ربنا يغفر لينا كلنا ويحسن الاعمال (طبعاً عندنا البمسك شئ ما بيخليه إلا بالشديد القوي). لتكون المفاجأة فريق (...) انتصر انتي بتقولي في شنو يا بت الناس؟؟ إذن عزيزي القارئ تبقى كرة القدم رياضة شعبية وتبقى عندي مشكلة عدم فهمها وياترى الحل شنو؟؟
